စစ်ကိုင်းတိုင်းနဲ့ မကွေးတိုင်း နယ်စပ်နှစ်ခုမှာ လှုပ်ရှားနေတဲ့ PRA အဖွဲ့နဲ့ စစ်ကောင်စီတပ်တို့ ဩဂုတ် ၂၀ ရက်ကနေ ၂၃ ရက်အထိ ထိပ်တိုက်တိုက်ပွဲကြီး ၄ ကြိမ်နဲ့ တိုက်ပွဲငယ် အများအပြား ဖြစ်ခဲ့တယ်လို့ PRA အဖွဲ့ တာဝန်ရှိသူ ကိုဂျပန်ကြီးက ဒီဗွီဘီကို ပြောပါတယ်။
“စစ်ကောင်စီနဲ့ တိုက်ပွဲကတော့ မြေပြင်မှာတော့ တင်းမာနေဆဲပဲဆရာရေ။ ၂၀ ရက်နေ့က ကျနော်တို့ထိန်းချုပ်ထားတဲ့ ရွာတွေထဲကို လေယာဉ် ၄ စီးနဲ့ ညောင်ပင်လယ်ရွာအနီးမှာ လာချတယ်။ အဲကောင်တွေနဲ့ တိုက်ပွဲဖြစ်ခဲ့တာ။ အခု ၄ ရက်တာတိုက်ပွဲမှာ စစ်ကောင်စီတပ်ဘက်က ၁၃ ဦး နေရာတင်သေပြီး ၁၅ ဦး ပြင်းထန်ဒဏ်ရာ ရရှိသွားပါတယ်။ PRA တပ်မတော်ဘက်က ဗဟိုကော်မတီဝင် ခေါင်းဆောင် ၄ ဦးမှ ဗိုလ်စိုင်းညီညီဆွေနဲ့ ရဲဘော် ၃ ဦး ကျဆုံးသွားတယ်။”
PRA အဖွဲ့အနေနဲ့ စစ်အာဏာရှင်ကို တော်လှန်တိုက်ပွဲဝင်ခဲ့ရာ ပထမပိုင်းမှာ ပုလဲမြို့နယ်အတွင်း လှုပ်ရှားတော်လှန်ခဲ့ပြီး ပူးပေါင်းလာသူတွေ တနေ့တခြား များလာတာကြောင့် မကွေးတိုင်း မြိုင်၊ ပေါက်နဲ့ ဂန့်ဂေါ်မြို့နယ်တွေမှာ တပ်ခွဲပေါင်းများစွာခွဲပြီး စစ်အာဏရှင်ကို တော်လှန်နေတယ်လို့ အဖွဲ့တာဝန်ရှိသူက ပြောပါတယ်။
