စစ်ကိုင်းတိုင်း၊ မုံရွာမြို့၊ ပွဲစားတန်းလမ်းက ငွေဇာလှိုင်းအလှကုန်ဆိုင်ကို မတ် ၂၂ ရက် မွန်းတည့် ၁၂ နာရီက ဓားပြတိုက်ခဲ့တာကြောင့် ကျပ်သိန်း ၇၀၀ ကျော်နဲ့ ရွှေထည်တချို့ကို ပါသွားတယ်လို့ မြို့ခံတွေက ပြောပါတယ်။
အလုပ်သမားတွေ နေ့လယ်ထမင်းစားချိန် အမည်မသိ လူတစုက ဆိုင်ကယ် ၃ စီးနဲ့ ဈေးဝယ် ဟန်ဆောင်ပြီး အနုကြမ်းစီး ဓားပြတိုက်ခဲ့တာလို့ သိရပါတယ်။
အဲ့ဒီဆိုင်နား နေထိုင်သူ တဦးက "အမျိုးသမီးတစ်ယောက်ပါတယ်။ သူက အရင် ဈေးဝယ်မယ့် ပုံစံမျိုး နဲ့ ဆိုင်ထဲဝင်လာပြီး ပစ္စည်းတွေ အမျိုးမျိုးပြခိုင်းတာ။ ခဏနေတော့ အမျိုးသား ၄ ဦး ဝင်လာပြီး ဝန်ထမ်း ၂ ယောက်ကို သေနတ်နဲ့ ထောက်ပြီး ပိုင်ရှင်ဆီက ပိုက်ဆံတွေ အကုန်တောင်းပြီး ထွက်သွားတယ်"လို့ ပြောပါတယ်။
ပိုင်ရှင်ထံက ကျပ်သိန်း ၇၀၀ ကျော်နဲ့ ဆိုင်ဝန်ထမ်းတွေ ဝတ်ဆင်ထားတဲ့ လက်ဝတ်ရတနေတွေကိုပါ ချွတ်ယူသွားတယ်လို့ သိရပါတယ်။
ဓားပြတိုက်သူတွေမှာ သေနတ်အတို ၁ လက်၊ အရှည် ၁ လက်နဲ့ အမျိုးသား ၄ ဦးနဲ့ အမျိုးသမီး ၁ ဦး တို့ပါဝင်ကာ လမ်းမကြီးအတိုင်း ဆိုင်ကယ်နဲ့ မောင်းနှင်ထွက်ပြေးသွားတယ်လို့ သိရပါတယ်။
စစ်တပ်အာဏာသိမ်းပြီးနောက် မုံရွာမြို့က ရွှေဆိုင်တွေ မကြာခဏ ဓားပြတိုက် ခံနေရပြီး ဖမ်းဆီး နိုင်ခြင်း မရှိဘူးလို့ သိရပါတယ်။
အခုနှစ်အတွင်း မုံရွာမြို့ရွှေဆိုင်တွေ ဓားပြတိုက်ခံရမှု ၈ ကြိမ် အထိရှိခဲ့ပြီး ဇန်နဝါရီလက ကုန်စုံဆိုင် ဓားပြတိုက်ခံရမှုမှာ ဆိုင်ရှင်ဖြစ်သူ ဓားနဲ့ ထိုးခံရပြီး သေဆုံးခဲ့ပါတယ်။
