ကော်သူးလေ အုပ်ချုပ်ရေးနယ်မြေ ကရင်ပြည်နယ်၊ ကော့ကရိတ်မြို့နယ်၊ ခုဒုံကျေးရွာအုပ်စု၊ ဆံဖလားကျေးရွာကို စစ်ကောင်စီတပ်က ကလပ်စတာဗုံးနဲ့ ဇွန် ၆ ရက် မနက် ၁ နာရီ ၅၀ မိနစ်မှာ လာရောက်ဗုံးကြဲ တိုက်ခိုက်ခဲ့တယ်လို့ ကေအန်ယူ တပ်မဟာ ၆ နယ်မြေမှ တာဝန်ရှိသူတွေက ပြောပါတယ်။
လေကြောင်းတိုက်ခိုက်ခံရမှုကြောင့် ဆံဖလားကျေးရွာ အခြေခံပညာ မူလတန်းစာသင်ကျောင်း ၁ ကျောင်း၊ ပြည်သူနေအိမ် ၄ လုံးနဲ့ ပြည်သူပိုင် ခြံစိုက်သီးပင်တချို့ ထိမှန်ပျက်စီးခဲ့တယ်လို့ ဆိုပါတယ်။
စစ်ကောင်စီတပ် လာရောက်ဗုံးကြဲပစ်ခတ်တဲ့ ကလပ်စတာဗုံး ၁ လုံးအတွင်း ပါဝင်တဲ့ ဗုံးသီးငယ်တွေ စာသင်ကျောင်းဝင်းထဲ ၂ လုံး ကျရောက်ပေါက်ကွဲပြီး ကျောင်းဆောင်ရဲ့ အစိတ်အပိုင်းတချို့ ထိခိုက်ပျက်စီးခဲ့ပါတယ်။
ဒါ့အပြင် ဆံဖလားကျေးရွာနေ ဦးဥတစ်လုံး (၅၂ နှစ်) ရဲ့ လယ်ကွင်းထဲ ၁၁ လုံးကျကာ ၁၀ လုံး ပေါက်ကွဲခဲ့ပြီး နောမြင့်ရဲ့ ကြံစိုက်ခင်းနဲ့ စောဖားသယ်သေ့ရဲ့ ကွမ်းခြံကြားကို ၁ လုံး ကျရောက် ပေါက်ကွဲတာကြောင့် ကြံပင်တချို့နဲ့ ကွမ်းသီးပင် ၁၀ ပင်၊ အုန်းသီးပင် ၁ ပင် ပျက်စီးခဲ့ပါတယ်။
စစ်တပ်က လေကြောင်းတိုက်ခိုက်မှုကြောင့် ပြည်သူပိုင်အိုးအိမ်တွေလည်း ဗုံးကျည်ထိမှန်ပြီး လူနေအိမ် ၄ လုံးလောက် ပျက်စီးခဲ့ရတယ်လို့ ဒေသခံတွေက ပြောပါတယ်။
စစ်တပ်က အာဏာသိမ်းပြီးနောက် တိုက်ခိုက်မှုတွေကြောင့် စာသင်ကျောင်းတွေ၊ ဘာသာရေးဆိုင်ရာ အဆောက်အဦတွေ၊ ပြည်သူ့နေအိမ်တွေနဲ့ ဥယျာဥ်ခြံမြေ အမြောက်အမြား ပျက်စီးဆုံးရှုံးခဲ့တယ်လို့ ကေအန်ယူ တပ်မဟာ ၆ ဘက်က ပြောပါတယ်။
ကြာအင်းဆိပ်ကြီးမြို့ပေါ်မှာလည်း KNLA အထူးစစ်ဆင်ရေးတပ်ဖွဲ့ – S.O.F နဲ့ Cloud Wings ဒရုန်းတပ်ဖွဲ့တို့ ပူးပေါင်းပြီး တပြိုင်တည်း ဝင်ရောက် စီးနင်းတိုက်ခိုက်ခဲ့လို့ စစ်တပ်နဲ့ တိုက်ပွဲဖြစ်ပွားခဲ့တဲ့စစ်တပ်က ပစ်ခတ်ခဲ့လို့ မြို့ပေါ်က လူနေအိမ် ၁ လုံးနဲ့ ဒေသခံ ၃ ဦး လက်နက်ကြီး ထိမှန်ခဲ့တယ်လို့ ဒေသခံတွေက ပြောပါတယ်။
