ရိုဟင်ဂျာလူမျိုးတုံးသတ်ဖြတ်မှုနဲ့ပတ်သက်ပြီး မြန်မာနိုင်ငံအပေါ် ဂမ်ဘီယာနိုင်ငံက တရားစွဲထားတဲ့အမှုကို မြန်မာစစ်ကောင်စီကိုယ်စားလှယ်က ကန့်ကွက်ထားတာနဲ့ ပတ်သက်လို့ ဇူလိုင် ၂၂ ရက်မှာ တရားသူကြီးတွေ ဆုံးဖြတ်ချက်ချမှတ်မယ်လို့ အပြည်ပြည်ဆိုင်ရာတရားရုံးကICJ ဇူလိုင် ၁၁ ရက်မှာ ထုတ်ပြန်ပါတယ်။
ဒီအမှုကို နယ်သာလန်နိုင်ငံ၊ သည်ဟိဂ်မြို့ရှိ ICJ တရားရုံးမှာ ဇူလိုင် ၂၂ ရက် သောကြာနေ့ ညနေ ၃ နာရီမှာ စတင်မှာဖြစ်ပြီး တရားသူကြီး Joan Donoghue က ဆုံးဖြတ်ချက်ကို ဖတ်ကြားမှာ ဖြစ်ပါတယ်။
ဂမ်ဘီယာနိုင်ငံကတရားစွဲတဲ့ ဒီအမှုကို ICJ အပြည်ပြည်ဆိုင်ရာတရားရုံးက စစ်ဆေးစီရင်ခွင့်မရှိဘူးလို့ ပြီးခဲ့တဲ့ ဖေဖော်ဝါရီလ ၂၅ ရက်နေ့မှာ ပြုလုပ်တဲ့ ကြားနာပွဲမှာ မြန်မာ စစ်ကောင်စီကိုယ်စားလှယ်အဖွဲ့က ကန့်ကွက်ထားပါတယ်။
ကိုဗစ်ကပ်ရောဂါ ကန့်သတ်ချက်ကြောင့် အမိန့်ချမယ့်နေ့မှာ နှစ်ဖက်ကိုယ်စားလှယ်တွေနဲ့ တရားသူကြီးတွေ၊ ရုံးအဖွဲ့ဝင်တွေ၊ ခွင့်ပြုထားတဲ့ သတင်းမီဒီယာတချို့ပဲ တက်ရောက်ခွင့်ရှိမှာဖြစ်ပြီး အများပြည်သူ တက်ရောက်နားထောင်ခွင့် ပိတ်ထားဦးမှာ ဖြစ်ပါတယ်။
ဒါပေမဲ့ သံတမန်တွေနဲ့ အများပြည်သူအတွက် တရားရုံးတွင်းဆောင်ရွက်ချက်တွေကို ICJ ဝက်ဘ်ဆိုက်ကနေ တိုက်ရိုက်ထုတ်လွှင့်ပေးမှာဖြစ်ကြောင်း ထုတ်ပြန်ချက်မှာဖော်ပြထားပါတယ်။
