လက်ရှိ နွေဦးတော်လှန်ရေးသည် ယခင်သမိုင်းဝင်အဖြစ်အပျက်များနှင့် တူတာတွေလည်း ရှိသလို မတူညီမှုများလည်း တွေ့ရသည်။ ပြည်သူတရပ်လုံး၏ နိုင်ငံရေးအသိရေချိန် မြင့်မားမှု၊ ခိုင်မာကျစ်လျစ်သော စည်းလုံးညီညွတ်မှု၊ နည်းပညာထွန်းကားမှု စသည်တို့ဖြစ်ကြသည်။ ထိုအချက်များမှာ ယနေ့ထက်တိုင် အရှိန်အဟုန်ကောင်းကောင်းနှင့် ဆက်လက်တည်ရှိနေတုန်း ဖြစ်သည်။ ယင်းထူးခြားချက်များအပြင် တခြားသော ထူးခြားချက်တခုလည်း ရှိပေသေးသည်။ ယင်းမှာ တခြားမဟုတ်။ ပြည်ပရောက် မြန်မာပြည်သားများ ဖြစ်​ကြသည်။ (ကရင်၊ ကယား၊ ကချင်၊ ချင်း၊ အစရှိသည့် မြန်မာနိုင်ငံအတွင်း နေထိုင်လာခဲ့ကြသည့် တိုင်းရင်းသားလူမျိုး အားလုံးကို ရည်ညွှန်းပေသည်။)

ပြည်ပရောက်မြန်မာများ

သူတို့မှာ ကိုယ့်တိုင်းပြည်ကို စွန့်ခွာသွားချင်လွန်းလို့မဟုတ်။ အခြေအနေ အကြောင်းကြောင်းကြောင့် စွန့်ခွာသွားခဲ့ကြရသူများ ဖြစ်ကြ၏။ ကျပ်တည်းခက်ခဲလာသည့် စီးပွားရေး မပြေလည်မှုများအတွက် မိမိတို့၏ ရှိသမျှပစ္စည်းများကို ပေါင်နှံရောင်းချကာ ချစ်ရသည့်တိုင်းပြည်ကို စွန့်ခွာလာခဲ့ကြသူတွေ ဖြစ်သည်။

မိမိတို့၏ နိုင်ငံရေး၊ ဒီမိုကရေစီအရေး လှုပ်ရှားမှုများနှင့်ပတ်သက်၍ စစ်အာဏာရှင်တွေ၏ လက်တွင်းသို့ အကျရောက်မခံနိုင်သည့်အဆုံး မလုံခြုံတော့သည့် မိမိတို့ဘဝများအတွက် တိုင်းပြည်ကနေ ထွက်ခွာတိမ်းရှောင်လာကြရသူတွေလည်း ရှိသည်။ မည်သို့ရှိစေ သူတို့မှာ မိမိတို့၏ ဝမ်းရေး၊ လုံခြုံရေးအတွက် မိမိနိုင်ငံကို မရှောင်မလွှဲသာ စွန့်ခွာကာ နိုင်ငံရပ်ခြားသို့ ထွက်ခွာလာကြသူများ ဖြစ်သည်။

‌၂၀၂၁ နွေဦးတော်လှန်ရေး

ယခုအခါမှာတော့ ထိုပြည်ပတွင်ရောက်ရှိ‌နေကြသော မြန်မာများမှာ ၂၀၂၁ မှ အစပြုခဲ့သော နွေဦးတော်လှန်ရေးအတွက် တက်ကြွစွာ ပါဝင်ဆောင်ရွက်နေကြသူများ ဖြစ်နေပေပြီ။ ပြည်တွင်းရှိ ပြည်သူများလို စစ်အာဏာရှင်တွေရဲ့ အရိပ်မည်းကြီးအောက် ကိုယ်တိုင် ကျရောက်မနေကြသော်လည်း သူတို့ကိုယ်တိုင်မှာလည်း ထိုအာဏာရှင်တို့၏ တိုက်ရိုက်တဖုံ၊ သွယ်ဝိုက်တမျိုး စနက်တို့ကြောင့် တိုင်းပြည်ပြင်ပကို ထွက်ခွာခဲ့ရသည့်အတွက် အာဏာရှင်စနစ်ဆိုလျှင် အလိုလိုရွံမုန်းနေကြပြီ ဖြစ်သည်။ ထို့အတွက်ကြောင့် အခါအခွင့်သင့်သော ယနေ့အချိန်အခါတွင် တိုင်းပြည်ကို စစ်ကျွန်ဘဝမှ လွတ်မြောက်စေလိုသည့်အတွက် ပြည်ပကနေ တတ်အားသရွေ့ ပါဝင်ကူညီနေကြခြင်း ဖြစ်သည်။ ထိုသို့ ပါဝင်ကူညီမှုများတွင် အဓိကအားဖြင့် အပိုင်းနှစ်ပိုင်းဟု ယေဘုယျ ဆိုရပေမည်။

နိုင်ငံရေး လှုပ်ရှားဆောင်ရွက်မှုများ

အာဏာသိမ်းပြီး မကြာခင်မှာပင် ပြည်တွင်းတွင် အာဏာသိမ်းမှုဆန့်ကျင်ရေး ကန့်ကွက်ဆန္ဒပြမှုများ ကြီးကြီးမားမား ပေါ်ပေါက်လာခဲ့သည်။ ယင်းသို့ ပြည်တွင်း ဆန္ဒပြမှုများနှင့် မရှေးမနှောင်းမှာပင် ပြည်ပနိုင်ငံများတွင်လည်း ပြည်ပရောက်  မြန်မာများ၏ နိုင်ငံရေးလှုပ်ရှားမှုများလည်း ပေါ်ပေါက်လာခဲ့ရာ ယနေ့ထက်တိုင် ဖြစ်သည်။ အမေရိကန်ရောက် မြန်မာများက စစ်အာဏာရှင်စနစ် အလိုမရှိ ကြွေးကြော်သံများဖြင့် ချီတက်ဆန္ဒပြနေစဥ် တောင်ကိုရီးယား​ရောက် မြန်မာများကလည်း စစ်အာဏာရှင်ကျဆုံးရေး ဆိုသော ဆိုင်းဘုတ်များ ကိုင်​ဆောင်ကာ ကိုရီးယားမြို့ကြီးများတွင် ဆန္ဒထုတ်ဖော်ခဲ့ကြသည်။

နယ်သာလန်နိုင်ငံ ICJ ကို ရောက်လာသော စစ်ကောင်စီကိုယ်စားလှယ်တွေကို နယ်သာလန်ရောက် မြန်မာတွေ သွားရောက်ဆန္ဒပြကြသလို ဂျပန်ရောက် မြန်မာများကလည်း ဂျပန်အစိုးရအနေနဲ့ တရားမဝင် အကြမ်းဖက်စစ်ကောင်စီနှင့် မဆက်ဆံဖို့ ဂျပန်မြို့ကြီးများတွင် တောင်းဆိုခဲ့ကြသည်။ ယူကေရောက် မြန်မာများက အာဏာသိမ်း တနှစ်ပြည့်အဖြစ် ဆန္ဒပြနေကြစဥ် မလေးရှားရောက် မြန်မာများကလည်း စကစကို အာဆီယံအနေဖြင့် မဆက်ဆံဖို့ တောင်းဆိုဆန္ဒပြမှုများ ပြုလုပ်ခဲ့ကြသည်။ ထို့အပြင် သက်ဆိုင်ရာနိုင်ငံများရှိ လွှတ်တော်ကိုယ်စားလှယ်များနှင့် တွေ့ဆုံကာ လက်ရှိ မြန်မာ့အရေးအတွက် ဆွေးနွေးကြတာမျိုး၊ အိတ်ဖွင့်ပေးစာ ပေးကြတာမျိုး၊ ပြည်သူ့သံအမတ်ကြီးကို ကုလတွင် ဆက်လက်ထားရှိဖို့၊ NUG ကို ပြည်သူ့တရားဝင်အစိုးရအဖြစ် အသိအမှတ်ပြုကြဖို့ ဆန္ဒထုတ်ဖော်တာမျိုး၊ MOGE, Chevron, POSCO စသည့်လုပ်ငန်းများကို စစ်ကောင်စီအတွက် အသက်ဆက်မပေးကြဖို့ တောင်းဆိုတာမျိုး စသဖြင့် နိုင်ငံရေး လှုပ်ရှားမှုများကို အမျိုးမျိုး အဖုံဖုံ တတ်စွမ်းသမျှ လုပ်ဆောင်နေကြသည်။

ငွေကြေးထောက်ပံ့ရေး

ထိုသို့ နိုင်ငံရေးလှုပ်ရှားဆောင်ရွက်မှုများရှိသလို ငွေကြေးထောက်ပံ့သည့် အပိုင်းတွင်လည်း တတ်နိုင်သည့်ဘက်မှ ပါဝင်ဆောင်ရွက်ခဲ့ကြသည်။ ပထမဦးဆုံးအ‌နေဖြင့် CDM ဝန်ထမ်းများကို ဂုဏ်ပြုကူညီရာတွင်လည်း မိမိတို့၏ လုပ်အားခများဖြင့် ပါဝင်ကူခဲ့ကြသည်။ သည့်နောက် တော်လှန်ရေးအရှိန်မြင့်လာသည့်အခါတွင်လည်း စစ်ရေးလိုအပ်ချက်အရ စစ်အသုံးစရိတ်များအတွက် လိုအပ်သည့် ငွေကြေးထောက်ပံ့မှုများကို ဆက်လက် ပြုလုပ်ခဲ့ကြသည်။ မိမိတို့ လုပ်အားခများဖြင့် ပါဝင်ကူညီရုံတင်မက မိမိတို့ရောက်ရှိရာ တိုင်းပြည်အသီးသီးတွင် ဈေးရောင်းပွဲတော်များ ကျင်းပခြင်း၊ ဘောလုံးပြိုင်ပွဲများ ကျင်းပခြင်း၊ လေလံပွဲများ ပြုလုပ်ခြင်း စသည့်အစီအစဥ်မျိုးစုံဖြင့် ပြည်တွင်းရှိ တော်လှန်ရေးသမားများအတွက် ကူညီဆောင်ရွက်ပေးနေကြသည်။ အလျဥ်းသင့်သလို ပြုလုပ်သော click to donate မှ အစီအစဥ်များ၊ skywalk၊ NUG မှပြုလုပ်သော EOD၊ Bond စသည်တို့တွင်လည်း ပြည်ပရောက်မြန်မာပြည်သားတို့၏ တက်ကြွစွာ ပါဝင်ဆောင်ရွက်နေမှုများကို တွေ့ရှိနိုင်ပေသည်။

အာရှနိုင်ငံများရှိ အခြေခံအလုပ်သမားများ ဆိုလျှင်လည်း မိမိတို့၏ မများလှသော လုပ်အားခများထဲကပင် ဖဲ့၍ နွေဦးတော်လှန်ရေးအတွက် လစဥ်လိုလို ကူညီထောက်ပံ့နေကြသည်။

ပြည်ပမှာ ရောက်နေသော်လည်း မဆိုင်သလို မနေကြ။ ကိုယ့်တိုင်းပြည် လွတ်မြောက်ဖို့အတွက် ရောက်ရာအရပ်မှ တာဝန်ကျေပွန်ကြကြောင်း အထင်းသား တွေ့မြင်နိုင်ပေသည်။

နိုင်ငံတကာအကူအညီ

မြန်မာပြည်တွင် မတရားစစ်အာဏာသိမ်းထားသည်မှာ နှစ်အားဖြင့် ၁ နှစ်ခွဲကျော်လာပြီ။ လအားဖြင့် ၁၉ လရှိပြီး ရက်အားဖြင့် ၅၉၈ ရက် ရှိလာပြီဖြစ်သည်။ ထိုအတောအတွင်း အဲဒီ ရာဇဝတ်ကောင် အာဏာရှင်တွေကြောင့် ပြည်သူတို့၏ ထိခိုက်ပျက်စီးမှုများမှာလည်း အမြောက်အမြား ရှိလာပြီဖြစ်သည်။ သို့အတွက်ကြောင့် နိုင်ငံတကာအနေနဲ့ ထိုသို့ အကြမ်းဖက်ခံရမှုများအတွက် ရပ်ကြည့်မနေဖို့၊ ကူညီပေးဖို့ တောင်းဆိုခဲ့ကြလာတာ ကြာလှလေပြီ။ သို့ရာတွင် ဘာမှအရာမထင်။ မည်သည့် နိုင်ငံတကာ အကူအညီမှ မရခဲ့။ အချိန်တွေကြာ သေကျေပျက်စီးမှုတွေသာ ပိုများလာခဲ့သည့်တိုင် မည်သည့်နိုင်ငံတကာ အကူအညီမှ ရောက်မလာခဲ့ပေ။

သို့သော် အားတက်စရာ ဂုဏ်ယူစရာတခုမှာ မိမိတို့ကို အဲဒီ ကုလလို၊ ဒီမိုကရေစီနိုင်ငံတွေလို ဘယ်နိုင်ငံတကာကမှ မကူညီသော်လည်း ဆိုခဲ့သလို ရောက်ရာအရပ်ကနေ တတ်နိုင်သ‌ရွေ့ ပါဝင်ကူညီနေကြသည့် နိုင်ငံတကာရောက် မြန်မာတွေ ရှိနေခြင်းပင်ဖြစ်သည်။ သူတို့မှာ မိမိတို့ မျှော်လင့်ထားသော R2P တွေ၊ UN တွေ မဟုတ်သော်လည်း ကိုယ့်တိုင်းပြည်ကို စစ်ကျွန်လက်အောက်မှ လွတ်မြောက်အောင် တော်လှန်ရာတွင် ထိရောက်စွာ ကူညီပေးနေကြသည့် နိုင်ငံတကာရှိ အင်အားစုတခုပဲ ဖြစ်သည်။ ထို့အတွက်ကြောင့် နိုင်ငံတကာ အကူအညီ‌ တောင်းခဲ့သည့်တိုင် ယနေ့အထိ ဘာအကူအညီမှမရသော ပြည်တွင်းရှိ မြန်မာပြည်သူများအတွက် နိုင်ငံတကာရောက် မြန်မာများသာလျှင် စစ်မှန်သော နိုင်ငံတကာ အကူအညီ ဖြစ်သည်ဟု ဆိုရပေတော့မည်။

နွေဦးဇင်