တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ်၊ မြိတ်-မောတောင်ကားလမ်းက ချောင်းနစ်ပေါက်ကျေးရွာရှိ မြစ်ကူးတံတားအနီးမှာ စစ်ကောင်စီတပ်နဲ့ ပြည်သူ့ကာကွယ်ရေး ပူးပေါင်းတပ်ဖွဲ့တို့ ၂ ရက်ဆက် တိုက်ပွဲဖြစ်ပွားခဲ့တယ်လို့ ကော်သူလေးအာမီ ကျားကြီးပြောက်ကျားတပ်ဖွဲ့က ထုတ်ပြန်ပါတယ်။
ပြီးခဲ့တဲ့ မတ် ၂၈ ရက် ညနေ ၄ နာရီလောက်မှာ စစ်ကြောင်းထိုးလာတဲ့ စစ်ကောင်စီအင်အား ၉ဝ ကျော်ပါ တပ်ရင်း ၄ ရင်းနဲ့ ပြည်သူ့ကာကွယ်ရေး ပူးပေါင်းတပ်ဖွဲ့တို့ တိုက်ပွဲဖြစ်ပွားခဲ့သလို မတ် ၂၉ ရက် မနက် ၇ နာရီလောက်မှာလည်း တိုက်ပွဲ ထပ်မံဖြစ်ပွားခဲ့ပြီး စုစုပေါင်း ၇ နာရီနီးပါးကြာ တိုက်ပွဲဖြစ်ခဲ့တယ်လို့ ဆိုပါတယ်။
တိုက်ပွဲမှာ စစ်ကောင်စီတပ်က တပ်သား ၁၂ ဦးသေဆုံး၊ ၂ဝ ကျော် ဒဏ်ရာရရှိခဲ့ပြီး ပြည်သူ့ကာကွယ်ရေး ပူးပေါင်းတပ်ဘက်က ရဲဘော် ၁ ဦး ခြေသလုံး ကျည်စထိမှန်ဒဏ်ရာ ရရှိခဲ့တယ်လို့ သိရပါတယ်။
“တိုက်ပွဲက ၂ ရက်ဆက်ဖြစ်တယ်။ စခဘက်က အများအပြားသေဆုံးတယ်။ လက်နက်ကြီးနဲ့ ပြန်ပစ်တာတွေရှိပေမဲ့ ရဲဘော်တယောက်ပဲ ထိခိုက်ဒဏ်ရာ အနည်းငယ်ရတယ်။ ရွာထဲကိုတော့ လက်နက်ကြီးကျရောက်တာတော့ ရှိတယ်” လို့ ပြည်သူ့ကာကွယ်ရေး တပ်ဖွဲ့ဝင်တဦးက ပြောပါတယ်။
အဆိုပါ ၂ ရက်ဆက် တိုက်ပွဲအတွင်း စစ်ကောင်စီဘက်က လက်နက်ကြီးပစ်ကူ အချက်ပေါင်း ၇ဝ ကျော်လောက် ပစ်ခတ်ခဲ့ပြီး လက်နက်အင်အားမမျှတာကြောင့် ပြည်သူ့ကာကွယ်ရေး ပူးပေါင်းတပ်က ပြန်လည်ဆုတ်ခွာခဲ့တယ်လို့ ဆိုပါတယ်။
မြိတ်-မောတောင်လမ်းတလျှောက် စစ်ရေးတင်းမာနေတာကြောင့် ခရီးသွားပြည်သူတွေ သတိရှိကြဖို့နဲ့ အတတ်နိုင်ဆုံး ခရီးမထွက်ကြဖို့ ပြည်သူ့ကာကွယ်ရေးဘက်က မေတ္တာရပ်ခံထားပါတယ်။
ပြီးခဲ့တဲ့ မတ် ၁၉ ရက်ကလည်း ချောင်းနစ်ပေါက်ကျေးရွာက မြစ်ကူးတံတားအနီးမှာ နှစ်ဖက်တိုက်ပွဲဖြစ်ပွားခဲ့ပြီး စစ်ကောင်စီဘက်က အကျအဆုံးများခဲ့တယ်လို့ သိရပါတယ်။
