ဧရာဝတီတိုင်း၊ ကျိုက်လတ်မြို့နယ်က စစ်ကောင်စီတပ်ရဲ့ စစ်ဆေးရေးဂိတ် ဩဂုတ် ၂၃ ရက်နေ့ မနက်အစောပိုင်းမှာ ဗုံးပေါက်ကွဲခဲ့တယ်လို့ ဒေသခံတွေက ပြောပါတယ်။
မအူပင်မြို့ကနေ ကျိုက်လတ် လာတဲ့ လမ်းမှာရှိတဲ့ စစ်ကောင်စီတပ်နဲ့ ရဲတွေထိုင်တဲ့ စစ်ဆေးရေးဂိတ်ကနေ မနက် ၅ နာရီခွဲလောက်မှာ ဗုံးပေါက်ကွဲသံ ကြားရတာလို့ ဆိုပါတယ်။
“မနက်အစောကြီးပေါက်တာ၊ စောင့်အိပ်တဲ့ စစ်သားနဲ့ ရဲတော့ ထိနိုင်တယ်၊ ကျနော်တို့လည်း သွားမကြည့်ရဲဘူး၊ အသံကတော့ တော်တော်ကျယ်တယ်။ အဲဒီဂိတ်က လာသမျှကားနဲ့ ဆိုင်ကယ် ပိုက်ဆံတောင်းနေတဲ့ ဂိတ်ဆိုတော့ လုပ်ပေးတာ ကောင်းပါတယ်” လို့ ကျိုက်လတ်မြို့ခံ ပြည်သူတဦးက ပြောပါတယ်။
ဗုံးခွဲတိုက်ခိုက်ခံရတဲ့ စစ်ဆေးရေးဂိတ်ဟာ ဒေသခံခရီးသွားတွေကို ငွေတောင်းခံလေ့ရှိတဲ့ဂိတ် ဖြစ်ပြီး ဖောက်ခွဲတဲ့သူတွေကို ဖမ်းမမိတာကြောင့် မြို့ထဲမှာ မနက်ပိုင်း ကင်းလှည့်တာနဲ့ အထိုင်စစ်ဆေးတာတွေ ပိုလုပ်လာတယ်လို့ ဆိုပါတယ်။
စစ်ကောင်စီတပ်ရဲ့စစ်ဆေးရေးဂိတ်ကို နန်းထိုက်အောင် စစ်ဆင်ရေးအဖြစ် ကျိုက်လတ်မြို့နယ် ပြည်သူ့ကာကွယ်ရေးတပ်ဖွဲ့နဲ့ ကျိုက်လတ် ဧရာဗေဒါအဖွဲ့တို့ ပူးပေါင်းလုပ်ဆောင်ခဲ့တာလို့ သတင်းထုတ်ပြန်ထားပါတယ်။
ကျိုတ်လတ်မြို့နဲ့ကပ်လျက် ဖျာပုံမြို့မှာလည်း စစ်ကောင်စီရဲ့ဒေါက်တိုင် စာရေးမနဲ့ သတင်းပေးတဦးကို ဒီနေ့မှာ တော်လှန်ရေးအင်အားစုတွေက ရှင်းလင်းခဲ့သေးတယ်လို့ ဒေသခံတွေက ပြောပါတယ်။
