တကောင်းမြို့ ညောင်ကုန်းရွာသား ၄၀ ကျော်ကို စစ်တပ် ဖမ်းဆီး
DVB
·
May 7, 2023
မန္တလေးတိုင်း၊ တကောင်းမြို့၊ ညောင်ကုန်းကျေးရွာသား ၄၀ ကျော်ကို မေ ၆ ရက် မနက်မှာ စစ်ကောင်စီတပ်က ဖမ်းဆီးထားတယ်လို့ ဒေသခံတွေက ပြောပါတယ်။
စစ်ကောင်စီတယ်လီဂရမ်မှာတော့ မန္တလေး-မြစ်ကြီးနားလမ်းအနီး မီတာ ၁၅၀၀ ဝန်းကျင်ကို စစ်ကြောင်းထိုးမယ်လို့ အသိပေးထားပြီးနောက် စစ်ကြောင်းထိုးလာတာလို့ ဒေသခံတဦးက ပြောပါတယ်။
"ကားလမ်းနားက လူတွေကို ရှောင်ခိုင်းတယ်။ ခဏကြာတော့ စစ်ကြောင်းထိုးတာပဲ။ ပြည်သူ့ ကာကွယ်ရေးအဖွဲ့တွေနဲ့ ထိတွေ့မှုဖြစ်ထားတယ်။ အတိအကျတော့ မသိရသေးဘူး”
မန္တလေး-မြစ်ကြီးနားလမ်းတလျောက်ကို နယ်မြေရှင်းလင်း စစ်ကြောင်း ထိုးလာပြီးနောက် စစ်တပ် က ညောင်ကုန်းရွာသား ၄၀ ကျော်ကို ဖမ်းဆီးသွားပြီး ဖမ်းဆီးရသူအများစုဟာ အမျိုးသားတွေ ဖြစ်တယ်လို့ သိရပါတယ်။
ညောင်ကုန်းကျေးရွာကို မတ် ၂၈ ရက်ကလည်း စစ်ကြောင်းထိုး မီးရှို့တာကြောင့် နေအိမ် ၂၀ မီးလောင် ပျက်စီးခဲ့တယ်လို့ သိရပါတယ်။
