ပဲခူးတိုင်းအနောက်ခြမ်း၊ သာယာဝတီခရိုင်၊ နတ်တလင်းမြို့မှာ ကောင်းမြတ်သာ (EXPRESS) ခရီးသည်တင်အမြန်ယာဉ် လမ်းချော်ပြီး လမ်းဘေးသစ်ပင်ကို ဝင်တိုက်ရာက အမျိုးသား တယောက် သေဆုံးပြီး လေးယောက် ထိခိုက်ဒဏ်ရာ ရခဲ့တယ်လို့ မြို့ခံပရဟိတအသင်းထံက သိရပါတယ်။

ဇွန် ၁၅ ရက် မနက် ၄ နာရီကျော်လောက်က နတ်တလင်းမြို့အဝင် စစ်ဆေးရေးဂိတ်အနီး လမ်းကွေ့မှာ မိုးရွာထားပြီး လမ်းချော်ရာက အခုလို မတော်တဆ ယာဉ်တိုက်မှုဖြစ်ပွားခဲ့ကာ သေဆုံးနဲ့ ထိခိုက်ဒဏ်ရာတွေ ရရှိခဲ့တာလို့ ဆိုပါတယ်။

ကယ်ဆယ်ရေးအဖွဲ့ဝင်တဦးက “မိုးရွာထားတဲ့ရက်တွေဆို ဒီလမ်းမကြီး (ရန်ကုန်-ပြည်) မှာ လမ်းချော်ပြီး စလစ်ဖြစ်တာတွေ များတယ်ဗျ။ မိုးရွာထားတဲ့ရက်တွေဆို ကားဆရာတွေအနေနဲ့ သတိထား မောင်းစေချင်ပါတယ်။ သေဆုံးသူက ကားစပယ်ယာပါ။ သစ်ပင်ကိုဝင်တိုက်ပြီး ကားမှန်တွေကို ဖောက်ထွက်ပြီး လမ်းဘေးမြောင်းထဲ ကျသွားတာ” လို့ ဒီဗွီဘီကို ပြောပါတယ်။

ရန်ကုန်-မကွေး ပြေးဆွဲနေတဲ့ ကောင်းမြတ်သာ ခရီးသည်တင်ယာဉ်ပေါ်က အသက် ၃၀ ဝန်းကျင်ခန့် အမျိုးသား ယာဉ်နောက်လိုက် နေရာတင်သေဆုံးခဲ့ပြီး အမျိုးသား နှစ်ယောက်နဲ့ အမျိုးသမီး နှစ်ယောက်တို့ ထိခိုက်ဒဏ်ရာ (မစိုးရိမ်ရ) ရရှိခဲ့တယ်လို့ သိရပါတယ်။

သေဆုံးနဲ့ ထိခိုက်ဒဏ်ရာရရှိခဲ့သူတွေကို ဓမ္မဝံသာနုရက္ခိတအသင်းနဲ့ ကရုဏာသိဒ္ဓိ လူမှုကူညီရေးအသင်းတို့က နတ်တလင်းမြို့ ဆေးရုံကြီးကို ပို့ဆောင်ပေးခဲ့ပါတယ်။

အခုလ ၄ ရက်နေ့ကလည်း ရန်ကုန်-ပြည် ကားလမ်းမပေါ်မှာ ယာဉ်တိုက်မှု နှစ်ကြိမ်ဖြစ်ပွားပြီး နှစ်ယောက် သေဆုံးကာ နှစ်ယောက် ထိခိုက်ဒဏ်ရာတွေ ရရှိခဲ့ပါတယ်။

Photo - ဓမ္မဝံသာနုရက္ခိတအသင်း