ကချင်ပြည်နယ်၊ နမ္မတီးမြို့မှာ နိုဝင်ဘာ ၂၉ ရက် မနက်ပိုင်းက နေအိမ်နှစ်လုံး မီးလောင်ပြီး အမျိုးသမီးတဦး ထိခိုက်ဒဏ်ရာ ရရှိခဲ့ကြောင်း သိရပါတယ်။
မြို့မ ရွှေဝါရပ်ကွက်မှာ လျှပ်စစ်အိုးတည်ထားရာက လျှပ်စစ်ဝါယာရှော့ဖြစ်ပြီး နှစ်ထပ်တိုက် အိမ်နှစ်လုံး မီးလောင်ဆုံးရှုံးခဲ့ကာ အိမ်ရှင်အမျိုးသမီးတဦး ထိခိုက်ဒဏ်ရာ ပြင်းထန်ခဲ့ကြောင်း ဒေသခံတွေဆီက သိရပါတယ်။
မီးငြှိမ်းသတ်ရာမှာ ပါဝင်ခဲ့သူတဦးက “လျှပ်စစ်အိုးအနားမှာ လူမရှိဘဲ တည်ထားခဲ့တာ။ မီးလောင်နေလို့ အခန်းတံခါးဖွင့်လိုက်တာ မီးဟပ်ပြီး အိမ်ရှင်ရဲ့ ကျောကုန်းနဲ့ ဆံပင်မှာ မီးလောင်ဒဏ်ရာ ရသွားတယ်။ နောက်ပြီး အသက် ၇၀ ကျော်လောက်ရှိတဲ့ အဘွားတဦးလည်း မီးခိုးမွှန်ပြီး မူးလဲသွားတယ်။ နေအိမ်နှစ်လုံး မီးလောင်သွားတယ်။ ဒဏ်ရာရရှိသူတွေကို နမ္မတီးမြို့နယ်က လူမှုကူညီရေးကားတွေနဲ့ ဆေးရုံကို ပို့ဆောင်ပေးခဲ့တယ်” လို့ ပြောပါတယ်။
နမ္မတီးမြို့နယ်မှာ ပြီးခဲ့တဲ့ ဖေဖော်ဝါရီလက နေအိမ်တလုံး မီးလောင်မှုဖြစ်ပွားပြီး အသက် ၄ နှစ်အရွယ် ကလေးငယ်တဦး ထိခိုက်ဒဏ်ရာ ရရှိခဲ့ပါသေးတယ်။
