မန္တလေး၊ ပြည်ကြီးတံခွန်မြို့နယ်၊ ဇ ရပ်ကွက်၊ ၁၃၂ လမ်းနဲ့ ၆၃ (အေ) လမ်းရှိ လူနေအိမ်နဲ့ ဆိုင်ပစ္စည်းသိုလှောင်ရုံ ၃ ထပ်အဆောက်အဦ တခုတည်းမှာ ဇွန် ၁၈ ရက် ညပိုင်းနဲ့ ဇွန် ၁၉ ရက် နေ့လယ်ပိုင်းက မီးလောင်မှု ၂ ကြိမ်ဖြစ်ပွားခဲ့တယ်လို့ မန္တလေးဗဟိုမီးသတ်ဌာနက ပြောပါတယ်။
မီးလောင်မှုဖြစ်ပေါ်ခဲ့တဲ့ အဆောက်အဦဟာ ဆိုင်ကယ်အပိုပစ္စည်းနဲ့ ကားအစိတ်အပိုင်းတွေ သိုလှောင်တဲ့နေရာဖြစ်ပြီး ဒုတိယထပ်ကနေ စတင်လောင်ကျွမ်းခဲ့တာပါ။
မန္တလေးမြို့ လူမှုကယ်ဆယ်ရေးအသင်း တာဝန်ရှိသူက “တအိမ်တည်း နှစ်ကြိမ်လောင်တာ။ မနေ့ကလောင်တဲ့ အခန်းကပဲ ထပ်လောင်တာ။ အခုတကြိမ်က မီးခိုးပဲ ပိုများတယ်။ မနေ့ညကတော့ မီးတောက်တာပေါ့၊ ၂ နာရီကျော်ကျော်လောက် ငြှိမ်းရတယ်။ အသင်းက ရေသယ်ယာဉ်ရော၊ မီးသတ်က ရေသယ်ကားရော ပါတယ်။ လူထိခိုက်မိတာမျိုးတော့ မရှိဘူး။ အဲ့ဒီနေရာ လောင်ပြီးကတည်းက အခန်းမှာ လူမနေတော့တာ၊ ဒီနေ့လယ်မှ မီးပြန်စွဲတဲ့ပုံစံပါ” လို့ ပြောပါတယ်။
ဇွန် ၁၈ ရက် ည ၈ နာရီခွဲလောက်က ပထမအကြိမ် လောင်ကျွမ်းတာကြောင့် ချမ်းအေးသာစံ မီးသတ်ယာဉ်တွေ၊ ပြည်ကြီးတံခွန် မီးသတ်ယာဉ်တွေနဲ့ အရပ်ဘက်ကယ်ဆယ်ရေး အသင်းတွေက ဝိုင်းဝန်းငြှိမ်းသတ်ခဲ့ကြတာကြောင့် ည ၁၁ နာရီခန့်မှာ မီးငြိမ်းသွားပါတယ်။
ဇွန် ၁၉ ရက် နေ့လယ် ၁ နာရီလောက်မှာ မီးငြှိမ်းထားတဲ့ အထပ်ကပဲ ထပ်မံလောင်ကျွမ်းခဲ့တာကြောင့် ပြည်ကြီးတံခွန်မီးသတ်နဲ့ သက်ဆိုင်ရာ မီးသတ်တပ်ဖွဲ့ရဲ့ မီးငြှိမ်းသတ်ယာဉ် ၈ စီး၊ ရေသယ်ယာဉ်တွေနဲ့ ၁၅ မိနစ်ခန့် ငြှိမ်းသတ်ခဲ့ရတယ်လို့ သိရပါတယ်။
မီးလောင်မှု ၂ ကြိမ်အတွင်း ပျက်စီးဆုံးရှုံးမှုတန်ဖိုးကို မန္တလေးဗဟိုမီးသတ်ဌာနက တွက်ချက်နေဆဲ ဖြစ်တယ်လို့ သိရပြီး မီးလောင်မှုအကြောင်းအရင်းကို စစ်ဆေးနေဆဲ ဖြစ်တယ်လို့ သိရပါတယ်။
ဓာတ်ပုံ[ မန္တလေးဗဟိုမီးသတ် ]
