စစ်ကိုင်းတိုင်း၊ မုံရွာမြို့မှာ မတ် ၃၁ ရက် မွန်းလွဲပိုင်းက စစ်တပ် စစ်ဆေးရေးဂိတ်တခု တိုက်ခိုက်ခံရပြီး စစ်ကောင်စီတပ်ဖွဲ့ဝင် ၃ ယောက် သေဆုံးခဲ့တယ်လို့ မုံရွာ ခရိုင်တပ်ရင်း(၄)၊ တပ်ခွဲ(၃) Night King PDF က သိရပါတယ်။
မြဝတီရပ်ကွက်ရုံး စစ်ဆေးရေးဂိတ်ကို မနေ့ မွန်းလွဲ ၂ နာရီလောက်မှာ ဒေသကာကွယ်ရေး ပူးပေါင်းတပ်က လက်နက်ကြီး၊ လက်နက်ငယ်တွေနဲ့ အလစ်အငိုက်တိုက်ခိုက်ခဲ့ကြတာလို့ မုံရွာ Night King PDF ရဲ့ ပြန်ကြားရေးတာဝန်ခံက ပြောပါတယ်။
အဲဒီတိုက်ခိုက်မှုအတွင်း စစ်တပ်က ၃ ယောက် သေဆုံးခဲ့ပြီး မုံရွာမြို့က ပြည်သူလူထုတွေ အထိတ်တလန့်ဖြစ်ခဲ့တဲ့အတွက် တောင်းပန်တယ်လို့ ဆိုပါတယ်။
အဲဒီတိုက်ခိုက်မှုကို ပြည်သူ့ကာကွယ်ရေးတပ်ဖွဲ ၁၀ ဖွဲ့ ပူးပေါင်းတိုက်ခိုက်ခဲ့တာဖြစ်ပြီး ရဲဘော်တွေ ထိခိုက်မှုမရှိ ဆုတ်ခွာနိုင်ခဲ့ကြတယ်လို့ ဆိုပါတယ်။
စစ်ကိုင်းတိုင်း ဆားလင်းကြီးမြို့နယ်မှာလည်း မတ် ၂၉ ရက်နေ့က ဒဏ်ရာရ စစ်ကောင်စီတပ်သားတွေ လာသယ်တဲ့ စက်လှေ ၂ စီး ရေမြှုပ်မိုင်းနဲ့ တိုက်ခိုက်ခံရပြီး ၅ ယောက်ထက်မနည်း ဒဏ်ရာရရှိခဲ့တယ်လို့ Fighter 9 Force-ဆားလင်းကြီး တပ်ဖွဲ့ကနေ သိရပါတယ်။
ဆားလင်းကြီးမြို့ကနေ လက်နက်ခဲယမ်းသယ်ယူရန်နဲ့ လူနာတွေကို သယ်ယူဖို့ မုံရွာမြို့ဘက်ကို စက်လှေ ၂ စီးနဲ့ ထွက်လာတဲ့ စစ်ကောင်စီစစ်ကြောင်းကို မတ် ၂၉ ရက်နေ့ ညနေ ၄ နာရီလောက်က လက်ပတောင်းရွာနားမှာ ရေမြှုပ်မိုင်း ၃ လုံးနဲ့ တိုက်ခိုက်ခဲ့တယ်လို့ Fighter 9 Force-ဆားလင်းကြီးရဲ့ ပြန်ကြားရေးတာဝန်ခံက ပြောပါတယ်။
အဲဒီ စက်လှေ ၂ စီးအနက် ၁ စီးကို ထိမှန်ပြီး စက်လှေမောင်းသူ အပါဝင် စစ်ကောင်စီဘက်က ၅ ယောက်ထက်မန ည်း ဒဏ်ရာရရှိခဲ့တာကြောင့် မုံရွာခန်းမမှာ ဆေးဝါးကုသမှုခံယူနေရတယ်လို့ ဆိုပါတယ်။
အဲဒီတိုက်ခိုက်မှုပြီးမှာ စစ်ကောင်စီဘက်က တရစပ် ပြန်လည်ပစ်ခတ်ခဲ့ပေမယ့် ပြည်သူကာကွယ်ရေးတပ်မှ ရဲဘော်တွေ ထိခိုက်မှုမရှိဘဲ ဆုတ်ခွာနိုင်ခဲ့ကြတယ်လို့ ပြောပါတယ်။
မုံရွာနဲ့ ဆားလင်းကြီး တိုက်ခိုက်မှုတွေမှာ စစ်ကောင်စီဘက်က ထိခိုက်သေဆုံးတဲ့အခြေနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။
