ကချင်ပြည်နယ်၊ ဖားကန့်မြို့နယ်မှာ စက်သုံးဆီပြတ်လပ်နေတဲ့အတွက် ဖေဖော်ဝါရီ ၁၅ ရက်က စတင်ပြီး ဆီပန့်ဆိုင်အားလုံးနီးပါး ပိတ်ထားကြောင်း ဒေသခံတွေထံက သိရပါတယ်။

စက်သုံးဆီ သယ်ယူရောင်းချခွင့်ကို ပိတ်ပင်ထားတဲ့အတွက် ဖားကန့်မြို့နယ်အတွင်းက ဆီပန့်ဆိုင် အားလုံးနီးပါးပိတ်ထားပြီး သွားလာရေး အခက်အခဲဖြစ်ပေါ်နေကြောင်း ဒေသခံတွေဆီက သိရပါတယ်။

လုံးခင်းကျေးရွာ ဒေသခံတဦးက “ဖားကန့်ကို စက်သုံးဆီ သယ်ယူ ရောင်းချခွင့်ပိတ်ထားတယ်။ အရင်ရက်တွေကတော့ ဓာတ်ဆီကို အကန့်အသတ်နဲ့ ဝယ်လို့ရသေးတယ်။ ဒီနေ့တော့ ဖားကန့် လုံးခင်းဘက်က ဆီပန့်ဆိုင်တွေ အားလုံးနီးပါး ပိတ်သွားပြီ။ ဆိုင်ကယ်ထဲ ထည့်ဖို့တောင် ဓာတ်ဆီ ဝယ်မရတော့ သွားလာရေးက အရမ်းခက်ခဲသွားပြီ” လို့ ပြောပါတယ်။

ဖားကန့်မြို့နယ်အတွင်းက စက်သုံးဆီပန့်ဆိုင် အားလုံးနီးပါး ပိတ်ထားခဲ့ပေမယ့် လမ်းဘေးမှာ ပုလင်းဖြင့် ရောင်းချနေတဲ့ ဆိုင်အနည်းငယ်ရှိနေသေးကြောင်း သိရပါတယ်။

“ဆီပန့်ဆိုင်တွေကို ဆီအဝင် မရှိတော့လို့ဆိုပြီး အားလုံးနီးပါးပိတ်သွားကြပြီ။ လမ်းဘေးမှာ ပုလင်းနဲ့ ရောင်းတဲ့ဆိုင်လေးတွေတော့ ရှိသေးတယ်။ ဆီပန့်ဆိုင်တွေမှာ ရောင်းတဲ့ဈေးထက်တော့ ကြီးတယ်။ တပုလင်းကို ၃၀၀၀ ကျော် ၄၀၀၀ ဝန်းကျင်ရောင်းနေတော့ အလုပ်သွားရလာရတာ အတော့်ကို ဒုက္ခရောက်တယ်”လို့ ဒေသခံ အမျိုးသမီးတဦးက ပြောပါတယ်။

ကချင်ပြည်နယ်အတွင်းက ဖားကန့်မြို့နယ်နဲ့ တနိုင်းမြို့နယ်အတွင်းမှာ စစ်ကောင်စီတပ်နဲ့ ကချင်လွတ်မြောက်ရေးတပ် KIA တို့ စစ်ရေးတင်းမာမှုတွေ ဖြစ်ပွားနေပြီး စစ်ကောင်စီတပ်က ဇန်နဝါရီလကုန်ပိုင်းကစတင်ပြီး စက်သုံးဆီ သယ်ယူရောင်းချခွင့်ကို ပိတ်ပင်ထားခဲ့တာပါ။