အကျဉ်းထောင်တွင်းမှာ ရက်ပေါင်း ၆၅၀ ကြာ ဖမ်းဆီးထိန်းသိမ်း အကျဉ်းချခံခဲ့ရပေမဲ့ မြန်မာနိုင်ငံသားတွေကို ချစ်ခင်နေဆဲဖြစ်ပြီး မြန်မာနိုင်ငံကို ဘယ်တော့မှ အမုန်းတရားမထားနိုင်ဘူးလို့  ဩစတြေးလျ စီးပွားရေးပညာရှင် ပါမောက္ခ ရှောင်တာနယ်က ပြောပါတယ်။

ဩစတြေးလျ အခြေစိုက် ABC သတင်းဌာက မစ္စတာရှောင်တာနယ်တို့ တွေ့ဆုံမေးမြန်းရာမှာ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ရဲ့ စီးပွားရေးအကြံပေး ပါမောက္ခ မစ္စတာ ရှောင်တာနယ်က ပြောဆိုခဲ့တာပါ။

စစ်အာဏာသိမ်းပြီးနောက် ၂၀၂၁ ခုနှစ် ဖေဖော်ဝါရီလ ၆ ရက် မနက်အစောပိုင်းမှာ မြန်မာနိုင်ငံ ရန်ကုန်မြို့အတွင်းက သူ နေထိုင်ရာဟော်တယ်ရဲ့ ဝန်ထမ်းတစ်ယောက်ဆီကနေ ထိတ်လန့်စရာ သတင်းတစ်ခုကို မစ္စတာရှောင်တာနယ် ကြားသိလိုက်ရပါတယ်။ 

“ဟော်တယ်ရဲ့ လုံခြုံရေးစနစ်နဲ့ လုံခြုံရေးကင်မရာတွေကို စစ်တပ်က ညဘက် လာသိမ်းသွားကြပြီ” လို့ သူ သိလိုက်ရပါတယ်။

“အဲဒီကင်မရာတွေက ကျနော့် အခန်းတံခါးကို ချိန်ထားကြတာ” မစ္စတာရှောင်တာနယ်က ပြောပါတယ်။ 

ဒီမိုကရေစီစနစ်အတိုင်း ကျင်းပခဲ့တဲ့ရွေးကောက်ပွဲမှာ မဲအပြတ်အသတ်နဲ့နိုင်ခဲ့တဲ့ လူထုခေါင်းဆောင် ဒေါ်အောင်ဆန်းစုကြည်ကို စစ်တပ်က ဖမ်းဆီး အာဏာသိမ်းခဲ့ပြီးနောက် မစ္စတာရှောင်တာနယ် တယောက် မြန်မာနိုင်ငံကနေ ထွက်ခွာရေးအတွက် လေယာဉ်လက်မှတ်ရနိုင်ဖို့ စီစဉ်နေခဲ့တာ ၃ ရက်ရှိလာခဲ့ပြီဖြစ်သလို သူ့အတွက်လည်း အချိန်က သိပ်မကျန်တော့ပါဘူး။

Chatrium ဟိုတယ်ရဲ့ ဧည့်ကြိုကောင်တာမှာ သူ နေခဲ့တဲ့ရက်တွေအတွက် ငွေပေးချေနေစဉ်မှာပဲ လက်နက်ကိုင်ရဲတွေ သူ့ဆီချဉ်းကပ်လာတာကို တွေ့လိုက်ရပါတယ်။ 

“သူတို့ အယောက် ၂၀-၃၀ လောက်တော့ရှိမယ်။ အဲဒီကစ ပွဲသိမ်းသွားတာပဲ” လို့ မစ္စတာရှောင်တာနယ်က ပြောပါတယ်။ 

မြန်မာစစ်တပ်က ပြန်လွှတ်ပေးလိုက်ပြီးနောက် ဆစ်ဒနေမြို့က ABC သတင်းဌာနနဲ့ အင်တာဗျူးရာမှာ ပြန်လည်လွတ်မြောက်လာခဲ့တဲ့အတွက် သက်ဆိုင်ရာအားလုံးကို ကျေးဇူးတင်တယ်လို့ မစ္စတာရှောင်တာနယ်က ပြောကြားခဲ့ပါတယ်။

“ကျနော့်ကို သူတို့က သူလျှိုလို့ စွပ်စွဲကြတာ။ ကျနော်ကတော့ ဘာအမှားမှ လုပ်ထားတာမရှိဘူး ဆိုတာ သေချာတယ်လေ” လို့ နိုင်ငံတော်လျှို့ဝှက်ချက်ဥပဒေနဲ့ မြန်မာစစ်တပ်က စွပ်စွဲကာ ထောင်ဒဏ် ၃ နှစ်ပြစ်ဒဏ်ချမှတ်ခံခဲ့ရတဲ့ အသက် ၅၈ နှစ်အရွယ် မစ္စတာရှောင်တာနယ်က ပြောပါတယ်။ 

ရက်ပေါင်း ၆၅၀ ကြာအောင် မြန်မာနိုင်ငံက အကျဉ်းထောင်ထဲမှာ ဖမ်းဆီးထိန်းသိမ်းခံထားရပြီးနောက်မှာ မြန်မာစစ်အာဏာရှင်တွေရဲ့ “နိုင်ငံတကာနဲ့ ရင်းနှီးတဲ့ ဆက်ဆံရေးကို ထိန်းသိမ်းရန်၊ လူသားချင်းစာနာထောက်ထားညှာတာသောအားဖြင့်” ဆိုတဲ့ အကြောင်းပြချက်နဲ့ ဖမ်းဆီးခံထားရတဲ့ အခြားနိုင်ငံခြားသား ၃ ဦးနဲ့အတူ မစ္စတာရှောင်တာနယ် ပြန်လည်လွတ်မြောက်လာခဲ့ပါတယ်။ 

သူ့ကို ဖမ်းဆီးထားတဲ့ ပထမ နှစ်လမှာ ပြတင်းတံခါးမရှိ၊ အိပ်ရာမရှိတဲ့ သီးသန့်အခန်းထဲမှာ နေခဲ့ရပါတယ်။ အခန်းရဲ့ အလယ်မှာ မူလီနဲ့စွဲထားပြီး သံခြေချင်းပါတဲ့ ထိုင်ခုံတလုံးပဲ ရှိပါတယ်။ အဲဒီထိုင်ခုံမှာ သူ့ကိုခြေချင်းခတ်၊ လက်ထိတ်နဲ့တွဲခတ်ပြီး စစ်ကြောရေးလုပ်ခဲ့ကြတယ်လို့ ဆိုပါတယ်။ 

“ပထမဆုံး လုပ်ဖြစ်တာကတော့ လမ်းလျှောက်တာပဲ။ လျှောက်ရင်းနဲ့ ခြေလှမ်းတွေကို ရေမှတ်တယ်။ အဲလိုလုပ်နေရင် ထူးထူးဆန်းဆန်း စိတ်သက်သာရာရစေတယ်။ ခြေလှမ်းတွေ မှတ်ပြီး လမ်း‌လျှောက်ရင်းနဲ့ သမ္မတတွေအားလုံး၊ ဩစတြေးလျဝန်ကြီးချုပ်တွေအားလုံးရဲ့ နာမည်တွေ ပြန်စဉ်းစားတာမျိုး၊ နည်းလမ်းမျိုးစုံနဲ့ စဉ်းစားပြီး စိတ်ဓာတ်လည်းမကျအောင်၊ ကြောက်စိတ်စိုးရိမ်စိတ်တွေလည်း မဖြစ်အောင် နေခဲ့ရတယ်” လို့ သူက ပြောပါတယ်။

အဲဒီအချိန်မှာ ထိတ်လန့်စိုးရိမ်စိတ်ကို ခံစားခဲ့ရတယ်လို့လည်း ဆိုပါတယ်။

“ဩစတြေးလျက သဘောထားပျော့ပျောင်းတဲ့ ပါမောက္ခလေးတစ်ယောက်က ဘယ်လိုလုပ်ပြီးများ အရှေ့တောင်အာရှမှာ နာမည်ဆိုးနဲ့ အကျော်ကြားဆုံး ထောင်ထဲကိုရောက်လာရတာလဲဆိုတာ ကျနော် အံ့ဩနေမိတယ်” လို့ သူကပြောပါတယ်။ 

“အပြင်ကနေ ကူနေတဲ့သူတွေရှိမှာပဲဆိုတာတော့ ကျနော် သိတယ်လေ။ အဲဒီတော့ ကျနော် ကိုယ့်စိတ်ကိုယ်ထိန်းရင်းနဲ့ ဒီအခြေအနေကို တောင့်ခံထားဖို့ပဲလိုတယ်။ အဆင်ပြေသွားလိမ့်မယ်လို့ စဉ်းစားတယ်” လို့ ပြောပါတယ်။ 

သူ့ကို အချိန်ခဏအတွင်း ပြန်လွှတ်ပေးကြလိမ့်မယ်လို့လည်း အကောင်းမြင်လွန်းခဲ့တယ်လို့ ဆိုပါတယ်။

“နည်းနည်းအရေးပါတဲ့ နိုင်ငံခြားသားတစ်ယောက်အနေနဲ့ ကျနော့်ကိုတော့ ကောင်းကောင်းမွန်မွန် ထားကြမှာပဲလို့ ထင်ခဲ့မိတာ။ တကယ်တော့ အဲဒီလိုမဖြစ်ခဲ့ဘူး။ ကျနော့်ကိုလည်း အားလုံးနဲ့ တန်းတူနီးနီးပဲ ဆက်ဆံကြတာပဲ” လို့ပြောပါတယ်။ 

“အဲဒီအခန်းထဲမှာ နေခဲ့ရတဲ့အချိန်တုန်းက အဆက်အသွယ်ရတဲ့လူဆိုတာ အခန်းထဲကို အချိန်မတော်ကြီး ဝင်ဝင်လာပြီး စစ်မေးတဲ့ လူတွေပဲ ရှိတယ်။ သူတို့က တမင်ကို ညသန်းခေါင်ကြီးမှ လာလာပြီးမေးကြတာ ဖြစ်မယ်။ သူတို့ စမေးတဲ့ မေးခွန်းတွေက လူကို ထိတ်လန့်ကြောက်ရွံ့ပြီး စိတ်ဓာတ်ပျက်ပြားသွားစေမယ့် မေးခွန်းတွေ စမေးတယ်။ ဖြေစရာအဖြေမရှိတဲ့ အဓိပ္ပာယ်မရှိ အူကြောင်ကြောင်မေးခွန်းတွေ။”

“နောက်ပြီးရင် နည်းနည်းလေးပိုအားစိုက်ပြီး ဒေါ်အောင်ဆန်းစုကြည်၊ ဒါမှမဟုတ် တခြား တယောက်ယောက်အကြောင်း ထွက်လာမလားဆိုပြီး ကျနော့်ကို လှည့်ပတ်အစ်အောက် မေးကြတယ်။ သိတဲ့အတိုင်းပဲ။ အဲဒီအချိန်မှာ ကျနော်တွေ့ခွင့်ရတဲ့ လူဆိုလို့ သူတို့ပဲရှိတယ်” လို့ ပြောပါတယ်။

အဲဒီနောက် မစ္စတာရှောင်တာနယ်ကို အင်းစိန်ထောင်ကို ရွှေ့ပြောင်းပို့ဆောင်လိုက်ကြပါတယ်။ 

“ပတ်ဝန်းကျင်အခြေအနေက အတော်ကိုဆိုးပါတယ်” လို့ ရှောင်က ပြောပါတယ်။

“သံချေးတက်နေတဲ့ သံတိုင်တွေနဲ့ ကွန်ကရစ်အခန်းတွေ။ လူတွေသာ ဝင်ထွက်မရတာ၊ အပြင်က မလိုတာတွေအကုန်ဝင်တယ်။ မိုးရွာရင် မိုးရေဝင်တယ်၊ နေပူရင်လည်း အထဲမှာပူလိုက်တာ၊ အင်းဆက်ပိုးမွှားတွေ၊ ကြွက်တွေ၊ ကင်းမြီးကောက်ကြီးတွေ အကုန် အခန်းထဲဝင်တယ်။”

“ဒါပေမဲ့ အင်းစိန်ထောင်ထဲမှာ ကောင်းတဲ့အချက်က ကျနော် လူတွေနဲ့ တွေ့ရတာပဲ။ တခြား နိုင်ငံရေးအကျဉ်းသားတွေနဲ့ တွေ့ဆုံခွင့်ရတယ်။ တော်တော်လေးကိုငယ်တဲ့ နိုင်ငံရေးအကျဉ်းသား တယောက်က ကျနော့်ကို လာပြောတဲ့ စကားကို ကျနော် ဘယ်တော့မှ မမေ့တော့ဘူး။ ‘ရှောင်၊ ခင်ဗျား ကျနော်တို့ဆီ ရောက်လာတာ အန္တရာယ်ကင်းပြီ’ လို့ ပြောသွားတာ။”

ရှောင်တာနယ်ရဲ့ ဇနီးသည်ဖြစ်သူ ဩစတြေးလျ မက်ကွာရီတက္ကသိုလ်က ဆရာမ Ha Vu ကလည်း အပတ်စဉ်နီးပါး လိုအပ်တာတွေ ပို့ပေးလေ့ရှိပါတယ်။ 

“ကျနော့်အမျိုးသမီးက ကွတ်ကီးတွေ၊ စပျစ်ခြောက်ကွေကာကွတ်ကီးတွေ၊ သစ်သီးကိတ်တွေကို ဒီ ဆစ်ဒနီကနေ ဖုတ်ပြီးတော့ လေလုံအိတ်နဲ့ သေချာပိတ်ပြီးထည့်တယ်။ ပြီးရင် ကင်ဘာရာကို ပို့လိုက်တယ်။ အဲဒီကနေ ရန်ကုန်သံရုံးကို ပို့ပြီးတော့ သံရုံးကနေ ကျနော့်ဆီ ရောက်လာတယ်။ ရောက်လာသမျှ တစ်ခုမှ ပျက်စီးသွားတာမရှိဘူး” လို့ သူက အပြုံးတွေနဲ့ ပြန်ပြောပြပါတယ်။

“အိတ်ကိုဖွင့်လိုက်ပြီး မုန့်ဖုတ်ထားတဲ့အနံ့ကို ရလိုက်တဲ့အချိန်ဟာ တကယ့်ကို အရမ်းကောင်းတဲ့ အချိန်အခိုက်အတန့်လေးပဲ” လို့ ဆိုပါတယ်။

ပထမဆုံး သူ ရခဲ့တဲ့ ပါဆယ်ဟာ အမေရိကန်ရဲ့ ပထမဆုံးဘဏ္ဍာရေးဝန်ကြီး အလက်ဇန္ဒားဟမ္မေလ်တန်ရဲ့ အတ္ထုပ္ပတ္တိစာအုပ် ဖြစ်တယ်လို့ ဆိုပါတယ်။

အဲဒီနောက် လပိုင်းအတွင်းမှာပဲ တချို့တဝက်ကို သူ့စိတ်ထဲမှာ၊ တချို့တဝက်ကိုတော့ သူ့ဆီမှာရှိနေတဲ့ စာအုပ်တွေရဲ့ ပိုနေတဲ့စက္ကူသားနေရာတွေမှာ ခဲတံနဲ့ချရေးရင်း သူ့ရဲ့ ကိုယ်ပိုင်စာအုပ်တစ်အုပ်ကို စတင်ရေးသားခဲ့ပါတော့တယ်။

ခါးသီးတဲ့အတွေ့အကြုံတွေကို မစ္စတာရှောင်တာနယ် မတုန်မလှုပ် ရင်ဆိုင်နိုင်ခဲ့တာဟာ သူ့ရဲ့ဇနီးသည် Ha Vu ရဲ့ အကူအညီ‌တွေကြောင့် ဖြစ်တယ်လို့ဆိုပါတယ်။ သူ့ရဲ့ လွတ်မြောက်ရေးအတွက် ကြိုးစားအားထုတ်ရာမှာ ဇနီးသည်ဟာ အခြေအနေ အချိန်အခါလိုက် လိုအပ်ချက်ကို သူမတူအောင် သိသူလို့ မစ္စတာရှောင်တာနယ်က ပြောပါတယ်။

“ကျနော် အိမ်ပြန်ရောက်လာတဲ့အချိန်ကစပြီး လူတိုင်း၊ တမ္ဘာလုံးက လူတိုင်းပြောကြတာက သူ ဘယ်လောက် စိတ်ဓာတ်ခိုင်မာသလဲ ဆိုတာပဲ။ ဩစတြေးလျ၊ အမေရိကန်၊ ဗီယက်နမ်၊ စင်္ကာပူ ရသမျှအကုန်လုံးနဲ့ ဆက်သွယ်ပြီး သူ ညှိနှိုင်းဆောင်ရွက်ခဲ့တဲ့အကြောင်းတွေ ပြောပြကြတယ်” လို့ သူကပြောပါတယ်။ 

“သူ တွေ့ဆုံညှိနှိုင်းမှုတွေလုပ်ခဲ့တဲ့အထဲမှာ အခုလက်ရှိ အင်္ဂလန် ဘုရင်ချားလ်စ်တောင် ပါတယ်။ ဒါတွေ အကုန်လုံး အသက် ၂၈ နှစ်ကျော်မှ ဩစတြေးလျကို ရောက်လာခဲ့တဲ့သူက လုပ်ခဲ့တာ။ ဩစတြေးလျရဲ့ ထိပ်တန်းအစိုးရအရာရှိတွေ၊ အမေရိကန်လွှတ်တော်အမတ်တွေနဲ့ တွေ့ဆုံညှိနှိုင်းမှုတွေ လုပ်ခဲ့တယ်” လို့ ဆိုပါတယ်။

သူ့ဇနီးသည်ရဲ့ စိတ်ဓာတ်ခိုင်မာမှုကို ချီးမွမ်းခန်းဖွင့်နေစဉ်မှာပဲ သူ ထောင်ကျနေစဉ်အချိန်အတွင်း သူ့ဇနီးသည် ခံစားခဲ့ရတဲ့ စိတ်ညစ် စိတ်ရှုပ်ထွေးမှုတွေအတွက်လည်း သူ့မှာအပြစ်ရှိတယ်လို့ ခံစားရကြောင်း မစ္စတာရှောင်တာနယ်က ပြောပါတယ်။

“သူ့မှာ လုပ်ပေးရမယ့်တာဝန်မရှိဘူး၊ ဒါဟာ အိမ်ထောင်ရေးတာဝန်ထဲမှာ မပါဘူးလို့ ကျနော် တွေးမိတယ်။ အထဲမှာ ဒုက္ခရောက်နေရှာမှာပဲ ဆိုပြီး အပြင်ကလူတွေက ပိုနာကျင်ရတယ်။ အထဲက ကျနော့်အခြေအနေကိုတော့ ကျနော်အသိဆုံးပေါ့” လို့ သူက ပြောပါတယ်။ 

မြန်မာအကျဉ်းထောင်လို့ ပြောလိုက်တာနဲ့ ဘယ်သူကမှ စိတ်ထဲမှာ ကောင်းတာ မမြင်တော့ဘူးလေလို့ ဆိုပါတယ်။

ဝေးကွာလှတဲ့ အကွာအဝေးနဲ့ ခက်ခဲတဲ့ အခြေအနေကို ကြုံခဲ့ကြရတဲ့ သူတို့မောင်နှံဟာ ဆက်သွယ်ဖို့ အခွင့်အရေးမရှိတဲ့ အခြေအနေမှာပဲ မြန်မာစံတော်ချိန် မနက် ၅ နာရီခွဲ၊ ဆစ်ဒနီ စံတော်ချိန် မနက် ၁၀ နာရီအချိန်အတိအကျမှာ နေ့စဉ်နေ့တိုင်း သူတို့ချင်းဆက်သွယ်လို့ရမယ့် နည်းလမ်းကို ရှာတွေ့ခဲ့ကြပါတယ်။

ကျနော်တို့ချင်း ဖုန်းနဲ့ဆက်သွယ်လို့ ရခဲ့တဲ့ အစောပိုင်းအချိန်တွေမှာအတည်းက ကျနော်တို့ တယောက်အကြောင်းတယောက် တွေးကြမယ်လို့ သဘောတူခဲ့ကြတယ်လို့ သူက ပြောပါတယ်။ 

“ကျနော်တို့ တယောက်ပြောတာကို တယောက်ကတော့ မကြားနိုင်ဘူးပေါ့။ ဒါပေမဲ့ ကျနော့်အကြောင်းကို သူကလည်း လေးလေးနက်နက် တွေးနေမယ်၊ ကျနော်ကလည်း သူ့အကြောင်းကို အလေးအနက်တွေးနေမယ်လို့ သိနေခြင်းအားဖြင့် ကျနော်တို့ တယောက်နဲ့ တယောက် အဆက်အသွယ်ရှိနေသလို ခံစားရစေတယ်။

တခါတလေဆို ‘ကြားရလား၊ ဒါလင်’ လို့တောင် ကျနော် အသံထွက်ပြောမိတယ်။ သူ ကြားတယ်လို့လည်း ကျနော့် စိတ်မှာ ထင်မိတယ်။ ကျနော့် လက်တွေ့နေထိုင်မှုမှာတောင်မှ ဒီလိုအခြေအနေဆိုရင် သူရော ဘာလုပ်မလဲလို့ တွေးမိ ပြောမိတဲ့အထိပဲ။ ဒီနေရာမှာ သူ သာဆိုရင် ဘာလုပ်မလဲ။

ကျနော် သူ့အကြောင်းကို စဉ်းစားလေ့ရှိသလို သူနဲ့လည်း စိတ်ထဲကနေ စကားပြောလေ့ရှိတယ်။ သူ့မှာ အရမ်းထူးခြားတဲ့ ဆက်သွယ်ဖော်ပြနိုင်စွမ်းရှိတယ်လို့ ဆိုရမလားပဲ၊ သူ့ရဲ့အသံကို ကျနော် ကြားရတယ်" လို့ မစ္စတာရှောင်တာနယ်က ပြောပါတယ်။

ဝန်ကြီးချုပ် မော်ရစ်ဆင်လက်ထက်မှာ သူ့ရဲ့ လွတ်မြောက်ရေးအတွက် ကြိုးပမ်းဆောင်ရွက်မှုတွေ ရှိခဲ့ပေမဲ့ ဝန်ကြီးချုပ် အယ်လ်ဘန်နီးစ်လက်ထက်မှာ ပိုပြီးတော့ အားစိုက်ကြိုးပမ်းလာတယ်လို့ ခံစားရကြောင်း သူက ပြောပါတယ်။ 

“တွေ့ခွင့်တောင်းတာတွေ၊ ဖုန်း နဲ့ဆက်သွယ်ဖို့တောင်းဆိုမှုတွေကအစ သိသာတဲ့ ပြောင်းလဲမှုတွေ ရှိလာတယ်” လို့ ဆိုပါတယ်။

အဲဒီအချိန်မှာ ကျန်းမာရေးအခြေအနေ ဆိုးရွားလာနေတဲ့ မစ္စတာရှောင်တာနယ်အပေါ် စွပ်စွဲထားတဲ့ အမှုကို ရုံးတင်ဖို့အတွက် အင်းစိန်ထောင်ကနေ နေပြည်တော်ထောင်ကို ပို့ဆောင်လိုက်ပါတယ်။ နေပြည်တော်မှာ မစ္စတာရှောင်တာနယ်ကို ဖမ်းဆီးထိန်းသိမ်းထားတဲ့ အချုပ်ထောင်ဟာ ဒေါ်အောင်ဆန်းစုကြည်ကို ဖမ်းဆီးထိန်းသိမ်းထားတဲ့ အချုပ်ထောင်နဲ့ တဝင်းတည်းပဲဖြစ်တယ်လို့ ဆိုပါတယ်။ 

ပထမဆုံးအကြိမ် ဒေါ်အောင်ဆန်းစုကြည်နဲ့ စကားပြောဖြစ်တဲ့အချိန်မှာ “ရှောင်၊ ကျမတို့ရဲ့ ပြဿနာတွေထဲ ရှင့်ကို ဆွဲသွင်းမိခဲ့တဲ့အတွက် ရှင့်အတွက်ရော၊ ရှင့်ရဲ့ ဇနီးသည်အတွက်ရော၊ ရှင့်ရဲ့အဖေနဲ့ ရှင့်မိသားစုတခုလုံးအတွက်ပါ စိတ်မကောင်းဖြစ်ရပါတယ်” လို့ ဒေါ်အောင်ဆန်းစုကြည်က တောင်းပန်စကားပြောခဲ့တယ်လို့ ဆိုပါတယ်။ 

စက်တင်ဘာလထဲမှာတော့ သူ့ကို အပြစ်ရှိတယ်လို့ အမိန့်ချမှတ်ပြီး ထောင်ဒဏ် ၃ နှစ် မတရား ပြစ်ဒဏ်ပေးခဲ့ပါတယ်။ အဲဒီနောက် ရက်သတ္တပတ် ၇ ပတ်အကြာမှာ မထင်မှတ်ထားပဲ  ရုတ်တရက် သူ့ကို ပြန်လွှတ်ပေးလိုက်ကြပါတယ်။ 

သူ့ကို လွှတ်ပေးလိုက်ပြီလို့ ထောင်စောင့်က လာပြောတဲ့အချိန်မှာ လာနောက်နေတာဖြစ်မယ်လို့ ထင်မိကြောင်း သူက ပြောပါတယ်။

အဲဒီနောက် သူ့ကို ပစ္စည်းတွေသိမ်းဖို့ အချိန်မိနစ်ပိုင်း ပေးခဲ့တယ်လို့ ဆိုပါတယ်။ သူ့ရဲ့ အဖိုးတန်စာအုပ်တွေအပေါ် နှမြောမိသော်လည်း ကျန်နေခဲ့တဲ့ အကျဉ်းသားတွေဖတ်ဖို့ အမြောက်အမြား ချန်ထားရစ်ခဲ့တယ်လို့ သူက ပြောပါတယ်။

အဲဒီကနေ သူ့ကို လေယာဉ်ကွင်းကို တိုက်ရိုက်ပို့ဆောင်ခဲ့ပြီး လေဆိပ်မှာ ဩစတြေးလျသံရုံး အရာရှိတွေက သူ့ကို စောင့်ကြိုနေခဲ့ကြပါတယ်။ ဩစတြေးလျနိုင်ငံ မဲလ်ဘုန်းလေဆိပ်မှာ သူ့ကို စောင့်ကြိုနေတဲ့ ဇနီးသည်နဲ့ ပြန်လည်ဆုံတွေ့ခဲ့ကြရပါတယ်။ 

“တကယ့်ကို မှော်ဆန်တဲ့အချိန်လေးပဲ။ ကျနော်တို့ တယောက်ဆီကို တယောက်ပြေးလာပြီး ဖက်ထားကြတာ ရုပ်ရှင်တွေထဲကလိုပဲ” လို့ ပြောပါတယ်။ 

ဆိုးရွားတဲ့အတွေ့အကြုံတွေ ရရှိခဲ့ပေမဲ့ မြန်မာနိုင်ငံနဲ့ မြန်မာနိုင်ငံသားတွေကို ချစ်ခင်နေဆဲ ဖြစ်တယ်လို့ မစ္စတာရှောင်တာနယ်က ပြောပါတယ်။

သူ မြန်မာလေဆိပ်ကနေ ထွက်လာတဲ့အချိန်မှာ မြန်မာနိုင်ငံလူဝင်မှုကြီးကြပ်ရေးအဖွဲ့ရဲ့ အကြီးတန်းအရာရှိတစ်ယောက်က “မြန်မာနိုင်ငံကို မမုန်းလိုက်ပါနဲ့နော်”လို့ ပြောတာကို “မြန်မာနိုင်ငံကို ဘယ်တော့မှ မမုန်းနိုင်ပါဘူးဗျာ” လို့ သူက ပြန်ဖြေခဲ့တယ်လို့ ဆိုပါတယ်။ 

“မြန်မာနိုင်ငံသား ၉၉ ရာခိုင်နှုန်းဟာ အရမ်းကောင်းကြတယ်။ ဖော်ရွေတယ်၊ ရင်းရင်းနှီးနှီးနဲ့ ကြင်နာတတ်တဲ့ သဘောရှိကြတယ်။ မြန်မာနိုင်ငံသားတွေအနေနဲ့ ဘာမှတောင်းပန်နေစရာ မရှိပါဘူး” လို့ သူကပြောပါတယ်။

မစ္စတာရှောင်တာနယ်ဟာ သူ ပြန်လည်လွတ်မြောက်ရေးအတွက် ကြိုးပမ်းပေးကြသူအားလုံးကို ကျေးဇူးတင်မဆုံးဖြစ်နေတယ်လို့ ဆိုပါတယ်။ 

“ဘာမှ မော်ကြွားနေစရာမရှိပါဘူး။ လူတွေရဲ့ အလေးပေးမှုကို ခံယူစရာလည်း မရှိပါဘူး။ ကျနော့်ကိုယ် ကျနော်အသိဆုံးပါ။ ကျနော် ကြောက်နေခဲ့တဲ့ အချိန်တွေရှိတယ်။ ရင်ဆိုင်ဖို့ အားမရှိခဲ့တဲ့အချိန်တွေ အိမ်ကိုပဲပြန်ချင်နေခဲ့တဲ့အချိန်တွေ ရှိတယ်။ ကျနော် အိမ်ကိုပဲ ပြန်ချင်နေခဲ့တာ။”