မန္တလေးတိုင်း၊ မတ္တရာမြို့နယ်၊ ဧရာဝတီမြစ်ထဲမှာ ဧရာဝတီလင်းပိုင်နဲ့ ငါးသားပေါက်တွေကို ရှော့တိုက်ဖမ်းဆီးနေတဲ့ ငါးဖမ်းသမားတွေကို ဖေဖော်ဝါရီ ၄ ရက်မှာ ပြည်သူ့ကာကွယ်ရေး တပ်ဖွဲ့က ကင်းလှည့်စစ်ဆေးနေတဲ့အချိန် တွေ့ရှိပြီး ဖမ်းဆီးခဲ့တယ်လို့ သိရပါတယ်။
အဲဒီ ငါးဖမ်းသမားတွေဆီကနေ ငါးဖမ်းစက်လှေသုံးစီး၊ ရှော့စက်သုံးလုံးနဲ့ ဆက်စပ်ပစ္စည်းတွေဖြစ်တဲ့ ဘက်ထရီအိုးကြီး ၃ လုံး၊ ဘက်ထရီအလတ် ၃ လုံးနဲ့ လူ ၆ ယောက်ကို ထိန်းသိမ်းခဲ့ပြီး အဲဒီထဲက ငါးဖမ်းပစ္စည်းနဲ့ ဆက်စပ်ပစ္စည်းတွေကို သိမ်းယူခဲ့ကာ ငါးဖမ်းသမား ၆ ယောက်ကိုတော့ ပြန်လွှတ်ပေးခဲ့တယ်လို့ ဒေသတွင်း ပြည်သူ့ကာကွယ်ရေးအဖွဲ့ဖြစ်တဲ့ Peacock warriors force တပ်ဖွဲ့ တာဝန်ရှိသူက ပြောပါတယ်။
ဒေသခံ ပြည်သူ့ကာကွယ်ရေးတပ်ဖွဲ့အနေနဲ့ ဧရာဝတီလင်းပိုင်နဲ့ ရေချို ငါးမျိုးစိတ်အန္တရာယ် ကင်းလွတ်စေဖို့ ရှော့တိုက်ငါးဖမ်းသမားတွေကို အသိပညာပေးတာ၊ အရေးယူတာနဲ့ ပြစ်ဒဏ်ပေးတာ စတဲ့ အပိုင်း ၃ ပိုင်းခွဲပြီး လုပ်ဆောင်နေတယ်လို့လည်း ဆိုပါတယ်။
ဧရာဝတီလင်းပိုင်ဟာ ဧရာဝတီမြစ်အတွင်းမှာသာ တွေ့ရတာဖြစ်ပြီး ရှော့တိုက်အန္တရာယ်ကြောင့် ဧရာဝတီလင်းပိုင် မျိုးပွားနှုန်းကျဆင်းတာ၊ ငါးသားပေါက်မှုနှုန်း နည်းတာတွေအပြင် ရေချိုငါးရှားပါးမှု အန္တရာယ်တွေနဲ့ ကြုံတွေ့နေရတာလည်း ဖြစ်ပါတယ်။
စစ်တပ်အာဏာသိမ်းပြီး ၂ နှစ်ကျော်ကာလအတွင်း ဧရာဝတီမြစ်ထဲ ရှော့တိုက်ငါးဖမ်းတဲ့ ဖြစ်စဉ် ၁၀ ကြိမ်ထက်မနည်း ဖြစ်ပွားခဲ့ပြီး ရှော့တိုက်ငါးဖမ်းလှေ အစီး ၂၀ ကျော် ဖမ်းဆီးရမိခဲ့တယ်လို့ ဒေသတွင်း သတင်းရင်းမြစ်တွေအရ သိရပါတယ်။
