မန္တလေး၊ ပြည်ကြီးတံခွန်မြို့နယ်မှာ ဇွန်လ ၅ ရက် မနက်ပိုင်းက မီးလောင်မှု ၂ ကြိမ်ဖြစ်ပွားခဲ့တာကြောင့် လူနေအိမ် ၆ လုံး မီးလောင်ခဲ့တယ်လို့ မန္တလေးဗဟိုမီးသတ်တပ်ဖွဲ့က ပြောပါတယ်။
ပြည်ကြီးတံခွန်မြို့နယ်၊ ငွေတော်ကျီကုန်းရပ်ကွက်၊ ( ၆၇A × ၆၇ B ) လမ်းနဲ့ လမ်း ၁၂၀ကြားရှိ လူနေအိမ်တခုမှာ မနက် ၉နာရီ ၈ မိနစ်ခန့်က လျှပ်စစ်ဒယ်အိုး အပူလွန်ကဲရာမှ အခြားအိမ်တွေပါ မီးလောင်ခဲ့တာပါ။
မန္တလေး လူမှုကယ်ဆယ်ရေးအသင်းတခုက တာဝန်ခံက " ဒယ်နီအိုးကနေ လောင်တယ်လို့ သိရတယ်၊ အိမ်လေးတွေက ထရံကာထားတော့ အဲ့ဒီကနေ မီးတောက်က ပိုလွယ်သွားတာ၊ ၁၀ ပေ ၁၅ ပေ အိမ်က ၃ လုံး၊ ပေ ၄၀ အိမ်က ၂ လုံး ဒါက ၆၇ B မှာ လောင်တာ၊ ၆၂ လမ်းက စတီးပိုက် ဂိုထောင်ကတော့ ပျက်စီးမှု သိပ်မရှိဘူး " လို့ ဆိုပါတယ်။
မီးလောင်မှုကြောင့် ( ၁၀×၁၅)ပေအကျယ်ရှိ သွပ်မိုးထရံကာ နေအိမ် ၃ လုံး၊ ပေ (၄၀×၂၀ ) အကျယ်ရှိ နေအိမ် ၂ လုံး ပျက်စီးဆုံးရှုံးသွားပြီး မက် ၉နာရီ ၂၄ မိနစ်ခန့်မှာ မီးငြိမ်းသွားပါတယ်။
ပြည်ကြီးတံခွန်မြို့နယ်၊ ၆၂ လမ်းနဲ့ ( ၁၁၇× ၁၁၈ ) လမ်း ကြားရှိ စိန်မြင့်မိုရ် စတီးပိုက်ဆိုင်မှာလည်း မနက် ၉နာရီ ၂၇ မိနစ်လောက်က မီးလောင်မှု ထပ်မံဖြစ်ပွားခဲ့ပြီး မနက် ၉နာရီ ၄၆ မိနစ်မှာ မီးငြှိမ်းသတ်နိုင်ခဲ့တယ်။
မီးလောင်မှုဟာ စတီးပိုက်ဆက်စပ်ပစ္စည်းထားရာ ဂိုထောင်ကနေ စတင်လောင်ကျွမ်းတာဖြစ်ပြီး မီးလောင်မှုကြောင့် အခန်းတွင်း စတီးပိုက်တွေ မီးကျွမ်းခဲ့ကာ ပျက်စီးဆုံးရှုံးမှု အနည်းငယ်ပဲ ရှိခဲ့တယ်လို့ သိရပါတယ်။
မီးလောင်မှု ၂ ကြိမ်ကို ပြည်ကြီးတံခွန်မြို့နယ် မီးသတ်တပ်ဖွဲ့ယာဉ်တွေ၊ မန္တလေးဗဟိုမီးသတ်တပ်ဖွဲ့နဲ့ အရပ်ဖက်ကယ်ဆယ်ရေးယာဉ်တွေက မီးငြှိမ်းသတ်ယာဉ် ၇ စီး၊ ရေသယ်ယာဉ် ၃ စီးတို့နဲ့ ငြှိမ်းသတ်ခဲ့တာလို့ သိရပြီး လူထိခိုက်မှု မရှိဘူးလို့ သိရပါတယ်။
ဓာတ်ပုံ [ မန္တလေး ဗဟိုမီးသတ် ]
