တရုတ်နိုင်ငံခြားရေးဝန်ကြီးသည် သုံးရက်ကြာ ခရီးစဉ်အဖြစ် နေပြည်တော်သို့ ရောက်ရှိလာပြီး မင်းအောင်လှိုင်နှင့် အင်္ဂါနေ့တွင် တွေ့ဆုံခဲ့သည်။

တရုတ်သည် “နိုင်ငံတကာစင်မြင့်တွင် မြန်မာဘက်မှ ရပ်တည်နေကြောင်း” ပြောခဲ့သည်ဟု မြန်မာဘက်မှ ထုတ်ပြန်သော ကြေညာချက်တွင် ပါရှိလာသည်။ မြန်မာသည် ထိုခရီးစဉ်အပေါ် လုံးဝ အလွတ်မပေးပဲ ဗွေဆော်ဦး အခွင့်ကောင်းယူလိုက်ပြီ ဖြစ်သည်၊ သို့သော် ထိုကြေညာချက်ကြောင့် တရုတ်အဖို့ မျက်နှာပျက်စရာ ဖြစ်ခဲ့ရသည်ကိုလည်း ထည့်သွင်းစဉ်းစားမိဟန် မတူပေ။ ၎င်းတို့အဖို့ သူများ နှာခေါင်းပေါက်နှင့် အသက်ရှူနေကြရသည့်အဖြစ်ကို ရှက်ရကောင်းမှန်း မသိတော့ဘဲ ဂုဏ်ယူဝင့်ကြွားစရာအဖြစ် ဝါဒဖြန့်နေကြရပြီလည်း ဖြစ်သည်။

ချင်ဂန်းသည် အာဏာသိမ်းပြီးနောက် တရုတ်ဘက်မှ ရောက်ရှိလာသော အဆင့်မြင့်ဆုံး အစိုးရ အရာရှိကြီး တဦးလည်း ဖြစ်သည်။

နှစ်နိုင်ငံအကြား သံတမန် ဆက်ဆံရေး၊ မိတ်ဆွေ ပီသစွာ ပူးပေါင်းဆောင်ရွက်ရေး၊ မြန်မာပြည် အခြေအနေ၊ နယ်ခြားကုန်သွယ်ရေး၊ ရင်းနှီးမြှုပ်နှံမှု၊ စွမ်းအင်နှင့် လျှပ်စစ်ကဏ္ဍတွင် ပူးပေါင်း ဆောင်ရွက်ရေးများ ဆွေးနွေးခဲ့သည်ဟု အာဏာသိမ်းအဖွဲ့၏ ကြေညာချက်က ဆိုသည်။

"Talkers are usually more articulate than doers, since talk is their specialty." ဟူသော အမေရိကန် လူမှု-စီးပွား ပညာရှင် သောမတ်စ်ဆိုဝဲလ်၏ စကားအတိုင်း ထိုသို့ ချိုသာသော သံတမန်ရေး စကားလုံးများ diplomatic niceties များ နောက်ကွယ်တွင် ချင်ဂန်း၏ အခြားရည်ရွယ်ချက်များကို သုံးသပ်ရမည်သာ ဖြစ်သည်။ သမ္မတဟောင်း ဦးသိန်းစိန်၊ အာဏာရှင်ဟောင်း ဦးသန်းရွှေ တို့နှင့်ပါ တွေ့ဆုံမည်ဟု သတင်းများ ထွက်ပေါ်နေသည်။

ထိုသတင်းကို အမှန်ဟု ယူဆရပါက မင်းအောင်လှိုင်အား ဒီအတိုင်း လွှတ်ပေး၍ မဖြစ်တော့ ထိန်းကျောင်းပေးမှ ရမည်၊ ဆွေးနွေးပွဲလမ်းကြောင်းဆီ ဦးတည်ရန်၊ သို့မဟုတ်က ဖြစ်နိုင်လျှင် မင်းအောင်လှိုင်နှင့် ဆက်၍လက်တွဲသွားဖို့ မဖြစ်နိုင်တော့ဟု ပြောဆိုသွားမည် ဖြစ်သည်၊ မြန်မာအပေါ် တရုတ်၏ ရပ်တည်ချက်ကို အာရှ-အာဖရိက-လက်တင် အမေရိက နိုင်ငံငယ်လေးများက စောင့်ကြည့်သုံးသပ်နေမည် ဆိုသည်ကိုလည်း သိထားပြီ ဖြစ်သည်။ လက်ရှိ အမေရိကန်နှင့် မဟာဗျူဟာအရ ယှဉ်ပြိုင်မှု ပြင်းထန်လာချိန်တွင် တရုတ်သည် နိုင်ငံငယ်များ သူ့ဘက်ပါလာအောင် ဆွဲဆောင်နေရသဖြင့် မြန်မာကြောင့် collateral damage ဘေးထွက် ထိခိုက်ပွန်းရှ မခံနိုင် ဖြစ်လာနေသည်။ ချင်ဂန်းသည် နိုင်ငံတော်အတိုင်ပင်ခံနှင့် တွေ့ဆုံခွင့်ရရန်လည်း လုံးပန်းဖို့ရှိနေသည်၊ စစ်အာဏာသိမ်းအဖွဲ့ကလည်း ၎င်းတို့အား လူလူသူသူ ဆက်ဆံလာသည်ကို သိတတ်သည့်အနေဖြင့် ခွင့်ပေးချင်လည်း ပေးနိုင်ပေသည်။ ဤသည်က တရုတ်အဖို့ လုပ်ချင်က လုပ်သင့်လုပ်ထိုက်ဆုံး ဖြစ်နေသည်။

တရုတ်သည် မြန်မာအရေးအပေါ် ပြတ်သားစွာ ပြောဆိုနိုင်ရန် ပဏမ သဘောထား တီးခေါက်သည့် အနေဖြင့် နိုင်ငံတကာဆက်ဆံရေး ညွှန်ကြားရေးမှူးချုပ် ပန်ရှုဘင်အား အရင်စေလွှတ်ခဲ့ခြင်း ဖြစ်ပုံရပြီး၊ ကုလသမဂ္ဂ အထူးသံတမန် နိုလင်းဟေဇာနှင့်လည်း ကနဦး တွေ့ဆုံခဲ့သည်ဟု ယူဆရသည်။

သို့‌သော် တရုတ်သည် အာဏာသိမ်းအဖွဲ့အား ထောက်ခံနေမှု ရပ်ဆိုင်းသွားဖို့မရှိဘဲ ဆက်လက် ထောက်ခံသွားနိုင်ရေးအတွက် လူကြားကောင်းမည့် ပုံစံမျိုး ဖန်တီးလိုပုံရသည်။ 

ဝါရှင်တန်ရှိ တရုတ်သံရုံး၏ ကြေညာချက်တွင်မူ ၂၀၂၀ ဇန်နဝါရီလတွင် လာရောက်ခဲ့သော သမ္မတ ရှီကျင့်ပင်၏ ခရီးစဉ်အတွင်း သဘောတူခဲ့သော နယ်ပယ်များတွင် ပူးပေါင်းဆောင်ရွက်မှုများ တိုးမြှင့်ရေးအတွက် ဖြစ်သည်ဟု နိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ်၏ မှတ်ချက်အား ကိုးကား ဖော်ပြခဲ့သည်။

ချင်ဂန်းသည် နယူးဒေလီတွင် ပြုလုပ်မည့် ရှန်ဟိုင်း ပူးပေါင်းဆောင်ရွက်ရေးအဖွဲ့ နိုင်ငံခြားရေး ဝန်ကြီးများ အစည်းအဝေးသို့ တက်ရောက်ရန် အသွားတွင် နေပြည်တော်သို့ ခရီးတထောက် ဝင်ရောက်လာခြင်းလည်း ဖြစ်သည်။

ဂျပန်တို့ အဘယ်ကြောင့် ဒေါသအကြီးအကျယ် ထွက်လာရသနည်း

အဆိုပါ သတင်းခေါင်းစဉ်ဖြင့် ဂျာမန်သတင်းဌာန Deutsche Wells (DW) ၏ သတင်းတွင် ဂျပန်သည် ၎င်းတို့ လှူဒါန်းထားသော ရေယာဉ်များကို ရခိုင်တပ်တော်အား တိုက်ခိုက်နိုင်ရန် စစ်သားများနှင့် စစ်လက်နက်ပစ္စည်းများ သယ်ယူပို့ဆောင်ရေးတွင် သုံးနေသည် ဆိုသော လူ့အခွင့်အရေးစောင့်ကြည့်အဖွဲ့၏ သတင်းအပေါ် မကြုံဖူးအောင် ဒေါသထွက်လာပြီး အာဏာသိမ်းအဖွဲ့အား တရားဝင် ကန့်ကွက်စာ ပို့ခဲ့ရုံမက ဂျပန် နိုင်ငံခြားရေးဝန်ကြီးဌာနမှ တိုကျိုတွင် သတင်းစာရှင်းလင်းပွဲ ခေါ်ယူပြီး ထုတ်ဖော် ပြောဆိုခဲ့သည်။

အာဏာသိမ်းအဖွဲ့မှ ထိုလုပ်ရပ်အတွက် ချက်ချင်းလို တောင်းပန်ခဲ့ပြီး နောက်နောင် ထိုသို့ မဖြစ်အောင် ဆင်ခြင်ပါမည်ဟု ကတိပေးခဲ့ရသည်။

ဂျပန်သည် အာဏာသိမ်းအဖွဲ့နှင့် ဆက်ဆံရေး ပြတ်တောက်သွားခြင်း မရှိအောင် ထိန်းသိမ်းထားသည့် မူဝါဒကို ကျင့်သုံးနေသော်လည်း အရပ်သား ၃,၄၀၀ ခန့် သတ်ဖြတ်ခဲ့မှုများတွင် ၎င်းတို့ သင်္ဘောများ သုံးစွဲနေသည့်အဖြစ်ကို မည်သို့မျှ အစာမကြေနိုင် ဖြစ်လာရသည်။ 

ဂျပန်သည်လည်း ကမ္ဘာ့အလယ်တွင် နာမည်ဆိုးနှင့် ကျော်ကြားနေ‌သော စစ်အာဏာသိမ်းအဖွဲ့နှင့် ရွှံ့ပုပ် အစင်မခံရအောင် သတိကြီးစွာထားပြီး ဆက်ဆံနေရပြန်သည်။

အမည်မဖော်လိုသော ဂျပန်အစိုးရ အရာရှိတဦးကမူ “မြန်မာနှင့် ဆက်သွယ်ရေးလမ်းကြောင်း ဖွင့်လှစ်ထားနိုင်ရေးသည် ဂျပန်အစိုးရအတွက် လွန်စွာအရေးကြီးနေပြီး တချိန်တည်းမှာပင် ၎င်းတို့၏ ဒီမိုကရေစီမကျသော လုပ်ရပ်များကို ဝေဖန် ရှုတ်ချနေသည်” ဟု ထုတ်ဖော် ပြောဆိုခဲ့သည်။

သို့သော် ယခုအခါတွင် တိုကျို၏ သဘောထားသည် သိသာထင်ရှားစွာ ပြောင်းလဲလာနေပြီ ဖြစ်သည်ဟု ၎င်းက ဆိုသည်၊ ဂျပန်အစိုးရနှင့် နိုင်ငံရေးသမားများက မျှော်လင့်ထားသလို မြန်မာ စစ်တပ်အပေါ် ဩဇာညောင်းနိုင်သည့်အဖြစ်အထိ တက်လှမ်းမလာခဲ့ ဆိုသည်ကို သဘောပေါက်လာကြသောကြောင့်ဟု ဆိုသည်။

စစ်အာဏာသိမ်းအဖွဲ့၏ လုပ်ရပ်များ ပြောင်းလဲခြင်းမရှိက ဂျပန်အဖို့ ၎င်းတို့ လက်ရှိမူဝါဒအား ဆက်လက် ကျင့်သုံးနေခြင်းသည် လုပ်သင့်လုပ်ထိုက်ကြောင်း ပြောနိုင်ဖို့ ခက်ခဲသည်ထက် ခက်ခဲလာရ၍ အခြားနိုင်ငံများနည်းတူ ပြင်းထန်သည့် အရေးယူ ပိတ်ဆို့ ဒဏ်ခတ်မှုများတွင် ပါဝင်ရတော့မည်သာ ဖြစ်သည်ဟု အဆိုပါအရာရှိက ပြောကြောင်း DW သတင်းတွင် ဖော်ပြထားသည်။ 

ဤသည်ကို ကြည့်က တရုတ်နှင့် ဂျပန်တို့သည် ၎င်းတို့နှင့် ဒီအတိုင်း မျက်စိမှိတ် ဆက်ဆံနေမည် ဆိုက  နိုင်ငံဂုဏ်သိက္ခာ ကျဆင်းလာတော့မည့်အရေး ကို စိုးရိမ်လာကြပြီ ဖြစ်သည်။

မြန်မာအရေးအပေါ် တရုတ် လက်ရှိ သဘောထား

ကုလ အထူးသံတမန် နိုလင်းဟေဇာသည် တရုတ် နိုင်ငံခြားရေးဝန်ကြီး ချင်ဂန်းနှင့် ဘီဂျင်းတွင် မေလ ၁ ရက်နေ့တွင် တွေ့ဆုံခဲ့ရာမှ တရုတ်၏ သဘောထား ထွက်ပေါ်လာခြင်း ဖြစ်သည်။

မိမိတို့သည် မြန်မာသည် အိမ်နီးချင်း ဖြစ်သည့်အားလျော်စွာ တည်ငြိမ်ဖွံ့ဖြိုးတိုးတက်သည့် နိုင်ငံ အဖြစ် အခြားနိုင်ငံများထက်ပင် ပို၍မြင်တွေ့လိုကြောင်း၊ သို့သော် မြန်မာ ပြဿနာသည် နောက်ခံ သမိုင်းကြောင်းအရကို ရှုပ်ထွေးနက်နဲနေ၍ အလျင်အမြန် ဖြေရှင်း၍ရနိုင်စရာ မရှိကြောင်း၊ နိုင်ငံတကာ အသိုက်အဝန်းအနေဖြင့် မြန်မာ၏ အချုပ်အခြာအာဏာကို လေးစားသင့်ကြောင်း၊ သက်ဆိုင်သည့် အဖွဲ့အစည်းအားလုံး ကွဲလွဲမှုများကို ပေါင်းကူးဆက်စပ်ပြီး ဆွေးနွေးမှုများဖြင့် နိုင်ငံရေး အသွင်ကူးပြောင်းမှုများအား ဖွဲ့စည်းပုံနှင့် ဥပဒေလုပ်ငန်းဘောင်အတွင်းမှ  ပြန်လည်စတင်ရန် လိုအပ်ကြောင်း။

နိုင်ငံတကာ အသိုက်အဝန်းအနေဖြင့် အာဆီယံ၏ အချက် ငါးချက်ဖြင့် ဖျန်ဖြေပေးနေမှုကို လေးစားသင့်ကြောင်း။

တင်းမာနေမှုများ အရှိန်မြင့်တက်လာပြီး ကူးစက်မလာစေရန် မိမိတို့ နှိုင်းနှိုင်းချိန်ချိန်နှင့် လက်တွေ့ကျကျ ဆောင်ရွက်ရန်လိုကြောင်း၊ ကုလအထူးသံတမန် ဖျန်ဖြေရန် ကြိုးပမ်းနေမှုများကိုလည်း ထောက်ခံရန် လိုလိုလားလားရှိကြောင်း ချင်ဂန်းက ထုတ်ဖော် ပြောဆိုခဲ့သည်။

၎င်း၏စကားကို ထပ်ပြီးဘာသာပြန်ရလျှင် မည်သို့သော သဘောတူညီချက်မျိုးပင် ဖြစ်စေ ငယ်မွေးခြံပေါက် ဖြစ်ပြီး တခါတရံ အားကိုးရလာလျှင် ဗွေဖေါက်တတ်သော စစ်ဗိုလ်ချုပ်များအား ဖယ်ထုတ်ခြင်းကို ထောက်ခံမည် မဟုတ်၊ ထို့အတွက်လည်း ၎င်းတို့အား နိုင်ငံရေးတွင် ဆက်လက် ပါဝင်နိုင်ခွင့်ရှိမည့် ဖွဲ့စည်းပုံကို အာဏာသိမ်းကတည်းက ပါးစပ်ကမချ ပြောလာနေခြင်းပင် ဖြစ်သည်။ အာဆီယံ၏ အချက် ငါးချက်သည်လည်း regime change မပါ၊  အာဆီယံအားလည်း ကန္တေကောစ မလုပ်ချင်၊ မလုပ်ရဲသည့်အတွက် အသာမှိန်း ထောက်ခံနေသည့် သဘောပင် ဖြစ်သည်။ သို့သော် တဖက်က အာဆီယံအား အမေရိကန် အလိုကျ လိုက်မလုပ်ရန် အခါအားလျော်စွာ ဖိအားပေးခြင်း၊ အတွင်းကြိတ် သွေးခွဲခြင်းများ ပြုလုပ်ပေးနေသည်။

ချင်ဂန်း၏ အပြောကို နိုလင်းဟေဇာက ယခုလို တုံ့ပြန်ခဲ့သည်။

မြန်မာ ပြဿနာကို ပြည်သူများ၏ ဆန္ဒကိုသာ ဦးထိပ်ထား ဖြေရှင်းသင့်သည်၊ မြန်မာပြည်သူများ၏ ဆန္ဒကို ‌လေးစားသင့်သည်၊ ဆွေးနွေးပွဲများသည် ဖြစ်ခဲ့သမျှကို ပြောင်းလဲနိုင်စွမ်း မရှိသော်လည်း အနာဂတ်အတွက် အပြောင်းအလဲများ ပြုလုပ်ပေးနိုင်စွမ်း ရှိသည်၊ ကုလသမဂ္ဂသည် ဆွေးနွေး ညှိနှိုင်းမှုများဖြင့်သာ မြန်မာပြည် ငြိမ်းချမ်းရေးနှင့် လုံခြုံမှု ရရှိနိုင်သည် ဆိုသည်ကို ထောက်ခံသည်၊ လူ့အခွင့်အရေးများအား တလေးတစားနှင့် ကာကွယ်စောင့်ရှောက်ပေးခြင်းဖြင့် ဒေသတွင်း တပြေးညီ ဖွံ့ဖြိုးကြွယ်ဝမှုများ ဖော်ဆောင်နိုင်မည်၊ ယင်းနှင့်ပတ်သက်၍ အာဆီယံမှ တက်ကြွစွာ ပါဝင် ဆောင်ရွက်နေမှုအား ကုလမှ ထောက်ခံသည်။

မြန်မာအရေး ဖြေရှင်းရန် တရုတ်၏ ကြိုးပမ်းမှုများကို ကျေးဇူးတင်ကြောင်းနှင့် မြန်မာငြိမ်းချမ်း တည်ငြိမ် ဖွံ့ဖြိုးရေးအတွက် ဆက်လက်ပြီး အပြုသဘော ပါဝင်ဆောင်ရွက်သွားမည်ဟု မျှော်လင့်ကြောင်း ပါရှိသည်။

နိုင်ငံတကာ သဘောထားသည် လက်ရှိအနေအထားအတိုင်းဆိုက မင်းအောင်လှိုင်တို့အား စေ့စပ်ဆွေးနွေးရန် ဖျောင်းဖြနေသည်၊ မင်းအောင်လှိုင်ကလည်း အနိုင်ရနိုးနှင့် ပြောသမျှကို ချွေးသိပ်လွှတ်နေဆဲ ဖြစ်သည်။

ပြည်သူများဘက်ကတော့ ပေးဆပ်ထားခဲ့ရသည်များက များလွန်းနေပြီ ဖြစ်၍ ၎င်းတို့ မည်သို့သော ပုံစံနှင့်မျှ ဆက်၍အုပ်ချုပ်သွားခြင်းကို လက်ခံကြမည် မဟုတ်တော့၊ မည်သူက စေ့စပ်ပေးမည် ဆိုစေဦး၊ အထက်ပါသဘောထားများက ဘောင်ကျော်၍ ထွက်သွားမည် မဟုတ်၊ မည်သူကမျှလည်း မင်းအောင်လှိုင်အား အာဏာကို စွန့်လွှတ်ရန် တိုက်တွန်းကြလိမ့်မည် မဟုတ်။

ထို့အတွက် မိမိတို့ တော်လှန်ရေး  အောင်မြင်မှ ဖြစ်မည်ကို နှလုံးသွင်းထားမှသာ ဖြစ်မည်။

အချို့သော ပြည်သူများက ထိုသို့ သဘောထား ရှိချင်မှ ရှိပေမည်၊ တမျိုးသားလုံး ခံစားနေကြရသည့် ဒုက္ခကြီးအား အေးအေးချမ်းချမ်း ဆွေးနွေးဖြေရှင်းပေးကြပါရန် တောင်းဆိုလာမည့် သူများလည်း မရှိမဟုတ် ရှိလာနေမည်သာ ဖြစ်သည်။

သို့သော် စစ်တပ်တွင် ကတိတည်တတ်သောလူများ မရှိ၊ တရားဥပဒေကိုပင် ၎င်းတို့ အကျိုးအတွက် ဆိုက ပစ်ပယ်ရန် ဝန်မလေး၊ ပြည်သူများ၏ ဆန္ဒနှင့် တောင်းဆိုချက်များကို မည်သည့်အခါမျှ လိုက်လျောပေးခဲ့ကြရိုး ထုံးစံမရှိ၊ ပြည်သူများအနေဖြင့် မည်သည့်အရာက ကောင်းသည်၊ ဆိုးသည်ဟု ဆုံးဖြတ်နိုင်စွမ်း မရှိ၊ သက်ဦးဆံပိုင် အာဏာရှင် လုပ်ရန်သာ စိတ်ကူးနေသူများ ဖြစ်၍ ၎င်းတို့ ပေးသောကတိများကို မည်သို့မျှ ယုံစား၍ မရပြန်၊ မတတ်သာ၍ မာန်လျှော့လိုက်ရခြင်းမျိုးသာ ဖြစ်ပေမည်၊ ထို့အတွက် ရထားသော သဘောတူညီချက်ကို လေးစားလိုက်နာပါမည်ဟု မည်သူမျှ အာမ မခံနိုင်၊ ထိုအခါကျမှ တော်လှန်ရေးကို နောက်တကျော့ ပြန်စဖို့ ဆိုသည်က မဖြစ်နိုင်တော့။ မည်သို့ပင် ဖြစ်လာစေ နိုင်ငံတကာကို အားကိုး၍ မရ ဆိုသည်က မျက်မြင် ကိုယ်တွေ့ပင် ဖြစ်သည်၊ ဤသည်ကို ဆွေးနွေး ဖြေရှင်းလိုသည့် သဘောထား ရှိသူ ပြည်သူများ အခုကတည်းက အထူးထည့်သွင်းစဉ်းစားကြရမည် ဖြစ်သည်။ 

နိုင်ငံတကာက မြန်မာနိုင်ငံအတွင်း လူမဆန်အောင် မကြားဝံ့ မနာသာ ဖြစ်ပျက်နေမှုများကြောင့် အိမ်ရှေ့ပူ အိမ်နောက် မချမ်းသာ ဆိုသလို စေ့စပ်ဆွေးနွေးကြဖို့ ဖျောင်းဖျရန် အရင်ကထက် ပို၍ ကြိုးပမ်းလာနေကြသည်။ သို့သော် မင်းအောင်လှိုင်က သူ၏ လက်သုံးစကား ဖြစ်သော “သူတို့ဘက်က ဒီလိုပဲ ပြောနေကြမှာပေါ့” ဆိုသော စကားဖြင့် တုံ့ပြန်တတ်စမြဲ ဖြစ်သည်၊ ထိုသို့ လာလေလေ သူ့အား အသိအမှတ်ပြုလာကြပြီဟု ပို၍ သွေးနာထင်ရောက်လေလေ ဖြစ်မည့် လူစားမျိုး ဖြစ်သည်။

ကျွန်တော်တို့ သိထားရမည်က မည်သူလာလာ မင်းအောင်လှိုင်အား ရာထူးက ဆင်းပေးဖို့ နားချကြမည် မဟုတ်ဆိုသည်ပင် ဖြစ်သည်။

ပြည်သူတို့၏ ခုခံ တွန်းလှန်စစ် မုချ အောင်ရမည်!!!

လှစိုးဝေ