ပဲခူးတိုင်းအနောက်ခြမ်း၊ သာယာဝတီခရိုင်၊ မင်းလှမြို့နယ် အခြေစိုက် ခလရ(၁)တပ်ကနေ ပြီးခဲ့တဲ့ရက်ပိုင်းက စစ်ကောင်စီတပ်ဖွဲ့ဝင် ၃ ဦးဟာ လက်နက်တွေယူကာ တပ်ကနေ ထွက်ပြေးသွားတယ်လို့ စစ်တပ်နဲ့နီးစပ်တဲ့သူတွေက ပြောပါတယ်။
မင်းလှမြို့နယ် စိန်ကန့်လန့်ရွာအခြေစိုက် ခလရ ၁ မှာ အချုပ်ကျနေတဲ့ သာယာဝတီမြို့နယ် အခြေစိုက် ခလရ(၃၅)တပ်မှ တပ်ကြပ်ကြီးတစ်ဦးကို မတ် ၂၃ ရက် မနက် ၃ နာရီလောက်မှာ ညကင်းတာဝန်ကျနေတဲ့ တပ်သားဖိုးလပြည့်နဲ့ တခြားတပ်သားတစ်ဦးတို့က အချုပ်ခန်း ဖောက် ကယ်ထုတ်ကာ ကျည်ဆန် ၂၀၀၀၊ သေနတ် ၃ လက်၊ ဗုံးအလုံး ၂၀ တို့ကို ယူဆောင်ထွက်ပြေး သွားခဲ့တာလို့ဆိုပါတယ်။
စစ်တပ်ကလည်း တောနင်းရှာဖွေခဲ့ရာမှာ ရှားတောကွင်းရွာနားမှာ မတ် ၂၄ ရက်နေ့မနက်က ဖိုးလပြည့်ကို ပြန်ဖမ်းမိခဲ့လို့ ခလရ(၁) တပ်ထဲစစ်ကြောရေးလုပ်နေစဥ် အရာရှိက ဓာတ်ဆီလောင်း မီးရှို့သတ်လိုက်ပြီး အခုလို တပ်ကနေ ထွက်ပြေးရင် မိသားစုကိုပါ သတ်မယ်ဆိုပြီး ရဲဘော်တွေကိုလည်း ခြိမ်းခြောက်ပြောခဲ့တယ်လို့ တပ်တွင်းနဲ့နီးစပ်တဲ့သူတွေက ပြောပါတယ်။
ထွက်ပြေးလွတ်မြောက်နေတဲ့ တပ်ဖွဲ့ဝင် ၂ ဦးကို ပဲခူးရိုးမထဲရှိ ရှားတောကွင်းရွာနဲ့ ပျဉ်းကတိုးခင်းရွာ ဝန်းကျင်နေရာတွေကို စစ်ကောင်စီတပ်က ပိုက်စိပ်တိုက်ရှာဖွေနေပေမဲ့ ရှာမတွေ့ဘဲ လွတ်မြောက်နေဆဲဖြစ်ပါတယ်။
ပဲခူးရိုးမတလျှောက်မှာ စစ်ကောင်စီတပ်တွေဟာ ဆက်လက်ရှာဖွေနေသလို သစ်ဝါးခုတ် သမား ဒေသခံတွေဟာ ရိုက်နှက်မေးမြန်းခြင်းခံနေရတာကြောင့် ထွက်ပြေးတိမ်းရှောင်နေကြရပါတယ်။
ပဲခူးတိုင်းမှာ စစ်တပ်ကနေ ထွက်ပြေးသွားတဲ့စစ်ကောင်စီတပ်ဖွဲ့ဝင်တွေ ဒါဇင်နဲ့ချီရှိနေပြီး ဒီသတင်းတွေနဲ့ ပတ်သက်လို့ စစ်ကောင်စီကတော့ သတင်းထုတ်ပြန်တာမရှိပါဘူး။
