မွန်ပြည်နယ်၊ သံဖြူဇရပ်မြို့ ပိန္နဲတောကျေးရွာအနီး သံဖြူဇရပ်-ရေး-ထားဝယ် လမ်းမကြီးမှာ ဇူလိုင် ၁ ရက် မနက်ပိုင်းလောက်က ခရီးသည်တင် Express ကားနဲ့ ဆီဘောက်ဆာကား တိုက်မှုဖြစ်ပွားခဲ့တယ်လို့ လူမှုကယ်ဆယ်ရေးသမားတွေက ပြောပါတယ်။

ခရီးသည်တင် မှန်လုံကားက ကျော်တက်ချိန် တဖက်ယာဥ်ကြောကလာတဲ့ ဆီဘောက်ဆာကားနဲ့ မျက်နှာချင်းဆိုင် တိုက်မိခဲ့တာပါ။

ဆီဘောက်ဆာကားယာဥ်မောင်းမှာ ညပ်နေတဲ့အတွက် ပေါင်ကျိုးထိခိုက်ဒဏ်ရာရရှိပြီး လူမှုကယ်ဆယ်ရေးအသင်းက သွားရောက်ကူညီကာ သံဖြူဇရပ်မြို့ ပြည်သူ့ဆေးရုံ ပို့ဆောင်ပေးခဲ့ရတယ်လို့ ဆိုပါတယ်။

မော်လမြိုင်-ရေးသွား ကားလမ်းမမှာ ယာဉ်မဆင်မခြင်မောင်းနှင်မှုကြောင့် ယာဉ်တိုက်မှုတွေ မကြာခဏ ဖြစ်ပေါ်လေ့ရှိပြီး ၂၀၂၁ မှ ၂၀၂၂ ခုနှစ်အတွင်း ယာဉ်တိုက်မှုကြောင့် အသက်ဆုံးရှုံးရသူ ၁ ဒါဇင်နီးပါးလောက်ရှိပြီး ထိခိုက်ဒဏ်ရာရသူတွေလည်း အများအပြား ရှိခဲ့တယ်လို့ သိရပါတယ်။

အခုလို မိုးတွင်းကာလမှာ ယာဉ်မောင်းတွေအနေနဲ့ ကားကို သတိရှိစွာ မောင်းနှင်ကြဖို့ ယာဉ်အန္တရာယ်ကင်းရှင်းစေဖို့နဲ့ ယာဉ်စည်းကမ်း လမ်းစည်းကမ်းတွေကိုလည်း လေးစားလိုက်နာကြဖို့ လူမှုကယ်ဆယ်ရေးသမားတွေက တိုက်တွန်းထားပါတယ်။