အမ်းမြို့နယ်၌ ရဲတပ်ဖွဲ့ဝင်ဟောင်း အုပ်ချုပ်ရေးမှူး ၁ ဦး ဓားထိုးခံရပြီး သေဆုံး
DVB
·
June 9, 2022
ရခိုင်ပြည်နယ်၊ အမ်းမြို့နယ်၊ အမှတ် ၅ ရပ်ကွက် အုပ်ချုပ်ရေးမှူး ဇွန် ၉ ရက် မနက် ၉ နာရီကျော်လောက်က ဓားထိုးခံရပြီး ပွဲချင်းပြီးသေဆုံးသွားတယ်လို့ ဒေသခံတွေက ပြောပါတယ်။
အမ်းဒေသခံတဦးက “သူက ဒီနေ့မနက် ၉ နာရီကျော်မှာ စစ်မှုထမ်းဟောင်းရုံးနဲ့ စွယ်တော်ဘုန်းတော်ကြီးကျောင်းအကြားမှာ ဓားထိုးခံလိုက်ရတာ” လို့ ပြောပါတယ်။
သေဆုံးသွားသူဟာ အမှတ် ၅ ရပ်ကွက်နဲ့ အမှတ် ၄ ရပ်ကွက် ၂ ခုကို အုပ်ချုပ်နေတဲ့ အသက် ၃၀ အရွယ် အုပ်ချုပ်ရေးမှူး ဦးပိုင်ပိုင် ဖြစ်တယ်လို့ ဒေသခံတွေဆီက သိရပါတယ်။
“သူက ရဲလည်းလုပ်ခဲ့ဖူးတယ်။ တပ်နဲ့လည်း အဆက်အသွယ်ရှိတယ်။ ခရိုနီလုပ်ငန်းရှင်တွေနဲ့လည်း အဆက်အသွယ်ရှိတယ်ဆိုတော့ ဘာကိစ္စနဲ့ အသတ်ခံရသလဲ ဆိုတာတော့ မပြောတတ်ဘူး” လို့ ဒေသခံတွေက ပြောပါတယ်။
ဓားထိုးတဲ့တရားခံကတော့ ထွက်ပြေးလွတ်မြောက်နေပြီး ဖမ်းဆီးရရေးအတွက် ကြိုးပမ်းနေတယ်လို့ အမ်းမြို့နယ်ရဲစခန်းက သိရပါတယ်။
