နေပြည်တော်ကောင်စီနယ်မြေ ဇေယျာသီရိမြို့နယ် ရန်ကုန်-မန္တလေးလမ်းဟောင်း ရေဆင်းစိုက်ပျိုးရေးတက္ကသိုလ်ရှေ့မှာ ဇန်နဝါရီ ၇ ရက် ည ၆ နာရီကျော်က အလုပ်သမားတွေကို တင်လာတဲ့ ဖောကားတစီးမှောက်ပြီး အမျိုးသမီး ၅ ဦး သေဆုံးကာ ၂၉ ဦးဒဏ်ရာရရှိခဲ့တယ်လို့ မြို့ခံတွေက ပြောပါတယ်။
အလုပ်သမား ၅၀ ဝန်းကျင်တင်လာတဲ့ ဖောကားတိမ်းမှောက်ခဲ့တာလို့ မြို့ခံတဦးက ပြောပါတယ်။
"အလုပ်သိမ်းပြီး ပြန်လာကြတာ။ ဖောကားပေါ်မှာ လူက ၅၀ ဝန်းကျင်လောက်ပါတယ်။ ကားမှောက်တော့ အမျိုးသမီး ၅ ဦးက ပွဲချင်းပြီး သေသွားတယ်၊ ၂၉ ဦးက ဒဏ်ရာရတယ်။”
ပျဉ်းမနား ဗြဟ္မစိုရ်အသင်း၊ ကရုဏာရှင်လူမှုကူညီရေးပရဟိတအသင်း၊ သဗ္ဗသုခအသင်းနဲ့ပျဉ်းမနား မွန်မြတ်သူအသင်းတွေက လူနာတင်ယာဥ်တွေနဲ့ သေဆုံးသူအမျိုးသမီး ၅ ဦးနဲ့ ဒဏ်ရာရ အမျိုးသား အမျိုးသမီး ၂၉ ဦးတို့ကို နေပြည်တော် ခုတင် ၁၀၀၀ ဆေးရုံကို ပို့ဆောင်ပေးခဲ့တယ်လို့ ပရဟိတအဖွဲ့တွေဆီက သိရပါတယ်။
ပြီးခဲ့တဲ့ နှစ်တွေကလည်း ရန်ကုန်-မန္တလေးလမ်းဟောင်းမှာ ယာဥ်တိုက်မှုနဲ့ ယာဥ်တိမ်းမှောက်မှုတွေကြောင့် သေဆုံးဒဏ်ရာရရှိသူတွေ ရှိခဲ့ပါတယ်။
