ကရင်ပြည်နယ်၊ မြဝတီခရိုင်၊ ဝေါ်လေမြိုင်မြို့နယ်ခွဲရှိ မြဝတီ-ဝေါ်လေကားလမ်းကို စစ်ကောင်စီနဲ့ KNDO ပူးပေါင်းတပ်ဖွဲ့တွေက ပိတ်ထားတဲ့အတွက် ဒေသခံပြည်သူတွေနဲ့ စစ်ဘေးရှောင်ပြည်သူတွေ စားသောက်ရေး အခက်အခဲ ကြုံနေကြရပါတယ်။

မြဝတီ-ဝေါ်လေကားလမ်းကို ပိတ်လိုက်တဲ့အတွက် စားသောက်ကုန် ဈေးနှုန်းတွေ ကြီးမြင့်လာတဲ့အပြင် ဒေသခံတွေဟာ အလုပ်အကိုင်အခွင့်အရေးတွေ ရပ်နားလိုက်ရတဲ့အတွက် စားဝတ်နေရေးမှာ အခက်အခဲတွေနဲ့ ရင်ဆိုင်နေရတာပါ။

ဒေသခံပြည်သူတဦးက “အရင် ပိတ်ထားတာ ၃ ရက်ရှိပြီး။ မနေ့က တရက်ဖွင့်ပေးလိုက်တယ်။ အဲဒီနေ့ပဲ မြဝတီကိုသွားတဲ့ ကားတစီးကို စစ်ကောင်စီဘက်က လမ်းမှာမိုင်းဆွဲပြီး ပစ်ခတ်လိုက်တယ်။ လူတွေတော့ ထိခိုက်မှုမရှိဘူး။ ကားထားပြီး ပြန်လာလိုက်တယ်။ အခု လမ်းကို နှစ်ဖက်စလုံးက ပိတ်ထားတော့ စစ်ရှောင်တွေကော၊ ဒေသခံတွေပါ စားသောက်ဖို့ အခက်အခဲတွေဖြစ်ကုန်ပြီ။ နောက်ထပ်ဘယ်နှရက်ပိတ်မလဲ မသိရသေးဘူး” လို့ ပြောပါတယ်။

ဒါအပြင် ထိုင်း-မြန်မာနယ်စပ် သောင်းရင်းမြစ်ကို ထိုင်းနယ်ခြားစောင့်တပ်တွေက  ပိတ်ထားတဲ့အတွက် စစ်ဘေးရှောင်ပြည်သူတွေဟာ  အလှူရှင်တွေရဲ့ ကူညီလှူဒါန်းတာတွေကို မရရှိတော့တဲ့အတွက် စားသောက်ရေးမှာ အခက်အခဲတွေ ရင်ဆိုင်နေရတယ်လို့ စစ်ဘေးရှောင်အရေးကူညီပေးနေသူတွေက ပြောပါတယ်။

ဇူလိုင် ၇ ရက်မှ စတင်ပြီး ဇူလိုင် ၁၂  ရက်နေ့အထိ မြဝတီ - ဝေါ်လေ ကားလမ်းမပေါ် ( သုံးထပ်ကွေ့) မှာ စစ်ကောင်စီတပ်တွေနဲ့ ကော်ဘရာစစ်ကြောင်းတို့ ထိတွေ့တိုက်ပွဲတွေဖြစ်ပွားခဲ့သလို စစ်ကောင်စီဘက်က မြဝတီ - ဝေါ်လေ ကားလမ်းမကို တစ်ဖက်သတ်ပိတ်ဆို့ခဲ့ပါတယ်။

စစ်ကောင်စီတပ်ဘက်က လမ်းပိတ်ဆို့ခဲ့တဲ့အတွက် ဒေသခံပြည်သူတွေဟာ စားဝတ်နေရေးအခက်အခဲတွေနဲ့ ကြုံတွေ့နေရတဲ့အတွက် မြဝတီ - ဝေါ်လေ ကားလမ်းမကြီးတလျှောက် စစ်ကောင်စီတပ်က ပိတ်ဆို့ထားတဲ့ အတားအဆီးတွေ၊ အပျက်အစီးတွေကို ဖယ်ရှားရှင်းလင်းခဲ့ပြီးနောက် ဇူလိုင် ၁၆ ရက်နေ့ ညနေပိုင်းမှာ KNLA၊ KNDO ပူးပေါင်းတပ်ဖွဲ့တွေက လမ်းမကြီးကို ပြန်လည်ဖွင့်လှစ်ပေးခဲ့ပါတယ်။

ဇူလိုင် ၁၇ ရက်က ပြန်လည်ဖွင့်လှစ်လိုက်တဲ့ မြဝတီ - ဝေါ်လေ ကားလမ်းကို စစ်ကောင်စီက လက်နက်ကြီးတွေနဲ့ ရမ်းသမ်းပစ်ခတ်နေတဲ့အတွက် ဒေသခံပြည်သူတွေရဲ့ အသက်အိုးအိမ် စည်းစိမ်တွေကို ထိခိုက်မှာစိုးရိမ်တဲ့အတွက်  လမ်းအပိုင်းကို ပြန်ပိတ်လိုက်တာလို့ KNDO ကော်ဘရာ စစ်ကြောင်းက သတင်းထုတ်ပြန်ထားပါတယ်။

ကော်ဘရာ စစ်ကြောင်းမှူး ဗိုလ်ဒါဘောက “အကြမ်းဖက်စစ်ကောင်စီအနေနဲ့ စစ်တိုက်ချင်ရင် စစ်သားတွေပီပီ သတ္တိရှိရှိ၊ သိက္ခာရှိရှိ မျက်နှာချင်းဆိုင် တိုက်ပါ” လို့  ကော်ဘရာစစ်ကြောင်းရဲ့ လူမှုကွန်ရက်စာမျက်နှာမှာ ရေးသားထားပါတယ်။