အခြေခံပညာကျောင်းတွေကို စတင်ဖွင့်လှစ်နေပြီဖြစ်ပေမယ့် ကျောင်းအပ်ချိန်ကို ဇွန်လကုန်အထိ ကျောင်းအပ်နှံနိုင်တယ်လို့ အာဏာသိမ်းစစ်ကောင်စီပညာရေးဌာနက သိရပါတယ်။
၂၀၂၃-၂၄ ပညာသင်နှစ်ရဲ့ အခြေခံပညာကျောင်းတွေရဲ့ကျောင်းအပ်ကာလကို မေ ၂၃ ရက်ကနေ ၃၁ ရက်အထိ သတ်မှတ်ခဲ့ပေမယ့် အကြောင်းအမျိုးမျိုးကြောင့် ကျောင်းမအပ်နိုင်သူတွေအတွက် ဇွန်လကုန်အထိ ကျောင်းအပ်နှံနိုင်တယ်လို့ စစ်ကောင်စီပညာရေးဌာနက အရာရှိတဦးက ပြောပါတယ်။
“ဒီနှစ်မှာ ကျောင်းအပ်ဖို့ နီးလာတဲ့အချိန် မုန်တိုင်းကဝင်လာတယ်။ ကျောင်းတွေပျက်စီးတယ်။ တချို့ကျောင်းသားတွေ ကျောင်းအပ်ချိန်မှာ ကျောင်းမအပ်နိုင်ကြတော့ ကျောင်းအပ်နိုင်ဖို့ အဆင်ပြေအောင် လုပ်ပေးထားတဲ့သဘောပါ။”
စစ်ကောင်စီပညာရေးဌာနလက်အောက်က အခြေခံပညာကျောင်းတွေမှာ ဇွန် ၁ ရက်နေ့အထိ ကျောင်းသားကျောင်းသူ ၆ သန်းကျော် အပ်နှံတက်ရောက်နေခဲ့ပါတယ်။
စစ်ကောင်စီဟာ ဒီနှစ်မှာ ကျောင်းတက်ရောက်သူတွေ ပိုမိုများပြားလာဖို့ ရည်မှန်းထားခဲ့ပေမယ့် ယခင်နှစ်ကထက် ကျောင်းအပ်နှံမှု နည်းပါးခဲ့ပါတယ်။
