ရခိုင်ပြည်နယ် စစ်တွေမြို့၊ နာဇီရွာရပ်ကွက်ရှိ စီးကရက်မျိုးစုံ သိုလှောင်ထားတဲ့ ဂိုထောင်တခု မေ ၂၁ ရက် မွန်းလွဲ ၂ နာရီခွဲက မီးလောင်မှု ဖြစ်ပွားခဲ့တယ်လို့ ရပ်ကွက်နေသူတွေက ပြောပါတယ်။
စစ်တွေမြို့ မီးသတ်ဦးစီးဌာနက မီးသတ်ကား ၅ စီးနဲ့ လာရောက် မီးငြှိမ်းနေပေမဲ့ အခု ၃ နာရီ ၄၅ အထိ မီးငြိမ်းသတ်နိုင်ခြင်း မရှိသေးပါဘူး။
နာဇီရွာဒေသခံတဦးက "အလွန်အန္တရယ်များပါတယ်။ စီးကရက်ဖာတွေ ထောင်လိုက်သောင်းလိုက် သိုလှောင်ထားတာ။ အိမ်တွေက တိုက်အိမ်တွေ ဖြစ်နေလို့။ ဟိုဘက်မှာလည်း ဆီပေပါတွေ သိုလှောင်ထားတဲ့ ဂုံတင်(ဂိုထောင်) ရှိနေတာ" လို့ ပြောပါတယ်။
မီးလောင်ရတဲ့ အကြောင်းရင်းကို လက်တလော မသိရှိရသေးပါဘူး။
၂၀၂၂ ခုနှစ် မီးလောင်ဆုံးရှုံးမှုမှာ စစ်တွေမြို့နယ်နဲ့ မောင်တောမြို့နယ်အများဆုံးဖြစ်ပြီး စုစုပေါင်းအကြိမ်ရေ ၇၃ ကြိမ်ရှိကာ အဆောက်အအုံ ၄၇၃ ကြိမ်၊ ဂိုထောင် ၄ လုံး၊ သေဆုံးသူ ၁ ဦး၊ ဒဏ်ရာရသူ ၆ ဦးနဲ့ မီးဘေးဒုက္ခသည် ၁၈၀၀ ကျော်ထိ ရှိခဲ့တယ်လို့ ရခိုင်ပြည်နယ် မီးသတ်ဦးစီးဌာနရဲ့ အချက်လက်တွေအရ သိရပါတယ်။
