ဘင်္ဂလားဒေ့ရှ်နိုင်ငံ၊ ကော့ဇ်ဘဇားခရိုင်၊ တက္ကနာ့ဖ်မြို့နယ်ရှိ လေဒါ ရိုဟင်ဂျာဒုက္ခသည်စခန်း ၂ ခုမှာ ဧပြီ ၁၈ ရက် ည ၁၂ နာရီလောက်က မီးလောင်မှုဖြစ်ပွားတာကြောင့် နေအိမ် ၃၀ နီးပါး ပျက်စီးဆုံးရှုံးခဲ့ပါတယ်။
ရိုဟင်ဂျာဒုက္ခသည်တွေ ဝိုင်းဝန်းငြှိမ်းသတ်လိုက်တာကြောင့် မီးငြိမ်းသွားခဲ့ပြီး မီးလောင်ကျွမ်းမှုကြောင့် လေဒါဒုက္ခသည်စခန်း အမှတ် ၂၄ မှာ နေအိမ်အလုံး ၃၀ နီးပါးနဲ့ အမှတ် ၂၆ မှာ နေအိမ် ၁ လုံး ပျက်စီးဆုံးရှုံးသွားတယ်လို့ ဒုက္ခသည်တွေက ပြောပါတယ်။
လောလောဆယ်မှာ မီးလောင်မှုနဲ့ပတ်သက်ပြီး ဘာကြောင့် မီးလောင်ကျွမ်းမှုဖြစ်တယ် ဆိုတာကို အသေးစိတ် မသိရသေးပါဘူး။
ပြီးခဲ့တဲ့ မတ်လ ၅ ရက်ကလည်း ကော့ဇ်ဘဇားခရိုင်ရှိ ရိုဟင်ဂျာဒုက္ခသည်စခန်းမှာ မီးလောင်ပြီး လူနေအိမ် ၂,၈၀၀၊ ဆေးရုံနဲ့ ပညာသင်ကြားရေးစင်တာ အပါအဝင် အဆောက်အဦ ၉၀ ကျော် မီးလောင်ပျက်စီးခဲ့ကာ လူပေါင်း ၁၂,၀၀၀ ကျော် အိုးမဲ့အိမ်မဲ့ ဖြစ်ခဲ့ကြရပါတယ်။
