ရှမ်းပြည်နယ်အရှေ့ပိုင်း၊ မိုင်းဖြတ်မြို့နယ်မှာ ဧပြီ ၂၄ ရက် ဒီနေ့မနက်က ဘုရားဖူးထွက်လာတဲ့ အိမ်စီးကားတစ်စီး ချောက်ထဲကို ပြုတ်ကျခဲ့လို့ အမျိုးသမီး ၃ ဦးသေဆုံးပြီး ၃ ဦး ဒဏ်ရာရသွားတယ်လို့ မြို့ခံကယ်ဆယ်ရေးအသင်းက ပြောပါတယ်။
တာချီလိတ်ကနေ မိုင်းယောင်းမြို့ကို ဘုရားဖူးထွက်လာတဲ့ Vigo အဖြူရောင်ကားဟာ နမ့်နန်းကျေးရွာအကျော် ၃ ဖာလုံ၊ မိုင်းယောင်းလမ်းမဘေးရှိ မိုင်းယောင်းအတက်လမ်းမှာ ပြန်လှိမ့်ကျကာ ပေ ၂၀ လောက် အနက်ရှိတဲ့ ချောက်ထဲကို ပြုတ်ကျခဲ့တာပါ။
ကားပေါ်ပါ လူ ၆ ဦးအနက် အသက် ၅၀ ကျော် အမျိုးသမီး ၃ ဦး ဆေးရုံပို့ဆောင်တဲ့လမ်းမှာ သေဆုံးသွားပြီး ယာဉ်မောင်းအမျိုးသားကတော့ ခေါင်းကွဲဒဏ်ရာ၊ အမျိုးသမီး ၁ ဦးမှာ စိုးရိမ်ရဒဏ်ရာနဲ့ အမျိုးသမီး ၁ ဦးမှာ မစိုးရိမ်ရဒဏ်ရာ ရရှိခဲ့ပါတယ်။
မြို့ခံကယ်ဆယ်ရေးအသင်းတာဝန်ရှိသူတဦးက "တာချီလိတ်ကနေ မိုင်းယောင်းဘက်သွားတာ၊ အားလုံး ၆ ယောက်ပါ၊ တောင်အတက်လမ်းမှာ မတက်နိုင်ဘဲ ပြန်ထိုးကျတာ၊ လူနာက ယာဉ်မောင်း ၁ ဦး၊ အမျိုးသမီး ၅ ဦးမှာ ဆေးရုံအရောက်မှာ မ ၃ ဦးသေဆုံး၊ ကျန်အမျိုးသမီး ၁ ဦး စိုးရိမ်ရပါ " လို့ ဆိုပါတယ်။
ကားပေါ်ပါသူတွေဟာ တာချီလိတ်မြို့က ဖြစ်တာကြောင့် သေဆုံးသူ ရုပ်အလောင်းနဲ့ ဒဏ်ရာရရှိသူတွေကို မိုင်းဖြတ်မြို့နယ်ဆေးရုံကနေ တာချီလိတ်ဆေးရုံပို့ဆောင်ပေးခဲ့ပါတယ်။
ပြီးခဲ့တဲ့ ဧပြီ ၂၀ ရက်ကလည်း မိုင်းဖြတ်မြို့နယ် တာကျောက်ရွာအနားမှာ လူ ၂၅ ဦးပါ ခရီးသည်တင်ကား ချောင်းထဲပြုတ်ကျတာကြောင့် ၃ ဦးသေဆုံး၊ ၂၂ ဦး ထိခိုက်ဒဏ်ရာရရှိခဲ့တယ်။
