ပဲခူးတိုင်း၊ သုံးဆယ်မြို့၊ စံရွေးတန်းရပ်ကွက်၊ စံရွေးတန်းလမ်းနဲ့ ဗိုလ်ချုပ်လမ်းဆုံမှာ နိုဝင်ဘာ ၂၅ ရက် ဒီနေ့မနက် ၇ နာရီက စစ်ကောင်စီခန့် ရပ်ကွက်အုပ်ချုပ်ရေးမှူးတဦးကို အမည်မသိ အမျိုးသားနှစ်ဦးက သေနတ်နဲ့ပစ်ခတ်ခဲ့လို့ သေဆုံးသွားတယ်လို့ ဒေသခံတွေဆီက သိရပါတယ်။
နေအိမ်ကနေ စံရွေးတန်းလမ်းနဲ့ ဗိုလ်ချုပ်လမ်းဆုံမှာရှိတဲ့ ဆေးဆိုင်လာဖွင့်တဲ့ ရပ်ကွက်အုပ်ချုပ်ရေးမှူးကို အမည်မသိ အမျိုးသားနှစ်ဦးက သေနတ်နဲ့ ပစ်ခတ်ခဲ့တာ ဖြစ်တယ်လို့ ရပ်ကွက်နေသူတဦးက ပြောပါတယ်။
“သေနတ်နဲ့ပစ်တာ လေးချက်၊ နောက်ကျောကနေ ကျည်ကဖောက်ပြီး ဝင်သွားတာ၊ ပွဲချင်းပြီးပဲ၊ လူနာတင်ယာဥ်နဲ့ စစ်တပ်က လာသယ်သွားတယ်။”
သေနတ်နဲ့ ပစ်ခတ်ခံရလို့ သေဆုံးသွားသူမှာ စံရွေးတန်းရပ်ကွက်အုပ်ချုပ်ရေးမှူး ဦးထွန်းထွန်း ဖြစ်ပြီး ရပ်ကွက်နေပြည်သူတွေအပေါ်မှာ အနိုင်ကျင့် အုပ်ချုပ်တတ်သူတဦး ဖြစ်တယ်လို့ ရပ်မိရပ်ဖတဦးက ပြောပါတယ်။
ဒီကနေ့ပစ်ခတ်မှုကို သာယာဝတီဂဠုန်အဖွဲ့က ပြုလုပ်ခဲ့တာဖြစ်ပြီး သေဆုံးသူဟာ ဦးသိန်းစိန် အစိုးရ လက်ထက်ကတည်းက အုပ်ချုပ်ရေးမှူးအဖြစ် လုပ်ကိုင်ခဲ့ပြီး ပြည်သူတွေအပေါ် စစ်ကောင်စီနဲ့ပေါင်းကာ ဧည့်စာရင်းစစ်တာတွေ၊ ဖမ်းဆီးဒဏ်ရိုက်တာတွေ ပြုလုပ်ခဲ့လို့ ရှင်းလင်းခဲ့တာ ဖြစ်တယ်လို့ ထုတ်ပြန်ထားပါတယ်။
လတ်တလောမှာ စစ်ကောင်စီတပ်နဲ့ ရဲတွေဟာ စံရွေးတန်းရပ်ကွက် အုပ်ချုပ်ရေးမှူးရုံးမှာ အထိုင်ချထားပြီး ရပ်ကွက်နေပြည်သူတချို့ကို စစ်ဆေးတာတွေ ပြုလုပ်နေတယ်လို့ ရပ်ကွက်နေသူတွေဆီက သိရပါတယ်။
