ရန်ကုန်တိုင်း၊ ဒလမြို့နယ်၊ ကျန်စစ်သားရပ်ကွက် ဒလ-တွံတေးကားလမ်းပေါ်ရှိ နာရီစင်အနီးမှာ အောက်တိုဘာ ၁၄ ရက် ဒီမနက် ၁၀ နာရီခွဲက ဗုံးပေါက်ကွဲခဲ့ပြီး ထိခိုက်ဒဏ်ရာရသူတချို့ ရှိတယ်လို့ ရပ်ကွက်နေသူတယောက်က ပြောပါတယ်။
“ကျနော်တွေ့တာ အမျိုးသမီးနှစ်ဦး ဒဏ်ရာရထားတာတွေ့တယ်။ စစ်သားတွေလည်း ရောက်နေတယ်။ ဒဏ်ရာကတော့ သိပ်မများဘူး။ တခြား ဘယ်သူတွေ ဒဏ်ရာရလည်း မသိဘူး။”
စစ်ကောင်စီတပ်တွေ လုံခြုံရေးယူထားတဲ့ မြန်မာ့စီးပွားရေးဘဏ်နဲ့ ပညာရေးမှူးရုံးအနီး ဖြစ်တဲ့အတွက် စစ်ကောင်စီတပ်ဖွဲ့ဝင်တချို့လည်း ဒဏ်ရာရရှိနိုင်တယ်လို့ မြို့ခံတယောက်က ဒီဗွီဘီကို ပြောပါတယ်။
“ပုံမှန်ဆို နာရီစင်နားနဲ့ စီးပွားရေးဘဏ်တို့၊ ပညာရေးမှူးရုံးနားမှာ ဒီကောင်တွေ အမြဲရှိနေတော့ ဒီကောင်တွေလည်း ထိနိုင်တယ်။”
လတ်တလောမှာ စစ်ကောင်စီတပ်ဟာ နာရီစင်နဲ့ အနီးတဝိုက်မှာ ဗုံးထပ်မံရှိမရှိ ရှာဖွေနေပြီး လမ်းသွားလမ်းလာတွေကို စစ်ဆေးနေတယ်လို့ မြို့ခံတွေဆီက သိရပါတယ်။
ရန်ကုန်တိုင်းအတွင်းရှိ မြို့နယ်တချို့မှာ အောက်တိုဘာ ၁ ရက်မှ ၁၃ ရက်အတွင်း ပစ်ခတ်မှုနဲ့ ဗုံးပေါက်မှု ၁၈ ကြိမ်ဖြစ်ခဲ့ပြီး ၃ ယောက်သေဆုံးကာ ၁၅ ယောက် ဒဏ်ရာရရှိခဲ့ပါတယ်။
