မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) စစ်ကြောင်း-၃၊ ချင်းတွင်းဒေသတပ်ရင်းမှာ တပ်တွင်းရိက္ခာဖူလုံရေးအတွက် အခုနှစ်နွေရာသီမှာ နွေစပါး ၂ ဧက စတင်စိုက်ပျိုးပါတယ်။

စိုက်ပျိုးထားတဲ့စပါးမှာ ရက် ၉၀ စပါးဖြစ်ပြီး ကုန်ကျစရိတ်အနေနဲ့ ၁ ဧက ၅ သိန်းဝန်းကျင် ရှိပါတယ်။ ပြည်သူတွေရဲ့ လှူဒါန်းကူညီမှုတွေအပြင် မိမိတို့တပ်ရင်း တပ်ဖွဲ့တွေရဲ့ လုပ်အားစိုက်ထုတ်မှုတွေနဲ့ တပ်ရိက္ခာဖူလုံရေးအတွက် စီစဥ်ဆောင်ရွက်ထားပါတယ်လို့ ABSDF (ချင်းတွင်းဒေသ) တာဝန်ရှိသူထံက သိရပါတယ်။

ABSDF စစ်ကြောင်း-၃ (ချင်းတွင်းဒေသ) တပ်ရင်းမှူး ရဲဘော်ဇေယျက “လက်ရှိအခြေအနေအရ တပ်တွင်းရိက္ခာက အဆင်ပြေတယ်။ ပြည်သူလူထုရဲ့ ထောက်ပံ့မှုတွေနဲ့ ရပ်တည်တာဖြစ်ပေမဲ့ အချိန်ကြာလာတာနဲ့အမျှ ပြည်သူတွေက ငွေကြေးဖောင်းပွတာတွေ၊ ကုန်စျေးနှုန်းကြီးမြင့်တာတွေ ကြုံလာနိုင်တယ်။ အဲ့ဒီအခက်ခဲကြုံလာရင် ပြည်သူတွေ ဝန်ထုပ်ဝန်ပိုးမဖြစ်အောင် တတ်နိုင်တဲ့ အတိုင်းအတာထဲကနေ ဆောင်ရွက်တာဖြစ်ပါတယ်” လို့ ဒီဗွီဘီကို ပြောပါတယ်။

ABSDF စစ်ကြောင်း-၃ အတွင်းရှိ တပ်ရင်းများက တခြားရိက္ခာတွေဖြစ်တဲ့ မြေပဲ၊ နေကြာနဲ့ သီးနှံမျိုးစုံကို စိုက်ပျိုးပြီး တပ်တွင်းရိက္ခာဖူလုံရေးအတွက် ဆောင်ရွက်နေတယ်လို့လည်း သိရပါတယ်။