စစ်ဘေးရှောင်ကလေးတွေကို စာသင်ပေးနေတဲ့ ရှမ်းပြည်နယ် မိုးဗြဲမြို့နယ်က ကျောင်းတကျောင်းဟာ အမိုးအကာ အခက်အခဲကြောင့် ပိတ်သိမ်းရတော့မယ်လို့ တာဝန်ရှိသူတယောက်က ပြောပါတယ်။
“ကျောင်းဖွင့်လာတာ ၆ လပြည့်ခဲ့ပြီ၊ မိုးတွင်းဆိုရင် ကျောင်းတွေက မိုးမလုံဘူး။ ဆက်ဖွင့်ဖို့က ခက်ခဲတယ်။ မိုးကာကြီးတွေနဲ့ပဲ မိုးတာ” လို့ ကျောင်းတာဝန်ခံတယောက်က ပြောပါတယ်။
မိုးဗြဲမြို့ အရှေ့ဘက်ကမ်းမှာရှိတဲ့ ဒီကျောင်းမှာ မူလတန်းအဆင့် ကျောင်းသား ၁၀၀ ကျော်ကို ဆရာမ ၃ ယောက်နဲ့ သင်ကြားပေးနေတာပါ။
စစ်ဘေးရှောင်ကလေးတွေ ပညာရေးနောက်မကျစေဖို့ စေတနာ့ဝန်ထမ်းအဖွဲ့တွေက ကြိုးစားသင်ကြားပေးနေတာဖြစ်ပြီး အလယ်တန်းအဆင့် ကျောင်းသား ၂၀၀ ကျော်ကိုတော့ နောက်တနေရာမှာ ကျောင်းဖွင့် သင်ကြားပေးနေတာ ဖြစ်ပါတယ်။
“မိုးကာဖိုး မတတ်နိုင်တော့တာ။ တခါလဲရင် ၅ ထည်လဲရတယ်။ တထည်ကို ၆၉,၀၀၀ ကျတယ်။ တခြားတိုလီမိုလီအစတွေ ဝယ်ရတာရှိသေးတယ်။ ခဏခဏဆို အဆင်မပြေဘူး” လို့ ကျောင်းတာဝန်ခံတယောက်က ပြောပါတယ်။
