စစ်ကိုင်းတိုင်း၊ ကောလင်းမြို့နယ်၊ ကောလင်း-ဥက္ကံလမ်းမကြီးပေါ်မှာ ဇန်နဝါရီ ၇ ရက် မနက်ပိုင်းက ပြည်သူ့ကာကွယ်ရေးတပ်ဖွဲ့ဝင် ရဲဘော် အမျိုးသမီး ၂ ယောက်ဟာ လက်လုပ်မိုင်းတွေ သယ်လာတုန်း အကြမ်းဖက်စစ်တပ်နဲ့ ထိပ်တိုက်တိုး စစ်ဆေးခံနေရတုန်း အသေခံ မိုင်းခွဲတိုက်ခိုက်သွားခဲ့တာလို့ Kalawlin Revolution –KR က ထုတ်ပြန်ပါတယ်။
စစ်ကောင်စီတပ်ဟာ ကျို့ခုံ၊ ဝါးရုံခုံရွာကနေ ချမ်းသာ၊ မင်းတဲကြီးဘက်ကို စစ်ကြောင်းထိုး ဝင်ရောက်လာလို့ ပြည်သူ့ကာကွယ်ရေးတပ်ဖွဲ့ဝင်တွေဖြစ်တဲ့ မစုစုရည်နဲ့ မနှင်းဆီလှိုင်တို့ဟာ မိုင်းထောင်ဖို့ ဆိုင်ကယ်နဲ့သယ်လာတုန်း စစ်တပ်ရဲ့ ရှေ့ပွိုင့်စစ်ကြောင်းနဲ့ ထိပ်တိုက်တိုးပြီး စစ်ဆေးတာ ခံခဲ့ရတယ်လို့ ဆိုပါတယ်။
ဒါကြောင့် ရဲမေ ၂ ယောက်ဟာ မိုင်းကို ရီမုနဲ့ခွဲ အသေခံတိုက်ခိုက်ခဲ့လို့ သူတို့ ၂ ယောက်လုံး ကျဆုံးခဲ့ပြီး အကြမ်းဖက်စစ်သားတွေ ဘယ်လောက်ထိခိုက်ဒဏ်ရာရတယ် ဆိုတာတော့ မသိရသေးပါဘူး။
ကျဆုံးခဲ့သူ မစုစုရည်ဟာ အသက် ၄၅ နှစ်အရွယ်ဖြစ်ပြီး မနှင်းဆီလှိုင်ကတော့ အသက် ၂၀ ပဲ ရှိသေးတယ်လို့ သိရပါတယ်။
မစုစုရည်ရဲ့နေအိမ်ကို အကြမ်းဖက်စစ်တပ်က ဇန်နဝါရီ ၈ ရက် မနေ့က ချိပ်ပိတ်ပြီး ဖျက်ဆီးခဲ့တယ်လို့လည်း တပ်ဖွဲ့က ထုတ်ပြန်ထားပါတယ်။
