မကွေးတိုင်း၊ ရေစကြိုမြို့နယ်၊ အောင်သပြေရွာနဲ့ တောင်ဦးရွာကြားမှာ ဇွန်လ ၂၄ ရက် ညနေပိုင်းက စစ်ကောင်စီတပ်တွေနဲ့ တိုက်ပွဲဖြစ်ပွားခဲ့တယ်လို့ ပြည်သူ့ကာကွယ်ရေးတပ်ဖွဲ့-ရေစကြိုက ပြောပါတယ်။
မနေ့ညနေ ၄ နာရီလောက်က စစ်ကောင်စီစစ်ကြောင်းနဲ့ ရေစကြို ပ.က.ဖ တို့ အနီးကပ်တိုက်ပွဲဖြစ်ပွားပြီး စစ်ကောင်စီတပ်သား ၄ ယောက် အခင်းဖြစ်နေရာမှာ သေဆုံးကာ အများအပြား ဒဏ်ရာရရှိခဲ့တယ်လို့ ရေစကြို ပ.က.ဖ ခေါင်းဆောင် ရဲဘော်ဝေကြီးက ဒီဗွီဘီကိုပြောပါတယ်။
ဒါ့အပြင် နှစ်ဖက်တိုက်ပွဲအတွင်းမှာ ရေစကြို့ ပ.က.ဖ က ထောက်ပို့ရဲဘော်တယောက် ကျည်ထိမှန်ပြီး တိုင်းပြည်အတွက် အသက်ပေးလှူလိုက်ရတယ်လို့ လည်းပြောပါတယ်။
ရေစကြိုမြို့နယ် ရေလယ်ကျွန်းဒေသမှာလည်း ဇွန် ၂၂ ရက်မနက်ပိုင်းကလည်း စစ်ကောင်စီရဲ့ ဇက်ရေယာဉ်တစီးကို ရေစကြို ပ.က.ဖ အပါဝင် ညီနောင်မဟာမိတ် ၆ ဖွဲ့က ပစ်ခတ်တိုက်ခိုက်တယ်လို့ သိရပါတယ်။
နှစ်ဖက်တိုက်ပွဲအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကိုတော့ စစ်ကောင်စီဘက်က သတင်းထုတ်ပြန်ထားတာ မတွေ့ရသေးပါဘူး။
