ဇွန် ၁၉ ရက် ဒီကနေ့ ကျရောက်တဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ အသက် ၇၈ နှစ်ပြည့် မွေးနေ့အမှတ်တရ နိုင်ငံတဝန်း PDF တပ်ရင်းတပ်ဖွဲ့တွေအလိုက် လှုပ်ရှားမှု မှတ်တမ်းဓာတ်ပုံတွေ၊ ရုပ်သံတွေကို အမျိုးသားညီညွတ်ရေးအစိုးရ (NUG)၊ ကာကွယ်ရေးဝန်ကြီးဌာနက မျှဝေထားပါတယ်။
အသက် ၇၈ နှစ်အရွယ် နိုင်ငံ့ခေါင်းဆောင် ဒေါ်အောင်ဆန်းစုကြည်ကို မင်းအောင်လှိုင် ဦးဆောင်တဲ့ စစ်တပ်က မတရားဖမ်းဆီး အာဏာသိမ်းယူခဲ့ကာ အမှုပေါင်း ၁၉ မှုနဲ့ သက်သေထင်ရှားမရှိဘဲ စွပ်စွဲပြီး ထောင်ဒဏ် ၃၃ နှစ် ချမှတ်ထားတာ ဖြစ်ပါတယ်။
ဒေါ်အောင်ဆန်းစုကြည်ဟာ ၁၉၈၉ ခုနှစ်ကနေ ၂၀၁၀ ပြည့်နှစ်အထိ ၂၁ နှစ်အတွင်း ၁၅ နှစ်ကျော် နေအိမ်အကျယ်ချုပ် ကျခံခဲ့ရပြီး လက်ရှိ အာဏာသိမ်းစစ်ကောင်စီလက်ထက် ၂၀၂၁ ခုနှစ်ကနေ လက်ရှိအချိန်အထိ နေပြည်တော် အကျဉ်းထောင်ထဲမှာ ထိန်းသိမ်းခံနေရတာပါ။
အဲ့ဒါကြောင့် ၁၉၈၉ ခုနှစ်ကနေ ၂၀၂၃ ခုနှစ်အတွင်း သူ့မွေးနေ့ ၁၈ ကြိမ်ကို အကျဉ်းချခံနေရတုန်းမှာ ဖြတ်သန်းခဲ့ရပါတယ်။
ဒီကနေ့မှာတော့ ကမ္ဘာ့နိုင်ငံတွေ အသီးသီးက မြန်မာ့ဒီမိုကရေစီရေး တက်ကြွလှုပ်ရှားသူတွေ အပါအဝင် ပြည်တွင်းပြည်ပက နိုင်ငံ့ခေါင်းဆောင် ဒေါ်အောင်ဆန်းစုကြည်ကို ချင်ခင် လေးစားကြသူတွေက မွေးနေ့ဆုတောင်းပွဲတွေ၊ အမြန်ဆုံးလွတ်မြောက်နိုင်ရေး လူထုသပိတ် လှုပ်ရှားပွဲတွေ ပြုလုပ်နေကြတာ ဖြစ်ပါတယ်။
NUG ကာကွယ်ရေးဝန်ကြီးဌာန ဖေ့စ်ဘွတ်ခ်လူမှုကွန်ရက်ပေါ်က မျှဝေထားတဲ့ ဓာတ်ပုံနဲ့ ရုပ်သံမှတ်တမ်းတွေမှာတော့ မြေပြင်တိုက်ပွဲတွေ ပြင်းထန်နေတဲ့ စစ်ကိုင်းတိုင်းဒေသကြီး၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ကရင်ပြည်နယ် စတဲ့ နေရာဒေသအသီးသီးက PDF တပ်ရင်းတပ်ဖွဲ့စစ်ကြောင်းတွေ အသီးသီးက မွေးနေ့လက်ဆောင် လှုပ်ရှားမှုတွေ ပါဝင်နေတာ ဖြစ်ပါတယ်။
လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ် ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ် ဆင်နွှဲနေပြီး တိုက်ပွဲတွေ ပြင်းထန်နေပါတယ်။
Photo - NUG MOD
