ရှမ်းပြည်နယ်မြောက်ပိုင်း၊ ကျောက်မဲမြို့ကနေ မိုးကုတ်မြို့ကိုသွားတဲ့ ကားလမ်းမကြီးပေါ်ရှိ TNLA (တအာင်းတပ်)စစ်ဆေးဂိတ်မှာ ဇွန် ၁၈ ရက်က ကျပ်ငွေသိန်း ၇၀ ကျော်တန်ဖိုးရှိ စိတ်ကြွဆေးပြားတွေ ဖမ်းဆီးရမိခဲ့ပါတယ်။
ကျောက်မဲကနေဖြတ်ပြီး မိုးကုတ်ဘက်သွားနေတဲ့ အမည်းရောင် (FZ) ဆိုင်ကယ်တစ်စီးကို မသင်္ကာလို့ စစ်ဆေးရာကနေ ဆိုင်ကယ်အောက်ဖုံးအတွင်း ထည့်ထားတဲ့ ငွေကျပ်သိန်း ၇၀ ကျော်တန်ဖိုးရှိ စိတ်ကြွမူးယစ်ဆေးပြား ၂၄၀ ထုပ်ဖမ်းဆီးရမိခဲ့တယ်လို့ PSLF/TNLA မူးယစ်ဆေးတိုက်ဖျက်ရေးအဖွဲ့ထံ သိရပါတယ်။
မူးယစ်ဆေးတွေ သယ်ဆောင်လာတဲ့ မန္တလေးတိုင်း၊ အောင်မြေသာစံမြို့နယ်က မောင်အောင်ဖြိုးကို PSLF/TNLAက မူးယစ်ဆေးဝါးတိုက်ဖျက်ရေးဥပဒေနဲ့ အမှုဖွင့် အရေးယူမယ်လို့ ထုတ်ပြန်ထားပါတယ်။
ကျောက်မဲမြို့နယ်ဟာ မူးယစ်ဆေးဝါးရောင်းဝယ်ဖောက်ကားမှုနဲ့ သုံးစွဲမှုတွေ များပြားနေတဲ့ မြို့နယ်တစ်ခုဖြစ်ပြီး လူငယ်လူလတ် ထက်ဝက်ကျော်ဟာ မူးယစ်ဆေးဝါးကို သုံးစွဲနေကြပါတယ်။
မူးယစ်ဆေးဝါးသုံးစွဲတဲ့ ကျောက်မဲမြို့စွန်က နေရာတခုတည်းမှာတင် နေ့စဥ်လာရောက်သုံးစွဲသူ ရာဂဏန်းကျော်တယ်လို့ ဒေသခံတွေကပြောပါတယ်။
အစိုးရအဆက်ဆက် ကျောက်မဲမြို့မှာ မူးယစ်ဆေးဝါးမှုတွေကို ထိန်းချုပ်နိုင်ခြင်းမရှိသလို အခုစစ်တပ်အာဏာသိမ်းပြီးနောက်မှာ ပိုမိုဆိုးဝါးလာတယ်လို့ ဒေသခံတွေက ပြောကြပါတယ်။
