ကချင်ပြည်နယ် ကချင်လွတ်လပ်ရေးအဖွဲ့ (ကေအိုင်အို) ထိန်းချုပ်ရာဒေသ လိုင်ဇာမြို့အနီးက ဂျေယန် စစ်ရှောင်စခန်းမှာ မတ် ၁၉ ရက် ညနေ ၃ နာရီဝန်းကျင်လောက်မှာ ထမင်းဟင်းချက်ရာကနေတဆင့် လျှပ်စစ်ရှော့ဖြစ်ပြီး မီးလောင်ကျွမ်းမှုဖြစ်ပွားကာ လူနေအိမ် ၄၀ ကျော် ပျက်စီးဆုံးရှုံးခဲ့တယ်လို့ စစ်ရှောင်စခန်းမှာနေထိုင်သူတဦးက ပြောပါတယ်။
“မီးလောင်တာက ညနေ ၃ နာရီလောက်ဖြစ်မယ်။ ကလေးမလေးက လျှပ်စစ်နဲ့ ဟင်းချက်နေတာကနေ လျှော့ဖြစ်ပြီး မီးစလောင်လာတာ။ အဲတာကနေစပြီးတော့ အိမ်တွေ အကုန်ကူးသွားတာ၊ အိမ်တွေက ကပ်နေတော့၊ အိမ်ကတော့ ၄၀ ကျော်မယ် အတိအကျတော့ မသိရသေးဘူး။”
မီးလောင်ကျွမ်းနေတာကို စခန်းက ပြည်သူတွေနဲ့ မီးသတ်ဌာနက မီးသတ်ကားနှစ်စီး ဝိုင်းဝန်းမီးငြှိမ်းသတ်ခဲ့ပြီး တခြားကို မကူးစက်အောင်ကြိုးစား ငြိမ်းသတ်ခဲ့တယ်လို့ သိရပါတယ်။
လက်ရှိအချိန်အထိ မီးလောင်ကျွမ်းသွားတဲ့ နေအိမ် ၄၀ ကျော်က ပြည်သူ ၂၀၀ ဝန်းကျင်ကို ဒေသအာဏာပိုင်တွေအကူအညီနဲ့ နေရာချထားပေးတယ်လို့ စခန်းမှာ နေထိုင်သူတဦးက ပြောပါတယ်။
မီးလောင်ကျွမ်းတဲ့နေရာဟာ စခန်း အဝင်ဘက်က ရပ်ကွက် (6/B) မှာဖြစ်ပြီး စစ်ရှောင်စခန်းမှာ ရပ်ကွက် ၇ ခု ရှိတယ်လို့ သိရပါတယ်။
ဂျေယန်စစ်ရှောင်စခန်းဟာ ကချင်ပြည်နယ်မှာ တိုက်ပွဲတွေ စတင်ဖြစ်ပွားတဲ့ ၂၀၁၁ ခုနှစ်နောက်ပိုင်းကနေ တိုက်ပွဲတွေကြောင့် ထွက်ပြေးတိမ်းရှောင်နေရတဲ့ ပြည်သူအများအပြား နေထိုင်နေတဲ့ စခန်းကြီးဖြစ်ပါတယ်။
