ကရင်ပြည်နယ်၊ သံတောင်မြို့နယ်မှာ စစ်ကောင်စီတပ်တွေက ခရီးသွားပြည်သူတွေနဲ့ ကား၊ ဆိုက်ကယ်တွေကို တားဆီးစစ်ဆေးတာတွေ လုပ်ဆောင်ရာမှာ မတရားရိုက်နှက် ဖမ်းဆီးခံရမှာ စိုးရိမ်နေရတယ်လို့ ဒေသခံပြည်သူတွေက ပြောပါတယ်။

သံတောင်-ဘောဂလိ လမ်းပိုင်းတလျှောက်ကို စစ်ကောင်စီတပ်တွေက အင်အားဖြည့်တင်းပြီး ဒေသခံတွေနဲ့ ခရီးသွားပြည်သူတွေရဲ့ ကား၊ ဆိုင်ကယ်တွေကို တင်းတင်းကျပ်ကျပ် တားဆီးစစ်ဆေးနေတာကြောင့် စိုးရိမ်နေကြတာပါ။

ဇန်နဝါရီ ၁၈ ရက် ညက ဥသျှစ်ကုန်းကျေးရွာအနီး (သံတောင်-ဘောဂလိလမ်းမကြီး) မှာ စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်မတော် (KNLA)၊ ပြည်သူ့ကာကွယ်ရေးတပ်ဖွဲ့ (PDF) ပူးပေါင်းတပ်တွေနဲ့ နှစ်ဖက်တိုက်ပွဲဖြစ်ပွားခဲ့ပြီး နောက်ပိုင်း အခုလို လုပ်ဆောင်လာတာပါ။

စစ်ကောင်စီတပ်က ဒေသခံလူငယ် ၂ ဦးကို မတရားစွပ်စွဲပြီး ရိုက်နှက်ဖမ်းဆီးသွားတယ်လို့ ဒေသခံပြည်သူတယောက်က ပြောပါတယ်။

“တောင်ပေါ်ကဆင်းလာတဲ့ လူငယ် ၂ ယောက်ကို မှတ်ပုံတင်စစ်တယ်။ အလုပ်ကပြန်လာတာ မှတ်ပုံတင်က ဘယ်လိုပါမလဲ။ အဲဒါကို PDF လို့စွပ်စွဲပြီး ကြိုးတုပ်ရိုက်နှက်ပြီးတော့ ၁၆ မိုင်တပ်စခန်းကို ခေါ်သွားတယ်။ အဲနောက်ပိုင်း ဘာသတင်းမှ မကြားသေးဘူး။ ပြည်သူတွေက အခုဆို စိုးရိမ်စိတ်နဲ့ အသက်ရှင်နေရတယ်။”

စစ်ကောင်စီတပ်တွေက သံတောင်-ဘောဂလိ လမ်းမကြီးအနီးက ဥယျာဉ်ခြံတွေအတွင်းကိုပါ စစ်ကြောင်းထိုး လှုပ်ရှားသွားလာနေတဲ့အတွက် ဥယျာဉ်ခြံလုပ်ငန်း လုပ်ကိုင်နေသူတွေဟာ ဖမ်းဆီးစစ်ဆေးခံရမှာကို စိုးရိမ်ပြီး လုပ်ငန်းခွင်မသွားရဲသေးဘူးလို့ ကွမ်းစိုက်တောင်သူတွေက ပြောပါတယ်။

နိုဝင်ဘာ ၂၆ ရက်က သံမိုးတောင်ကျေးရွာမှာ စစ်ကောင်စီက လက်နက်ကြီးအပြင် လေကြောင်းကပါ ဗုံးကြဲတိုက်ခိုက်ခဲ့တဲ့အတွက် ဒေသခံပြည်သူ ၄၀၀ ကျော်ဟာ နေရပ်စွန့်ခွာပြီး နီးစပ်ရာကျေးရွာတွေမှာ ဒီကနေ့အထိ တိမ်းရှောင်နေရတယ်လို့ စစ်ဘေးရှောင်အရေး ကူညီပေးနေသူတွေဆီက သိရပါတယ်။