ရခိုင်ပြည်နယ်၊ တောင်ကုတ်မြို့နယ် စည်ပင်ကော်မတီဥက္ကဋ္ဌဟောင်း ဦးဇေယျကျော်ကို နိုဝင်ဘာ ၈ ရက် နေ့လယ်ပိုင်းမှာ စစ်ကောင်စီတပ်ဖွဲ့ဝင်တွေ ဖမ်းဆီးသွားတယ်လို့ မိသားစုနဲ့ ရင်းနှီးသူတွေက ပြောပါတယ်။
ဦးဇေယျကျော်ကို နေ့လယ် ၂ နာရီလောက်က ကလေးကစားကွင်းမှာရှိနေစဉ် စစ်ကောင်စီတပ်ဖွဲ့ဝင်တွေက ဖမ်းဆီးသွားတာဖြစ်ပြီး ဘယ်နေရာမှာ ထိန်းသိမ်းထားတယ် ဆိုတာကို မသိရသေးဘူးလို့ မိသားစုနဲ့ ရင်းနှီးသူတယောက်က ပြောပါတယ်။
“ကိုဇေယျကျော်ကို ဒီနေ့ နေ့လယ် ၂ နာရီကျော်လောက်က ကလေးကစားကွင်းက စစ်ကောင်စီတပ်သားတွေက ဖမ်းသွားတာ။ ဘယ်ကိုခေါ်သွားတယ်ဆိုတာတော့ ကျနော်တို့လည်း စုံစမ်းနေဆဲဖြစ်တယ်။”
ဦးဇေယျကျော်ရဲ့ညီ ကိုမိုက်ကယ် (ခ) စည်သူကျော်ဇင်ကိုလည်း နိုဝင်ဘာ ၄ ရက် ညနေပိုင်းက သူရဲ့နေအိမ်ကနေ စစ်ကောင်စီတပ်ဖွဲ့ဝင်တွေက ဖမ်းဆီးခဲ့ပါတယ်။
ဦးဇေယျကျော်ဟာ အရင်က နိုင်ငံရေးတက်ကြွလှုပ်ရှားမှုတွေရှိခဲ့သလို လူမှုရေး တက်ကြွလှုပ်ရှားမှုနဲ့ လူ့အခွင့်အရေး လှုပ်ရှားမှုတွေကိုလည်း တက်ကြွစွာလှုပ်ရှားခဲ့သူတယောက် ဖြစ်ပါတယ်။
ကိုဇေယျကျော်နဲ့ ညီဖြစ်သူ ကိုစည်သူကျော်ဇင်တို့ဟာ ပြီးခဲ့တဲ့ ၂၀၂၀ ခုနှစ်က ရက္ခိုင့်တပ်တော် (အေအေ) နဲ့ ဆက်စပ်တယ်ဆိုပြီး အကြမ်းဖက်မှုတိုက်ဖျက်ရေး ဥပဒေတွေနဲ့ တနှစ်ကြာ တရားရင်ဆိုင်ခဲ့ရပြီး ၂၀၂၁ ဧပြီလမှာ တရားသေ လွတ်မြောက်လာခဲ့တာ ဖြစ်ပါတယ်။
ရခိုင်ပြည်နယ်မှာ ရက္ခိုင့်တပ်တော် (အေအေ) နဲ့ စစ်ကောင်စီအကြား တိုက်ပွဲပြင်းထန်လာပြီးနောက် စစ်ကောင်စီက နိုင်ငံရေးတက်ကြွလှုပ်ရှားသူ၊ လူမှုရေး တက်ကြွလှုပ်ရှားသူတွေကို လိုက်လံဖမ်းဆီးနေပြီး ပုဒ်မအမျိုးမျိုးတပ်ကာ တရားစွဲဆိုနေတာ ဖြစ်ပါတယ်။
