ကျောက်ပန်းတောင်းတွင် ရပ်ကွက်အုပ်ချုပ်ရေးမှူးဟောင်း သေနတ်ဖြင့် ပစ်ခံရ
DVB
·
April 22, 2023
မန္တလေးတိုင်း ကျောက်ပန်းတောင်းမြို့မှာ ဧပြီ ၂၁ မနက်ပိုင်းက ရပ်ကွက်အုပ်ချုပ်ရေးမှူးဟောင်း တယောက် သေနတ်နဲ့ ပစ်ခတ်ခံခဲ့ရတယ်လို့ ဒေသခံတွေက ပြောပါတယ်။
ရပ်ကွက်အုပ်ချုပ်ရေးမှူးဟောင်းကို တမ္မဝတီရပ်ကွက်မှာ အမည်မသိ သေနတ်သမားအဖွဲ့က သေနတ်ဖြင့် ငါးချက်ထက် မနည်း ပစ်ခတ်ခဲ့တဲ့အတွက် ဒဏ်ရာ ပြင်းထန်စွာ ရရှိခဲ့တယ်လို့ သိရ ပါတယ်။
ကျောက်ပန်းတောင်းဒေသခံ အမျိုးသမီး တဦးက "မနက် ၁၀ နာရီလောက်က တမ္မဝတီရပ်ကွက် မူလတန်းကျောင်းနားမှာ ဈေးက ပြန်လာတာထင်တယ် အပစ်ခံရတာ။ အားလုံးပေါင်း ကျည် ဒဏ်ရာ ငါးချက်လောက်ရှိတယ်။ မျက်နှာနဲ့ ရင်ဘတ်မှာ ကျည်ဒဏ်ရာတွေရသွားတယ်။ စိုးရိမ်ရတယ်။ ဘယ်သူပစ်တာလဲ ဆိုတာတော့ မသိရဘူး "လို့ ဆိုပါတယ်။
ရပ်ကွက်အုပ်ချုပ်ရေးမှူးဟောင်း ဦးညွန့်ဝေကို ကျောက်ပန်းတောင်းမြို့နယ်ဆေးရုံမှ တဆင့် မိတ္ထီလာ စစ်ဆေးရုံကို ပို့ဆောင်ဆေးကုသနေကြောင်း သိရပါတယ်။
