ပဲခူးတိုင်း၊ ဇီးကုန်းမြို့ရှိ ဇီးကုန်းဈေးမှာ နိုဝင်ဘာ ၂၀ ရက် ညပိုင်းက မီးလောင်ပြီး ဆိုင်ခန်းတချို့ မီးထဲပါ ပျက်စီးဆုံးရှုံးသွားတယ်လို့ ဒေသခံ စျေးသည်တွေထံက သိရပါတယ်။
မီးလောင်မှုကြောင့် စုစုပေါင်း ဆိုင်းခန်း ၇ ခန်းပါသွားပြီး မီးစတင်လောင်ကျွမ်းရတဲ့ အကြောင်းရင်းကို တိတိကျကျမသိရသေးဘူးလို့ အဆိုပါဈေးမှာ ဈေးရောင်းနေတဲ့ ဈေးသည်တယောက်က ပြောပါတယ်။
“၁၀ နာရီကျော်လောက်မှာ လောင်တာ။ မီးကလည်း ပြတ်နေတော့ ဝါယာရှော့တော့ မဟုတ်ဘူး။ ဘာကြောင့်လဲဆိုတာတော့ အခုထိမသိရသေးဘူး။ ဆိုင်ခန်း ၇ ခန်းလောက်ပါသွားတယ်။ အရင်ကတော့ တခါမှ မလောင်ဖူးပါဘူး။ အရင်က ဆိုင်ခန်းတွေက သစ်သားဆိုင်တွေဆိုရင်တော့ မလွယ်ဘူး၊ တဈေးလုံးပါသွားနိုင်တယ်။ အခုက အုတ်တိုက်တွေဖြစ်နေလို့ တော်သေးတာ။ တောင်းတွေ ပလုံးတွေ စကောတွေ ရောင်းတဲ့ဆိုင်က စလောင်တာလို့တော့ ပြောနေကြတာပဲ။ အတည်တော့ပြုလို့မရသေးပါဘူး။ သူက အတွင်းဘက်က၊ အဲ့ဒီကနေမှတဆင့် အပြင်ကဆိုင်တွေကို ကူးတာ။”
မီးလောင်ပြီးနောက် စစ်ကောင်စီက တဈေးလုံးပိတ်ထားကာ ၊ လမ်းတွေကိုပါပိတ်ထားပြီး စစ်ဆေးရေးတွေ လုပ်နေပါတယ်။
အခုမီးလောင်ခဲ့တဲ့ ဆိုင်ခန်း ၇ ခန်းအတွက် ခန့်မှန်းကျပ် ၁,၅၂၀,၀၀၀ ဖိုးလောက် ဆုံးရှုံးခဲ့ပြီး မီးဘယ်ကစလောင်တယ်၊ ဘာကြောင့်လောင်တယ်ဆိုတာကို ဇီးကုန်းမြို့နယ် မီးသတ်တပ်ဖွဲ့၊ ရဲတပ်ဖွဲ့၊ ဈေးကော်မတီတို့ ပူးပေါင်းပြီး စုံစမ်းဖော်ထုတ်နေတယ်လို့ ရဲမှတ်တမ်းအရ သိရပါတယ်။
