ချင်းပြည်နယ်၊ ဟားခါးမြို့၊ ကျောဘုတ်ရပ်ကွက်မှာ နိုဝင်ဘာ ၁၅ ရက် ည ၁၀ နာရီခွဲလောက်က စစ်ကောင်စီတပ် ပစ်ခတ်လိုက်တဲ့ လက်နက်ကြီးကျည် ကျရောက်ပေါက်ကွဲမှုကြောင့် အသက် ၁၄ နှစ်အရွယ် ယောက်ျားလေးတယောက် သေဆုံးခဲ့ပြီး လူ နှစ်ယောက် ထိခိုက်ဒဏ်ရာရသွားတယ်လို့ ဒေသခံတွေက ပြောပါတယ်။
လက်နက်ကြီးကျည်ဟာ ကျောဘုတ်ရပ်ကွက်ရှိ မိုးဟိန်းသောက်ရေသန့်ကုမ္ပဏီအတွင်း ကျရောက်ခဲ့ပြီး အသက် ၁၄ နှစ်အရွယ် Salai Shalom Van အမည်ရှိ ယောက်ျားလေးတဦး သေဆုံးခဲ့တာလို့ ဆိုပါတယ်။
ဒေသခံတဦးက “သေဆုံးသွားတဲ့ ကောင်လေးနဲ့ ရေသန့်စက်ရုံက ဝန်ထမ်း နှစ်ယောက်က ညစောင့်အိပ်တာလို့ သိရတယ်။ စစ်ကောင်စီတပ်က လက်နက်ကြီး ရမ်းသန်းပစ်ခတ်ခဲ့တာပါ။ စက်ရုံဝန်ထမ်း နှစ်ယောက်လည်း ဒဏ်ရာရလို့ ဆေးရုံပို့ထားတယ်” လို့ ပြောပါတယ်။
နိုဝင်ဘာ ၁၆ ရက် မနက် ၁ နာရီလောက်ကလည်း ဟားခါးမြို့အတွင်း စစ်ကောင်စီတပ်ဖွဲ့နဲ့ ချင်းအမျိုးသားတပ်တော် (CNA ) တို့ ထိတွေ့တိုက်ခိုက်မှုတွေ ရှိခဲ့တယ်လို့ သိရပါတယ်။
အဲ့ဒီတိုက်ပွဲအခြေအနေ အသေးစိတ်ကိုတော့ ဒီဗွီဘီအနေနဲ့ သီးခြားအတည်ပြုနိုင်ခြင်း မရှိသေးပါဘူး။
ပြီးခဲ့တဲ့ အောက်တိုဘာ ၁၉ ရက်ကလည်း ဟားခါးမြို့နယ် ဘွန်လုံးကျေးရွာမှာ စစ်ကောင်စီတပ်ဖွဲ့က ဒရုန်းနဲ့ ဗုံးသီးချ တိုက်ခိုက်မှုကြောင့် မူလတန်းပညာသင်ကြားနေတဲ့ အသက် ၆ နှစ်နဲ့ ၇ နှစ်အရွယ် ယောက်ျားလေးနှစ်ဦး သေဆုံးခဲ့ပြီး အသက် ၇ နှစ်အရွယ် မိန်းကလေးတဦး အပြင်းအထန် ဒဏ်ရာရရှိခဲ့ပါတယ်။
