တနင်္သာရီတိုင်း၊ ကော့သောင်းခရိုင်၊ ခမောက်ကြီးမြို့၊ ရှမ်းကိုးရွာဒေသမှာ စစ်ကောင်စီတပ်က ဖမ်းဆီးထားတဲ့ ကျေးရွာသားတွေကို ပိုက်ဆံပေးပြီး ပြန်လည်ထုတ်ယူခိုင်းနေတယ်လို့ ဒေသခံတွေဆီက သိရပါတယ်။
ပြီးခဲ့တဲ့ ဧပြီ ၂ဝ ရက်နဲ့ ၂၁ နေ့အတွင်း ရှမ်းကိုးရွာဒေသမှာရှိတဲ့ ကျေးရွာနေပြည်သူ ၇ ဦးကို စစ်ကောင်စီတပ်က စစ်ဆေးဖို့ရှိတယ်လို့ဆိုပြီးဖမ်း ဆီးခေါ်ဆောင်သွားခဲ့တာပါ။ ဖမ်းဆီးခံရသူ ၇ ဦးကို စစ်ကောင်စီတပ်က ကျပ်ငွေ ၄ သိန်း အဓမ္မတောင်းကာ ပြန်လည်ထုတ်ယူခိုင်းနေတယ်လို့ သိရပါတယ်။
ဒေသခံတစ်ဦးက"ရွာက ရပ်မိရပ်ဖတွေကနေ ညှိနှိုင်းပြီးတော့ သွားထုတ်တာပါ။ ပိုက်ဆံနဲ့ ပြန်ရွေးပြီး ထုတ်လိုက်ရတယ်။ တယောက်ပဲ ထုတ်လို့ရသေးတယ်။ ကျန်တဲ့သူတွေကိုလည်း ထုတ်ယူဖို့ ပြောယူရတုန်းပဲ” လို့ ပြောပါတယ်။
ဖမ်းဆီးခံထားရတဲ့ ၇ ဦးနက် အမျိုးသားတယောက်ကို ကျေးရွာရှိ ရပ်မိရပ်ဖတွေကနေ သွားရောက်ထုတ်ယူခဲ့ရတယ်လို့ သိရပါတယ်။ ဒေသခံ ၂ ဦးကိုတော့ ကော့သောင်းမြို့ရဲစခန်းမှာ ဆက်လက် ထိန်းသိမ်းထားပြီး ကျန်ရှိတဲ့သူတချို့ကို စစ်ကောင်စီရဲ့ စရဖရုံးမှာလည်း ထိန်းသိမ်းထားပါတယ်။
ခမောက်ကြီးမြို့ ရှမ်းကိုးရွာဒေသကို စစ်ကောင်စီတပ်က မကြာခဏ စစ်ကြောင်းထိုး ဝင်လာပြီး အကြောင်းမဲ့ဖမ်းဆီး စစ်ဆေးနေတဲ့အပြင် ပြီးခဲ့တဲ့ရက်ပိုင်းကလည်း ရွာအနီးရှိ ဥယျာဉ်ခြံအလုပ်သမား ၁ ဦးကိုလည်း စစ်ကောင်စီတပ်က ပစ်သတ်သွားပါတယ်။
