ရခိုင်ပြည်နယ် ပုဏ္ဏားကျွန်းမြို့နယ်၊ ဘုတ္တောနဲ့ မော်ရွာကျေးရွာက ရွာသား ၄ ဦး နွားရှာသွားရင်း ဘုတ္တောကျေးရွာနားက တောင်တန်းနားမှာ မိုင်းနင်းမိ ပေါက်ကွဲပြီး ဒဏ်ရာရခဲ့ကာ ဒဏ်ရာ ပြင်းထန်သူ ၁ ယောက်ကို စစ်တွေဆေးရုံ ပို့လိုက်တယ်လို့ သုခမိတ္တာနာရေးကူညီမှုအသင်း တာဝန်ရှိသူ တဦးက ပြောပါတယ်။
" ကျနော်တို့ သိရသလောက်တော့ သူတို့ ၄ ဦးက နွားရှာသွားကြရင်း မိုင်းနင်းမိတာ”
မော်ရွာနေသူတွေဖြစ်တဲ့ ဦးအောင်ဝင်းသိန်း(၃၅)နှစ်ဟာ မိုင်းထိမှန်ကာ နံရိုးဖောက်ဝင် ဒဏ်ရာ ရခဲ့ပြီး ဦးအောင်ချမ်းစိန်(၆၀)နှစ်ကတော့ ညာဘက်လက်ကောက်ဝတ်ပြတ်သွားခဲ့ပါတယ်။
နောက်ထပ် ဘုတ္တောကျေးရွာနေ ဦးဝင်းအောင်(၂၁)နှစ်ကတော့ ခန္ဓာကိုယ်မှာ မိုင်းစ ထိမှန်သွားခဲ့ပြီး ဦးမောင်ကြီးအောင်(၅၇)နှစ်ကတော့ ဘယ်ဘက်ပေါင်မှာ မိုင်းစက် ထိမှန်ဒဏ်ရာခဲ့တယ်လို့ သိရ ပါတယ်။
မိုင်းထိမှန်သူ ၄ ယောက်ကို ယိုးတရုတ်တိုက်နယ်ဆေးရုံးကို ပို့လိုက်ပြီး အဲဒီထဲက လက်ကောက်ဝတ်ပြတ်သွားသူ ဦးအောင်ချမ်းစိန်ကို စစ်တွေဆေးရုံကို အရေးပေါ်ပို့လိုက်တယ်လို့ သုခမိတ္တာ နာရေးကူညီမှုအသင်း တာဝန်ရှိသူက ပြောပါတယ်။
မြေမြုပ်မိုင်းဒဏ်ကို ဆိုးဆိုးဝါးဝါးခံစားနေရတဲ့ ရခိုင်ဒေသမှာ ရက္ခိုင့်တပ်တော် (အေအေ)အနေနဲ့ မိုင်းအန္တရာယ် အသိပညာပေးလုပ်ငန်းတွေကို ဆက်တိုက်ဆောင်ရွက်နေတယ်လို့ အေအေ ပြန်ကြားရေး တာဝန်ခံ ဦးခိုင်သုခက ပြောဆိုထားတာပါ။
ရခိုင်ပြည်နယ်အတွင်း ၂၀၂၂ ခုနှစ်ဇန်နဝါရီ ၁ ရက်မှ သြဂုတ် ၁၁ ရက်အထိ မိုင်းထိ သေဆုံးသူ ၆ ယောက် ရှိခဲ့ပြီး ဒဏ်ရာရရှိသူ ၂၁ ယောက်အထိ ရှိခဲ့ကြောင်း မိုင်းမှတ်တမ်းတွေအရ သိရပါတယ်။
