ပဲခူးတိုင်း၊ ပြည်မြို့၊ အောင်ဆန်းကွက်သစ်ရှိ နေအိမ်တအိမ်မှာ ဇွန် ၈ ရက် ညနေပိုင်းက အသက် ၃၅ နှစ်အရွယ် အမျိုးသမီးတယောက် အသတ်ခံရပြီး ပစ္စည်းပျောက်ဆုံးမှုနဲ့ ပတ်သက်ပြီး အမျိုးသား တယောက်ကို ပြည်မြို့၊ အမှတ် ၃ ရဲစခန်းမှာ ဖမ်းမိထားပြီလို့ မြို့ခံတွေက ပြောပါတယ်။
ကျူးလွန်သူကို မြို့သစ် ၁၃ လမ်းရှိ အလုပ်လုပ်နေတဲ့ ကုန်စုံဆိုင်မှာ ဇွန်လ ၈ရက် ညနေ ၆နာရီခွဲမှာပဲ ဖမ်းမိတာဖြစ်ပြီး ပြည်မြို့ရဲစခန်းနဲ့ အမှတ် ၃ စခန်းတို့က ပူးပေါင်းဖမ်းဆီးတာလို့ သိရပါတယ်။
ပြည်မြို့လူမှုကယ်ဆယ်ရေးအသင်းတခုရဲ့ တာဝန်ခံက " တရားခံက မိပြီလို့ ကြားတယ်၊ အဲ့ဒီအိမ်ငှားပဲ၊ စကားများကြရင်း လူသတ်မှုဖြစ်တာ၊ ကလေးမလေးကိုတော့ သူတို့အမျိုးတွေက ကြည့်ပေးထားတယ် " လို့ ပြောပါတယ်။
ဖမ်းမိတဲ့ အမျိုးသားမှာ အသက် ၄၀ ကျော်အရွယ် မောင်မောင်ထွေး ဖြစ်ပြီး သေဆုံးသူ ဒေါ်စန်းစန်းဝင်းရဲ့နေအိမ်က အိမ်ငှားဖြစ်ပါတယ်။
မောင်မောင်ထွေးရဲ့ ပြောပြချက်အရ အဲ့ဒီနေ့ မနက်ပိုင်းနဲ့ နေ့လယ်မှာ သေဆုံးသူ အမျိုးသမီးနဲ့ စကားများကြရာက စိတ်မထိန်းနိုင်ဘဲ နံရံကို တွန်းထုတ်ခဲ့ကာ ၂ ပေခွဲတုတ်နဲ့ ရိုက်နှက်တဲ့အပြင် ဝက်အူလှည့်မိုင်းနပ်ပြားနဲ့ နားထင်ကို ထိုးခဲ့ပြီး ရေချိုးခန်းထဲ ထည့်ထားခဲ့တယ်လို့ ဆိုပါတယ်။
ကျူးလွန်သူကို ပစ္စည်းပျောက်ဆုံးမှုကို ဆက်လက်စစ် ဆေးနေတယ်လို့ သိရပြီး ပြည်မြို့၊ အမှတ် ၃ ရဲစခန်းမှာ အမှတ်(ပ)၉၈/၂၀၂၃ ၊ ရာဇသတ်ကြီး ဥပဒေပုဒ် ၃၀၂ နဲ့ အမှုဖွင့်ထားပါတယ်။
