ကရင်ပြည်နယ်၊ ကြာအင်းဆိပ်ကြီးမြို့နယ်၊ ဘုရားသုံးဆူနယ်စပ်မြို့နဲ့ ၁၈ မိုင်အကွာရှိ ကေအန်ယူ တပ်မဟာ-၆ နယ်မြေ သတ္တုခဲမိုင်း အမှတ် ၅ ခနောက်စိမ်းတူးဖော်တဲ့ လုပ်ကွက်ကို ဇန်နဝါရီ ၂၅ ရက် ဒီမနက် ၂ နာရီလောက်မှာ စစ်တပ်က လေကြောင်းနဲ့ ဗုံးနှစ်ကြိမ်ကြဲချခဲ့တယ်လို့ ကေအန်ယူ တပ်မဟာ-၆ နယ်မြေ သတင်းအရင်းမြစ်တွေက ပြောပါတယ်။
ဗုံးကြဲခံရတာကြောင့် အဆောက်အဦများစွာ ထိခိုက်ပျက်စီးခဲ့ပြီး လူထိခိုက်မှု ရှိမရှိကိုတော့ လောလောဆယ် မသိရသေးဘူးလို့ ကေအန်ယူ တပ်မဟာ-၆ နယ်မြေ ပြောရေးဆိုခွင့်ရှိသူက ပြောပါတယ်။
တပ်မဟာ-၆ နယ်မြေထဲက သတ္တုမိုင်းလုပ်ကွက်တွေကို စစ်ကောင်စီတပ်ဘက်က ၃ ကြိမ်ထက်မနည်း တိုက်ခိုက်ခဲ့ပြီး မိုင်းလုပ်သား ၁ ဒါဇင်ကျော်လောက် သေဆုံးခဲ့သလို တရုတ်နိုင်ငံသား ၃ ယောက်လည်း မိုင်းလုပ်သားတွေနဲ့အတူ ထိခိုက်သေဆုံးခဲ့ပါတယ်။
မြေပြင်အခြေအနေမှာ စစ်ကောင်စီတပ်ဖွဲ့ဝင်တွေ ထိခိုက်သေဆုံးတာတွေ များပြားလာတာကြောင့် စစ်ကောင်စီဘက်က လေကြောင်းနဲ့ ထိုးစစ်ဆင်တဲ့အတွက် သာမန်အရပ်သားတွေလည်း ထိခိုက်သေဆုံးတာတွေ ရှိနေပါတယ်။
