ဒီမိုကရေစီဆန္ဒကို ထင်ဟပ်စေတဲ့ အနာဂတ်တခုအတွက် ကြိုးစားအားထုတ်နေကြတဲ့ မြန်မာပြည်သူတွေကို ထောက်ခံအားပေးဖို့ ထပ်လောင်းအတည်ပြုတယ်လို့ မြန်မာနိုင်ငံဆိုင်ရာ အမေရိကန်သံရုံးရဲ့ ယာယီတာဝန်ခံ ဒက်ဘ်လင်းက ပြောပါတယ်။

ဇူလိုင် ၄ ရက်မှာ ကျရောက်တဲ့ အမေရိကန်နိုင်ငံရဲ့ ၂၄၇ ကြိမ်မြောက် လွတ်လပ်ရေးနေ့အထိမ်းအမှတ်အနေနဲ့ သံရုံးရဲ့ ယာယီတာဝန်ခံ ဒက်ဘ်လင်းက သံတမန်အသိုက်အဝန်းက လူပုဂ္ဂိုလ်တွေကို ဖိတ်ကြားဧည့်ခံခဲ့ချိန်မှာ ခုလိုပြောလိုက်တာပါ။

“မိမိတို့ဟာ ဒီညချမ်းမှာ မိမိတို့နိုင်ငံအသီးသီးရဲ့ ကိုယ်စားလှယ်တွေအဖြစ်သာမက သက်ဆိုင်ရာ နိုင်ငံအသီးသီးရဲ့ အခြေခံဥပဒေနဲ့ နိုင်ငံတကာသဘောတူညီမှုတွေမှာ ထည့်သွင်း ရေးဆွဲ​ဖော်ပြထားတဲ့ ဘုံစံတန်ဖိုးတွေနဲ့ မူဝါဒတွေကို ခုခံကာကွယ်ကြသူတွေအနေနဲ့ပါ ရပ်တည်နေကြတာ ဖြစ်ပါတယ်။ သူတို့ရဲ့ အခွင့်အရေးတွေ အပြည့်အဝရတဲ့၊ သူတို့ရဲ့ လိုလားတောင့်တမှုတွေကို လေးစားလိုက်နာတဲ့၊ သူတို့ရဲ့ ဒီမိုကရေစီဆန္ဒကိုထင်ဟပ်စေတဲ့ အနာဂတ်တစ်ခုအတွက် ကြိုးစားအားထုတ်နေကြတဲ့ မြန်မာပြည်သူတွေကို ထောက်ခံအားပေးဖို့ မိမိတို့ရဲ့ သံန္နိဋ္ဌာန်ကို ခုလိုအခါသမယမှာ ထပ်လောင်းအတည်ပြုအပ်ပါတယ်။”

ဒါ့အပြင် စစ်တပ်က အာဏာသိမ်းထားတဲ့ မြန်မာနိုင်ငံမှာ လွတ်လပ်မှုအတွက် ပြည်သူတွေရဲ့ ပြင်းပြတဲ့ လိုအင်ဆန္ဒတွေဟာ လွန်ခဲ့တဲ့ ရာစုနှစ် ၂ စုကျော်က အမေရိကန် ပြည်ထောင်စုကို မွေးဖွားစေခဲ့တဲ့ ပြင်းပြတဲ့ဆန္ဒမျိုးပါပဲလို့လည်း ဒက်ဘ်လင်းက ပြောပါတယ်။

“မိမိတို့ဟာ အမေရိကန်လွတ်လပ်ရေးနေ့ရဲ့ စိတ်ဓာတ်ခံယူချက်ကို ဆင်နွှဲတဲ့အခါမှာ အလားတူစံနမူနာတွေကို ရှာဖွေဖို့ရာ ရုန်းကန်နေကြရတဲ့ မြန်မာပြည်သူတွေကိုလည်း မိမိတို့ အသိမှတ်ပြုပါတယ်။ ၂၀၂၁ စစ်တပ်အာဏာသိမ်းမှုအပေါ် မြန်မာပြည်သူတွေဟာ ကြီးမားတဲ့ ရဲစွမ်းသတ္တိ၊ ယိမ်းယိုင်မှုမရှိတဲ့ သံန္နိဋ္ဌာန်၊ ဒီမိုကရေစီစနစ်ရဲ့ စွမ်းအားအပေါ် မပြောင်းလဲတဲ့ ယုံကြည်မှုတွေနဲ့ တုံ့ပြန်ခဲ့ကြပါတယ်။ လွတ်လပ်မှုအတွက်သူတို့ရဲ့ လိုအင်ဆန္ဒက လွန်ခဲ့တဲ့ ရာစုနှစ် ၂ ခုကျော်ကာလတုန်းက အမေရိကန်ပြည်ထောင်စုကို မွေးဖွားစေခဲ့တဲ့ ပြင်းပြတဲ့ ဆန္ဒမျိုးပါပဲ။”

အမေရိကန်နိုင်ငံဟာ အာဏာသိမ်းစစ်အုပ်စုနဲ့ ဆက်နွှယ်နေတဲ့ မြန်မာနိုင်ငံသား လူပုဂ္ဂိုလ်တွေနဲ့ စစ်ဗိုလ်ချုပ်တွေပိုင်ဆိုင်တဲ့ လုပ်ငန်း/အဖွဲ့အစည်းတွေကို ဒဏ်ခတ်ပိတ်ဆို့ အရေးယူတာတွေ ပြုလုပ်နေတဲ့အပြင် စစ်အာဏာရှင်အဖွဲ့ရဲ့ ပိုမိုအရှိန်မြှင့်လာတဲ့ အကြမ်းဖက်မှုတွေကို တုံ့ပြန်ဖို့ မြန်မာပြည်သူတွေအတွက် အားပေးထောက်ခံမှုကို ပြသဖို့နဲ့ စစ်အာဏာရှင်တွေကျူးလွန်ခဲ့တဲ့ အာဏာသိမ်းယူမှုနဲ့ အကြမ်းဖက်မှုတွေနဲ့ ပတ်သက်ပြီး တာဝန်ယူမှု တာဝန်ခံမှုရှိစေဖို့ အခုလို လုပ်ဆောင်တာလို့ နိုင်ငံခြားရေးဌာနက ကြေညာခဲ့တာပါ။

ဒါ့အပြင် ဘားမားအက် “BURMA ACT” ဥပဒေကို တပါတည်း ထည့်ပေါင်းထားတဲ့ ၂၀၂၃ ဘဏ္ဍာရေးနှစ်အတွက် အမျိုးသားကာကွယ်ရေးအက်ဥပဒေ (NDAA) ကို ပြီးခဲ့တဲ့ ဒီဇင်ဘာ ၂၃ ရက်မှာ အမေရိကန်သမ္မတ ဂျိုးဘိုင်ဒင်က လက်မှတ်ရေးထိုး အတည်ပြုပြဋ္ဌာန်းခဲ့တာ ဖြစ်ပြီးတော့ ဒီဥပဒေမှာ NUG၊ NUCC၊ CRPH နဲ့ PDF တွေကိုရော  တိုင်းရင်းသားလက်နက်ကိုင်အဖွဲ့တွေကိုပါ ကူညီထောက်ပံ့မှုတွေ ပေးအပ်ဖို့ ပါဝင်ပါတယ်။

လတ်တလော မြန်မာနိုင်ငံမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ် ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပါတယ်။

နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ် တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။