ဧရာဝတီတိုင်းမှာ ပြီးခဲ့တဲ့ နိုဝင်ဘာလအတွင်း ဗုံးပေါက်ကွဲမှုနဲ့ သေနတ်ပစ်ခတ်ခံရမှုတွေကြောင့် ကြံ့ခိုင်ရေးပါတီဝင် ၃ ဦးနဲ့ စစ်ကောင်စီတပ်နဲ့ နီးစပ်သူ ၆ ဦး စုစုပေါင်း ၉ ဦး သေဆုံးခဲ့တယ်လို့ ဧရာဝတီတိုင်း ရဲတပ်ဖွဲ့မှူးရုံးနဲ့ နီးစပ်တဲ့အသိုင်းအဝိုင်းက သိရပါတယ်။
ဧရာဝတီတိုင်း ရဲတပ်ဖွဲ့မှူးရုံးနဲ့ နီးစပ်သူတစ်ဦးက "နိုဝင်ဘာလမှာ ဧရာဝတီတိုင်းထဲ သေနတ်နဲ့ ပစ်ခတ်ခံရလို့ ဗုံးပေါက်ကွဲမှုဖြစ်လို့ စုစုပေါင်း ၉ ဦးသေဆုံးတယ်။ ကြံ့ခိုင်ရေးပါတီက ၃ ဦးပါတယ်။ ကျန်တာတွေကတော့ စစ်ကောင်စီအဖွဲ့နဲ့ နီးစပ်ပြီး လက်ပွန်းတတီးနေတဲ့သူတွေ ပစ်ခတ်ခံရလို့ သေဆုံးခဲ့တာ" လို့ ပြောပါတယ်။
ကြံ့ခိုင်ရေးပါတီဝင် ၁ ဦးဟာ ဗုံးခွဲတိုက်ခိုက်ခံရလို့ သေဆုံးခဲ့ကာ ကျန် ၂ ဦးကတော့ သေနတ်နဲ့ပစ်သတ်ခံခဲ့ရလို့ ဖြစ်ပြီး သေဆုံးခဲ့တဲ့အထဲမှာ အမျိုးသမီး ၃ ဦးနဲ့ အမျိုးသား ၆ ဦးပါဝင်ပါတယ်။
ဗုံးပေါက်ကွဲမှု သေနတ်နဲ့ပစ်ခတ်မှုဖြစ်စဉ်တချို့ကို ဧရာဝတီ နန်းထိုက်အောင်စစ်ဆင်ရေးအဖြစ် ဒေသခံ ပြည်သူ့ကာကွယ်ရေးတပ်က လုပ်ဆောင်ခဲ့လို့ ထုတ်ပြန်ထားပေမဲ့ တချို့ ပစ်ခတ်ပေါက်ကွဲမှုတွေကတော့ ဘယ်အဖွဲ့က လုပ်ဆောင်ခဲ့တယ်ဆိုတာ ထုတ်ပြန်မှာ မရှိခဲ့ပါဘူး။
ဧရာဝတီတိုင်းအတွင်း ကျိုက်လတ်၊ ရေကြည်၊ မအူပင်၊ ဖျာပုံ၊ မော်လမြိုင်ကျွန်း၊ ဘိုကလေး၊ ကျုံပျော်နဲ့ ပုသိမ်မြို့နယ်တွေမှာ နိုဝင်ဘာလ အတွင်း ဗုံးပေါက်ကွဲမှုနဲ့ သေနတ်နဲ့ ပစ်ခတ်ခံရမှုတွေ ဖြစ်ပွားခဲ့တာပါ။
