ပြည်သူလူထုအတွက်ထိခိုက်နစ်နာစေတဲ့အတွက် အရင်အစိုးရလက်ထက်မှာ ပိတ်ပင်ထားခဲ့တဲ့ ဆင့်ပွားစျေးကွက်ဖြန့်ချိ (MLM) စီးပွားရေးလုပ်ငန်းတွေဟာ အာဏာသိမ်း စစ်ကောင်စီလက်ထက်  အခုအခါ မြန်မာပြည်တွင်းမှာ တစ်ဖန်ပြန်အားကောင်းလာနေပါတယ်။

MLM လုပ်ငန်းဟာ အေးဂျင့်တစ်ဦးကနေ တခြားအေးဂျင့် ၅ ဦးလောက်ကို အဖွဲ့ဝင်အဖြစ် မက်လုံးပေးဆွဲဆောင်ပြီး ထိုသူတွေ လက်အောက်ကနေလည်း တခြားအဖွဲ့ဝင်တွေထပ်တိုးအောင် ပြုလုပ်ပြီး ပီရမစ်ပုံစံ စနစ်ဖြစ်ပါတယ်။

အေးဂျင့်ကိုယ်တိုင်က ကုမ္ပဏီပစ္စည်းကို စျေးကြီးပေးဝယ်သုံး​ပြပြီး ကိုယ်တိုင်ဝယ်သုံးရင် လျှော့စျေးနဲ့ရကာ ရောင်းရတဲ့စျေးနှုန်းအလိုက် အမှတ်အဆင့်သတ်မှတ်ပေးပါတယ်။ 

ကြယ်တစ်ပွင့်၊ ကြယ်နှစ်ပွင့်အနေနဲ့ အဆင့်သတ်မှတ်ပေးပြီး အဆင့်သတ်မှတ်ချက်အလိုက် ကော်မရှင်ခတွေ ရရှိပါတယ်။ စျေးကြီးပေးဝယ်ရတဲ့ထုတ်ကုန်အများစုဟာ FDA ထောက်ခံချက်မ ရရှိထားသလို သုံးစွဲသူတွေအတွက် ဘေးကင်းလုံခြုံမှု အာမခံချက်မရှိတဲ့ ထုတ်ကုန်တွေ ဖြစ်ပါတယ်။

MLMလုပ်ငန်းကြောင့် နစ်နာခဲ့ရသူတစ်ဦးက ''​​အေးဂျင့် ရှာခဲ့တဲ့လူတွေကလည်း တခြားအေးဂျင့်တွေ ဆက်ရှာမယ်။ အဲ့လိုတွေထပ်သုံးပြမယ်ဆို အပေါ်မှာရှိတဲ့လူတွေက အလိုလိုနေရင်း ပိုက်ဆံ ဆတိုးပွားကော။ တစ်ချိန်လူမရှာနိုင်တော့ဘူးဆိုရင် ပစ္စည်းတွေ လက်ဝယ်ပိုက်မိ ရင်းနှီးထားတဲ့ငွေ အချိန်ကုန်တာပဲရှိမယ်။ ဘာအာမခံချက်မှမရှိဘူး သူတို့မှန်းထားတဲ့ ပိုက်ဆံရပြီဆို ကုမ္ပဏီဖျက်သိမ်း လစ်ကောပဲ''လို့ ပြောပါတယ်။

ဒီလုပ်ငန်းနဲ့ နီးစပ်သူ တယောက်ကလည်း “ အရင်အစိုးရတုန်းက အရေးယူမှုတွေကြောင့် ကုမ္ပဏီတွေ ဖျက်သိမ်းခဲ့ရပြီး အခုစစ်ကောင်စီ လက်ထက်မှာ မှတ်ပုံတင်ထားရင်အဲ့ ကုမ္ပဏီက တရားဝင်ပြန်ဖြစ်သွားတယ်။ သူတို့ကပိုက်ဆံရပြီးကော။ ပေးနိုင်ရင်ကြိုက်တာလုပ်လို့ရတယ်''လို့ ပြောပါတယ်။

စစ်ကောင်စီ အာဏာမသိမ်းခင်ကာလ ၂၀၁၈ ခုနှစ်မှာ စီးပွားရေးနဲ့ကူးသန်းရောင်းဝယ်ရေးဌာနက ဆင့်ပွားစျေးကွက်ဖြန့်ချိရေးလုပ်ငန်းတွေကို တားမြစ်ဖို့ အမိန့်ထုတ်ထားခဲ့လို့  အဆိုပါလုပ်ငန်းတွေ ပျောက်ကွယ်ခဲ့သွားခဲ့သေးပါတယ်။