ကချင်ပြည်နယ်၊ မြစ်ကြီးနားမြို့၊ မန်ခိန်ရပ်ကွက်က တည်းခိုရိပ်သာတခုကို စစ်ကောင်စီတပ်က ဝင်ရောက်စစ်ဆေးပြီး ကချင်လွတ်လပ်ရေးအဖွဲ့ (ကေအိုင်အို) အရာရှိနှစ်ယောက်ကို ဖမ်းဆီးသွားပါတယ်။
မန်ခိန်ရပ်ကွက် မြစ်ဆုံသွားလမ်းမှာရှိတဲ့ ရွှေလိပ်ပြာတည်းခိုရိပ်သာကို ဇွန် ၅ ရက် ည ၁၂ နာရီလောက်မှာ စစ်ကောင်စီတပ်က ဧည့်စာရင်း ဝင်ရောက်စစ်ဆေးပြီး ကေအိုင်အို အုပ်ချုပ်ရေးအရာရှိ နှစ်ယောက်ကို ဖမ်းဆီးသွားတာဖြစ်ကြောင်း ကေအိုင်အိုနဲ့ နီးစပ်သူတဦးက ပြောပါတယ်။
“ရွှေလိပ်ပြာတည်းခိုခန်းမှာ ည ၁၂ နာရီလောက် ဧည့်စာရင်းဝင်စစ်ရင်း ဖမ်းသွားတာ။ ဒုအုပ်ချုပ်ရေး အရာရှိနှစ်ဦးပါ။ သတင်းအတိအကျရလို့ လာဖမ်းတာ ဖြစ်ဖို့များတယ်။ ည အိပ်ချိန်မှ လာဖမ်းတာဆိုတော့ စတည်းကတည်းက သတင်းကြိုပေးထားသလို ဖြစ်နေတယ်။”
စစ်ကောင်စီတပ်က ဝင်ရောက်စစ်ဆေးပြီး ဖမ်းဆီးသွားသူနှစ်ယောက်ဟာ တိုက်နယ် ဒုအုပ်ချုပ်ရေးမှူး အဒေါင်နဲ့ အင်ခွမ်လ တို့ ဖြစ်ပါတယ်။
ပြီးခဲ့တဲ့ မေ ၆ ရက်ကလည်း မြစ်ကြီးနားမြို့ ရွှေလမ်းမကြီးပေါ်က Happy KTV မှာ ကေအိုင်အိုနဲ့ ဆက်နွှယ်ပတ်သက်တယ်ဆိုပြီး အမျိုးသား ၅ ဦးကို စစ်ကောင်စီတပ်က ဝင်ရောက် ဖမ်းဆီးခဲ့ပါသေးတယ်။
