ရန်ကုန်၊ အလုံမြို့နယ်၊ ကြည့်မြင်တိုင်ကမ်းနားလမ်းနဲ့ အောင်ရတနာလမ်းထောင့်ရှိ သခင်မြပန်းခြံအတွင်းမှာ မေ ၂၅ ရက် မနက်ပိုင်းက ဗုံးပေါက်ကွဲသံ ၂ ခါကြားရပြီး စစ်ကောင်စီဘက်က ပန်းခြံအတွင်း လက်လုပ်ဗုံး ၂ လုံး ထပ်မံရှာတွေ့ခဲ့တယ်လို့ မြို့ခံတွေက ပြောပါတယ်။

မနက် ၁၁ နာရီလောက်က ပန်းခြံအတွင်း ရေတမာပင်နဲ့ မြက်ခင်းပေါ်ရှိ အနက်ရောင် ကြွပ်ကြွပ်အိတ်ကနေ ပေါက်ကွဲမှုဖြစ်ပေါ်ခဲ့တာဖြစ်ပြီး ပေါက်ကွဲမှုမဖြစ်ခင်ကတည်းက စစ်ကား ၂ စီးနဲ့ ရဲကား ၁ စီး ကြိုတင်ရောက်ရှိနေတာပါ။

စစ်ကောင်စီက ပန်းခြံ အမှိုက်ပုံးဘေးရှိ ကြွပ်ကြွပ်အိတ်ထဲက PVC ပိုက်တပ် အဝေးထိန်းဗုံး ၁ လုံးနဲ့ လျှပ်စစ်ကား EV အားသွင်းစက်အနီးရှိ ပန်းခြုံထဲမှာ လက်လုပ်ဗုံး ၁ လုံး စုစု‌ပေါင်း မပေါက်ကွဲသေးတဲ့ လက်လုပ်ဗုံး ၂ လုံးကို ရှာတွေ့ခဲ့ပြီး ဖြုတ်ယူသွားတယ်လို့ သိရပါတယ်။

အလုံမြို့ခံတဦးက “ပထမဆုံးပေါက်တဲ့ဗုံးက စစ်တပ်ရောက်ပြီးမှ ပေါက်တာ။ အကုန်လုံးကို ထွက်ခိုင်းထားပြီး လိုက်ရှာကြတော့ အားသွင်းစက်နားက တလုံးတွေ့တယ်။ နေ့ခင်း ၁ နာရီခွဲကျော်လောက်မှ ပန်းခြံပြန်ဖွင့်ပေးတယ်။ ဒဏ်ရာရတာမျိုးတော့ မတွေ့မိဘူး” လို့ ပြောပါတယ်။

မေ ၂၄ ရက် မနက်ပိုင်းကလည်း ဒေါပုံမြို့နယ်ရှိ ခရိုင်ဥပဒေရုံးရှေ့မှာ ဖရဲသီးထဲမြှုပ်ထားတဲ့ လက်လုပ်ဗုံး ၁ လုံးနဲ့ ခြံစည်းရိုးအနားရှိ ဗုံး ၁ လုံးကို စစ်ကောင်စီဘက်က တွေ့ရှိ သိမ်းဆည်းသွားပါတယ်။

အလုံမြို့နယ်၊ သခင်မြပန်းခြံ၊ သန့်စင်ခန်းမှာ ပြီးခဲ့တဲ့ ၂၀၂၂ ခုနှစ် နိုဝင်ဘာလ ၂၀ ရက်၊ နေ့လယ်ပိုင်းက ဗုံးပေါက်ကွဲမှုဖြစ်ပွားခဲ့တာကြောင့် အမျိုးသား ၁ ဦး စိုးရိမ်ရ ထိခိုက်ဒဏ်ရာ ရရှိခဲ့တယ်လို့ သိရပါတယ်။