ပဲခူးမြို့၊ နန်းတော်ရာရပ်ကွက်၊ ဥဿာသီရိ ၁၃ မှာ လူဦးရေစာရင်းကောက်ပြီး ပြန်လာတဲ့ ရာအိမ်မှူးတယောက် ဇန်နဝါရီ ၁၉ ရက် ည ၇ နာရီက သေနတ်နဲ့ပစ်ခံရပြီး သေဆုံးသွားတယ်လို့ ရပ်ကွက်နေသူတွေဆီက သိရပါတယ်။
လူဦးရေစာရင်းကောက်ပြီး နေအိမ်ကိုပြန်လာတဲ့ ရာအိမ်မှူးကို အမည်မသိ ဆိုင်ကယ်စီး အမျိုးသားတဦးက သေနတ်နဲ့ပစ်ခတ်ခဲ့တာလို့ ရပ်ကွက်နေသူတဦးက ပြောပါတယ်။
“ရာအိမ်မှူးကို သူ့အိမ်ရှေ့မှာပဲ ဆိုင်ကယ်နဲ့ရောက်လာပြီး သေနတ်နဲ့ပစ်သွားတာ။ နဖူးကိုမှန်တာ၊ ပစ်တာတချက်တည်း၊ ပွဲချင်းပြီးသေသွားတယ်။”
သေနတ်နဲ့ပစ်ခတ်ခံရလို့ သေဆုံးသူမှာ နန်းတော်ရာရပ်ကွက် အုပ်ချုပ်ရေးမှူးရုံးမှ ရာအိမ်မှူး ဦးအောင်ငြိမ်းဖြစ်ပြီး စစ်တပ်ထောက်ခံသူတဦး ဖြစ်တယ်လို့ ရပ်မိရပ်ဖတဦးက ပြောပါတယ်။
“သူက စစ်တပ်က လှည့်ကင်းလှည့်တာတို့၊ စစ်တပ်လော်ဘီတွေနဲ့ပေါင်းပြီး တက်ကြွလှုပ်ရှားသူတွေ ဖမ်းတာတွေရှိတယ်။ အဲ့ဒါကြောင့် အပစ်ခံရတာ။”
ပစ်ခတ်မှုဖြစ်ပြီးနောက် သေဆုံးသူရဲ့ အလောင်းကို ပဲခူးမြို့နယ်ဆေးရုံကြီးကို လူနာတင်ယာဥ်နဲ့ ပို့ဆောင်ခဲ့ပြီး စစ်ကောင်စီတပ်က နန်းတော်ရာရပ်ကွက်မှာ စစ်ဆေးမှုတချို့ ပြုလုပ်ခဲ့တယ်လို့ ရပ်ကွက်နေသူတွေဆီက သိရပါတယ်။
စစ်ကောင်စီက ရွေးကောက်ပွဲအတွက် ဇန်နဝါရီ ၉ ရက်က စပြီး လူဦးရေစာရင်း ကောက်ခဲ့ရာ မြန်မာနိုင်ငံတဝန်း ဒုရဲအုပ်တဦး အပါအဝင် အုပ်ချုပ်ရေးမှူး ၁၂ ဦး သေဆုံးခဲ့ပါတယ်။
